Laa 5

5 ¹Iwui tui nganāmilu, O iwui Avā; iwui ringkhangā machukkhuilu. ²Iwui ngachonmi khavai khavao akhon nganāmilu, iwui awunga kala iwui Avā, kaja ina nali seihā kasāna.

³O iwui Avā, ngathor nana iwui akhon shāmi; ngathor ina iwui seihā kasā nawui mangāli khuirāda, chihānda ngayangra. ⁴Kaja na makhayāli ningyāng khaunga ithumwui Avā maningmana; makaphā nali ngasoda mapampaimara. ⁵Langkasobing nawui miktāli manganingpaimara; makaphā kasābing saikorali nana yangkharinga. ⁶Kakapik tui matuiabing nana sāshimānra; ashee ra̱kachanga kala mikhanam mibingli iwui Avāna yangkharinga.

⁷Kha ina, nawui makhavāt makhangachei leikashi chi eina, nawui shimli kāra; nali khangachee eina nawui kathara shimshong khorumra. ⁸O iwui Avā, iwui konglui ngashānabingwui vang eina nawui khamashung khangarongli ili thānmilu; nawui shongfa iwui mangāli ngarong ngasakmilu. ⁹Kaja athumwui khamorli khuisangchao khikha akhala maleimana; athumwui wuklung kashimānna. Athumwui kharok chikhur khalui kathāna; athumwui male eina sotkhamasao sai. ¹⁰Athumli yonngasaklu, O iwui Avā; athum khalattawui khangarāna athumli konglui ngasakranu. Athumwui khayonkhamāng kachungkhawui vang athumli khuithuihaolu, kaja athumna nali ngakaishihaira. ^a a v10 Davidna mashunwui vang awui khavao chi ngatartei ithumwui Avāli khuirāda, kala Avāna chi horhaichao maningla samphangkhuia. Makaphā mathāhaowui ningchāng hakmahālak chi Jishuli awui pemhai ngahānkai samphanga; ana khamashung mashun kala lukhamashan pemting khani ngaraichada pemhaia.

¹¹Kha nali ngayinkhui kasā saikora ringphāranu; katang mavaila ringphāda laa sāranu. Nawui khamayon athumtungli haimilu, chieina namingli leishiabing nali khamathānna pemtingranu. ¹²Kaja na, O iwui Avā, khamashungabingli somira; chāngvei thāda mai eina athumli nana kuinamra.