Namacibese Imwe Musabva
Kwa nyakutsogolera nyimbo; kwa zitoliro. Nyimbo ya Dhavidhi.
Mphembo ya macibese yakukonzedwa mbiyang'anirwa, ninga mlandu wakuperekwa pa macibese kakamwe. Mphalo za anyamadzawe ace ndi masiye akufunguka ndipo mafala awo ndi akunyengerera. Dhavidhi asaphemba Baba wace kuti amutsogolere munjira yakulungama kupitira pa ale anadikhira kuti iye agwe.
5 1Bverani mafala anga, Baba wanga; nyerezerani kudembeterera kwanga. 2Bverani fala ya kulira kwanga kwakuphemba ciphedzo, Mambo wanga na Baba wanga, thangwi ndisaphembera kuna Imwe.
3Baba wanga, namacibese Imwe musabva fala yanga; namacibese ndisabweresa phembero yanga kuna Imwe mbandidikhira na cidikhiro. 4Thangwi Imwe simwe Baba wathu anakomerwa na pyakuipa; cakuipa nkhabe kwanisa kukhala na Imwe. 5Anyakudzikuza nkhabe kwanisa kulimira pamaso panu; Imwe musaida onsene anacita pyakuipa. 6Imwe musafudza ale analonga uthambi; Baba wanga asanyanyasa anthu akupha na akunyengeza.
7Mbwenye Ine, thangwi ya unjinji wa kufuna kwanu kwa cibverano, ndinabwera n'nyumba yanu; ndinagodama ndalinga ku templo yanu yakucena mwakukulemedzani Imwe. 8Baba wanga, nditsogolereni mu kulungama kwanu thangwi ya ale anandiyang'anira toera ndigwe; lungamisani njira yanu pamaso panga. 9Thangwi nkhabepo cinthu cakunyindirika mu milomo yawo; n'kati mwawo ndi kuonongeka. Mikokota yawo ndi nthumbi yakufungulwa; asanyengeza na malirimi awo. 10Apaseni mulando, Baba wanga; mbagwe thangwi ya mabimbisi awo ene. Athamangiseni thangwi ya kupanduka kwawo kuzinji, thangwi apandukira Imwe. a a v10 Dhavidhi asabweresa kulira kwace kwakukhonda kubisika kwa ulungami mwakulunjika kuna Baba wathu, ule asakutambira m'mbuto mwakuukhonda. Cifuno cakuti pyakuipa pimaliswe cisagumana ntawiro wace wakukwana mwa Yezu, ule ndi wakulungama mwakukwana pontho wantsisi mwakukwana.
11Mbwenye onsene ale anabisala muna Imwe mbatsandzaye; mbaimbe na kutsandzaya kwenda na kwenda. Tsalalisani cibisiro canu pa iwo, toera ale anafuna dzina yanu adzale na kutsandzaya muna Imwe. 12Thangwi Imwe, Baba wanga, munadzasimba anyakulungama; musaazungulira na kukoma ntima ninga na xango.
