Isithembiso sikaBawo wethu kwabakhe

UMikayeli uvuka ngexesha lokubandezeleka okungazange kubekho kunjalo, baze abaleleyo bavuke—abanye baye ebomini obungunaphakade, abanye ehlazweni. UDaniyeli ubuza ukuba kokuda kube nini na, axelelwe ukuba ayitywine incwadi. Akaze ayifumane impendulo ayifunayo, nguku kuphela: hamba ngendlela yakho, uphumle, uvukele ilifa akuthembisa lona uBawo wakho.

Isahluko 12.

Ngelo xesha wovuka uMikayeli, isikhulu esikhulu esigcina abantwana babantu bakowenu. Kobakho ukubandezeleka okungazanga kwabakho okunjalo, kususela oko zabakho iintlanga, kude kube loo xesha. Ngelo xesha baya kuhlangulwa abantu bakowenu, bonke abafunyenwe bebhaliwe encwadini. Baninzi abalele eluthulini lomhlaba abaya kuvuka; abanye baye ebomini obungunaphakade, abanye babe lihlazo nendelo engunaphakade. Izilumko ziya kukhanya njengokuqaqamba kwesibhakabhaka; nabo babuyisela abaninzi ebulungiseni, baya kukhanya njengeenkwenkwezi, ngonaphakade kanaphakade. Ke wena, Daniyeli, wavala la mazwi, uyitywine incwadi, kude kube lixesha lesiphelo. Baninzi abaya kuzulazula, lwande ukwazi.

Ndakhangela ke mna, Daniyeli, ndabona kumi abanye ababini, omnye ngaseluxwemeni olunye lomlambo, omnye ngaseluxwemeni olunye. Omnye wathi kwindoda embethe ilinen, eyayingaphezu kwamanzi omlambo: Kuya kuba mzuzu ungakanani na, zide zifike ekupheleni ezi zinto zingummangaliso?

Ndeva indoda embethe ilinen, eyayingaphezu kwamanzi omlambo, iphakamisela esandleni sayo sokunene nesokhohlo emazulwini, ifunga lowo uhleli ngonaphakade, isithi: Koba lixesha, namaxesha, nesiqingatha sexesha; xa kuthe kwagqitywa ukuwaqhekeza amandla abantu abangcwele, ziya kugqitywa zonke ezi zinto. ^a

Ndeva ke mna, andaqonda; ndaza ndathi: Nkosi yam, siya kuba yintoni na isiphelo sezi zinto?

Wathi: Hamba, Daniyeli, ngokuba la mazwi avaliwe atywiniwe, kude kube lixesha lesiphelo. Baninzi abaya kuhlanjululwa, bemhlophe, benyibilikiswa; ke bona abangendawo baya kuqhubeka besenza okubi. Akukho namnye kwabangendawo oya kuqonda; ke zona izilumko ziya kuqonda.

Kususela ekususweni kombingelelo wemihla ngemihla, nasekumisweni kwezothe elenza inkangala: iintsuku eziliwaka elinamakhulu mabini anamashumi asithoba. Unoyolo lowo ulindileyo, afike kwiintsuku eziliwaka elinamakhulu mathathu anamashumi mathathu anantlanu.

Ke wena, hamba uye esiphelweni. Wophumla, uze wande ukuma elifeni lakho ekupheleni kwemihla.