እቲ ማንም ኽገርሆ ዘይኽእል ሓዊ

መምህራን ዝኸበደ ፍርዲ ይፅበዮም፥ ምኽንያቱ ድማ እቲ ልሳን እዩ፦ መሪሒ መርከብ፥ ንእሽተይ ሓዊ፥ ሓደ እኳ ዘይገርሆ መርዚ። እቲ ሓደ ኣፍ፥ ንኣቦና ይባርኽ፥ ነቶም ብኣምሳሉ ዝተፈጠሩ ሰባት ድማ ይረግም። ናይ ሓቂ ጥበብ፥ ብመሪር ቅንኣት ዘይኮነ፥ ብሰላማውን ብምሕረት ዝመልአ ኣካይዳ ይግለፅ።

ምዕራፍ 3።

ኣሕዋተይ፥ ንሕና መምህራን ዝኸበደ ፍርዲ ኽንቅበል ኢና እሞ፥ ካባኻትኩም ብዙሓት መምህራን ኣይትኹኑ። ኵላትና ብብዙሕ መንገዲ ንዕንቀፍ ኢና። ብዘረባ ዘይዕንቀፍ ዘበለ ኸዓ ፍፁም ሰብኣይ እዩ፤ ንብዘሎ ሰብነቱ'ውን ክገዝእ ዝኽእል እዩ። ነኣፍራስ ምእንቲ ኽእዘዙና ኢልና ልጓም ኣብ ኣፎም እንተ ገበርና፥ ንብዘሎ ሰብነቶም'ውን ንመርሕ። መራኽብ'ውን ተመልከቱ፦ ዓበይቲ ኽነሰንን ብብርቱዕ ንፋስ ዝድፍኣ ኽነሰንን፥ እቲ መራሒ ናብ ዝደለዮ ኵሉ ብንእሽተይ መሪሕ ይመርሓ። ከምኡ ድማ ልሳን ንእሽተይ ኣካል ሰብነት እዩ፥ ግና ብዓብዪ ነገር ይምካሕ። እንሆ፥ ክንደይ ንእሽተይ ሓዊ ኽንደይ ዓብዪ ዱር የንድድ! ልሳን ሓዊ እዩ፤ ኣብ ማእኸል ኣካላት ሰብነትና ዝተቐመጠ ዓለም ክፍኣት እዩ። ንብዘሎ ሰብነት የርክስ፥ ንብዘሎ መንገዲ ህይወት የቃፅል፥ ባዕሉ ኸዓ ብገሃነም ይቃፀል። ^a ኵሉ ዓይነት እንስሳን ኣዕዋፍን ለመም ዝብሉን ኣብ ባሕሪ ዘለዉ ፍጡራትን ብሰብ ይግረህ ኣሎ፥ ተገሪሁ'ውን እዩ፥ ንልሳን ግና ኽገርሆ ዝኽእል ሓደ ሰብ እኳ የለን። ዘይዓርፍ እከይ እዩ፥ ቀታሊ መርዚ ዝመልኦ እዩ። ብእኡ ንኣቦና ንባርኽ፤ ብእኡ ድማ ነቶም ብኣምሳል ኣቦና ዝተፈጠሩ ሰባት ንረግም። ካብ ሓደ ኣፍ በረኸትን መርገምን ይወፅእ። ኣሕዋተይ፥ እዙይ ክኸውን ኣይግባእን። ፈልፋሊ ካብ ሓደ ኣፍ፥ ጥዑምን መሪርን ማይ ይፍልፍልዶ? ኣሕዋተይ፥ በለስ ኣውሊዕ ክፈሪዶ ይኽእል? ወይ ወይኒ በለስ? ከምኡ ድማ ጨዋም ፈልፋሊ ፅሩይ ማይ ክህብ ኣይኽእልን።

ካብ ላዕሊ ዝመፅእ ጥበብ

ካባኻትኩም ጥበበኛን ለባምን መን እዩ? ግብሩ ብፅቡቕ ኣካይዳኡ ብትሕትና ጥበብ የርኢ። ኣብ ልብኹም መሪር ቅንኣትን ስስዐን እንተ ሃለወ ግና፥ ኣይትመኻሑ፥ ኣንፃር ሓቂ'ውን ኣይትሓስዉ። እዝ ጥበብ እዙይ፥ ካብ ላዕሊ ዝወርድ ዘይኮነስ፥ ምድራዊ፥ ስጋዊ፥ ኣጋንንታዊ እዩ። ቅንኣትን ስስዐን ኣብ ዘለዎ፥ ሁከትን ኵሉ ክፉእ ተግባርን ክህሉ እዩ። እቲ ካብ ላዕሊ ዝመፅእ ጥበብ ግና፥ ቅድም ንፁህ፥ ደሓር ሰላም ዝፈቱ፥ ህዱእ፥ ተአዛዚ፥ ብምሕረትን ብፅቡቕ ፍረን ዝመልአ፥ ኣድልዎ ዘይብሉ፥ ግብዝና ዘይብሉ እዩ። እቲ ፍረ ፅድቂ ኸዓ፥ በቶም ሰላም ዝገብሩ ብሰላም ይዝራእ።