ኣውያት ዳዊት ኣብ ፀልማት
ንመዘምራን ኣውራ፥ ብመሰንቆታት፥ ከም ሰሚኒት። መዝሙር ዳዊት።
ዳዊት ሓሚሙ ብፍርሓት እናተንቀጥቀጠ፥ ምሉእ ለይቲ ንዓራቱ ብንብዓቱ ብምፅላቕ ደኺሙ፥ ክሳዕ መኣዝ ኢሉ ይሓትት። ምዉታት ከምስግኑ ከም ዘይኽእሉ ይማጎት። ድሕሪኡ እቲ ፀሎት ይጥምዘዝ፦ ኣቦኡ ብኽያቱ ሰሚዑ እዩ፥ ንፀላእቱ ኸዓ የባርሮም።
6 1ኦ ኣቦይ፥ ብዂራኻ ኣይትገስፀኒ፤ ብቍጥዓኻ ድማ ኣይትቕፅዐኒ። 2ኦ ኣቦይ፥ ደኺመ እየሞ መሓረኒ፤ ኦ ኣቦይ፥ ኣዕፅምተይ ብፍርሓት ይርዕዳ ኣለዋሞ ኣሕውየኒ።
3ነፍሰይ ብፍርሓት ትርዕድ ኣላ። ንስኻ ግና ኦ ኣቦይ፥ ክሳዕ መኣዝ? 4ኦ ኣቦይ፥ ናባይ ተመለስ፤ ንነፍሰይ ኣናግፋ። ስለ ምሕረትካ ኢልካ ኣድሕነኒ።
5ኣብ ሞት ዝኽረኻ የለንሞ፤ ኣብ መቓብር መን ኬመስግነካ እዩ?
6ብቝዛሜይ ደኺመ ኣለኹ። ምሉእ ለይቲ ንዓራተይ ብንብዓተይ የፅልቕሎ፤ ብብኽያተይ ድማ መንጸፈይ የርስኖ።
7ኣዒንተይ ካብ ሓዘን ሃሲሰን፤ ስለ ኵሎም ፀላእተይ ድማ ደኺመን። 8ኣቱም ኵላትኩም ገበርቲ እከይ፥ ካባይ ርሓቑ፤ ኣቦይ ድምፂ ብኽያተይ ሰሚዑ እዩሞ። 9ኣቦይ ምህለላይ ሰሚዑ እዩ፤ ኣቦይ ፀሎተይ ይቕበሎ። 10ኵሎም ፀላእተይ ክሓፍሩን ብፍርሓት ክርዕዱን እዮም፤ ድሕር ኢሎም ተመሊሶም ብድንገት ክሓፍሩ እዮም።
