Kulira kwa Dhavidhi mu Cidima
Kwa ntsogoleri wa anyakuimba; na pyakuimbira pya ntambi, mwakubverana na sheminithi. Nyimbo ya Dhavidhi.
Dhavidhi ndi wakuduwala mbakuthunthumira na mantha, wakuneta na kunyowesa phasa pace na misodzi usiku onsene, ndipo asabvundza kuti mpaka lini. Iye asalonga kuti anyakufa nee asakwanisa kusimba. Buluka mphembo isapituka: Baba wace adabva kulira kwace, ndipo iye asabulusa anyamadzawe ace.
6 1Baba wanga, lekani kundisandika mu ukali wanu, nee kundilanga mu kuipirwa kwanu. 2Ndikomereni ntima, Baba wanga, thangwi ndiri wakufewa; ndiwangiseni, Baba wanga, thangwi magogodo anga asatetemera na kugopa.
3Moyo wanga usatetemera na kugopa. Mbwenye Imwe, Baba wanga—mpaka lini? 4Tcereukani kuna ine, Baba wanga; pulumusani umaso wanga. Ndipulumuseni thangwi ya kufuna kwanu kwa cibverano.
5Thangwi mu kufa nkhabe munthu anakukumbukani; mu nthumbi, mbani anakusimbani?
6Ndaneta na kubuula kwanga. Masiku onsene ndisadzadzisa pakugona panga na misozi; ndisapanyorobzesa na kulira kwanga.
7Maso anga aneta na kutsukwala; asaperewera thangwi ya anyamalwa anga onsene. 8Bulukani kuna ine, imwe monsene anacita pyakuipa, thangwi Baba wanga abva fala ya kulira kwanga. 9Baba wanga abva kuphemba kwanga ntsisi; Baba wanga asatawira maphembero anga. 10Anyamalwa anga onsene anadzakhala na manyadzo mbatetemera na kugopa; anadzabwerera nduli mbaphatwa na manyadzo mwadzidzidzi.
