زبور 6 FHB Father's Heart Bible™

6 ¹اے پلاره، په خپل قهر کښې ما ملامت مۀ کوه او نۀ په خپل غضب کښې ما ته سزا راکوه. ²اے پلاره، ماباندې رحم وکړه، ځکه چې زۀ کمزورے يم؛ اے پلاره، ما روغ کړه، ځکه چې زما هډوکى له وېرې رپيږى.

³زما روح له وېرې رپيږى. خو تۀ، اے پلاره - تر کومه وخته؟ ⁴اے پلاره، ما ته راوګرځه؛ زما ژوند وژغوره. د خپلې مينې په سبب ما خلاص کړه.

⁵ځکه چې په مرګ کښې ستا ياد نشته؛ په قبر کښې، څوک به ستا ثناء وائى؟

⁶زۀ د خپلو آهونو نه ستومانه شوے يم. ټوله شپه زۀ خپل بستر په اوښکو ډوبوم؛ په خپله ژړا يې لمدوم.

⁷زما سترګې د غم نه ستومانه شوې دى؛ د خپلو ټولو دښمنانو په سبب کمزورې شوې دى. ⁸اے تاسو ټولو چې بدى کوئ، زما نه لرې شئ، ځکه چې زما پلار زما د ژړا اواز واورېدو. ⁹زما پلار زما د رحم فرياد واورېدو؛ زما پلار زما دُعا قبلوى. ¹⁰زما ټول دښمنان به شرمنده شى او له وېرې به رپيږى؛ هغوئ به بيرته وګرځى او ناڅاپه به رُسوا شى.