Alkawarin Uba ga Nasa

Mika'ilu ya tashi a lokacin wahalar da ba a taɓa yin irinta ba, waɗanda suke barci kuma suka farka — waɗansu zuwa rai na har abada, waɗansu zuwa kunya. Daniyel ya tambaya har yaushe, aka ce masa ya hatimce littafin. Bai taɓa samun amsar da yake so ba, sai wannan kaɗai: tafi, ka huta, ka kuma tashi don karɓar gādon da Ubanka ya alkawarta.

Babi na 12.

A lokacin nan Mika'ilu, babban sarki mai tsare 'ya'yan mutanenka, zai tashi. Za a yi wahala irin da ba a taɓa ganinta ba tun farkon al'ummai har zuwa lokacin nan. A lokacin nan za a ceci mutanenka, dukan waɗanda aka rubuta sunayensu a littafin. Mutane da yawa daga cikin waɗanda suke barci a cikin ƙurar ƙasa za su farka — waɗansu zuwa rai madawwami, waɗansu kuma zuwa kunya da reni madawwami. Masu hikima za su haskaka kamar harshakar sama, waɗanda kuma suke juya mutane da yawa ga adalci za su zama kamar taurari, har abada abadin. Amma kai, Daniyel, ka rufe waɗannan kalmomi ka kuma hatimce littafin har lokacin ƙarshe. Mutane da yawa za su yi ta kai da kawowa, ilmi kuma zai ƙaru.

Sa'an nan ni, Daniyel, na duba sai na ga waɗansu biyu tsaye, ɗaya a wannan gaɓar kogin, ɗaya kuma a wancan gaɓar. Ɗayansu ya tambayi mutumin nan sanye da lilin, wanda yake bisa ruwayen kogin, ya ce, “Har yaushe za a kai kafin waɗannan abubuwa masu banmamaki su cika?”

Na kuwa ji mutumin nan sanye da lilin, wanda yake bisa ruwayen kogin, ya ɗaga hannunsa na dama da na hagu zuwa sama, ya rantse da wanda yake a raye har abada cewa za a yi tsawon lokaci guda, da lokuta, da rabin lokaci; sa'ad da aka gama ragargaza ƙarfin mutane masu tsarki, dukan waɗannan abubuwa za su cika. ^a

Na ji, amma ban gane ba, sai na ce, “Ranka yă daɗe, mene ne ƙarshen waɗannan abubuwa?”

Ya ce, “Ka tafi, Daniyel, gama an rufe kalmomin an kuma hatimce su har lokacin ƙarshe. Mutane da yawa za a tsarkake su, a wanke su, a kuma tace su; amma mugaye za su ci gaba da aikata mugunta. Babu wani mugu da zai gane, sai dai masu hikima za su gane.

Daga lokacin da aka kawar da hadaya ta kullum, aka kuma kafa abin ƙyama mai kawo kango: kwana 1,290. Mai albarka ne wanda ya yi jira ya kuma kai kwana 1,335.

Amma kai, ka yi tafiyarka har ƙarshe. Za ka huta, sa'an nan za ka tashi ka sami gādonka a ƙarshen kwanakin.”