ኣብርሃም፥ እኒሀኹ

ኣቦና ንኣብርሃም ነቲ መብፅዓ ዝተመርኮሰሉ ወዱ ሓተቶ። ኣብርሃም ድማ ንሳራ ገለ እኳ ኣይበላን፥ ሰለስተ መዓልቲ ተጓዕዘ፥ ንሕቶ ይስሓቅ ብዛዕባ እቲ በጊዕ ድማ፥ ኣቦና ባዕሉ ኸም ዘዳሉ ብምእማን መለሰ። እታ ካራ ኣብ ኣየር ከላ ደው በለት፥ ኣብ ቍጥቋጦ ኸዓ ማጕላ ተረኽበ።

ምዕራፍ 22።

ድሕሪ እዝ ነገር እዙይ ኣቦና ንኣብርሃም ፈተኖ፤ ንሱ ድማ “ኣብርሃም!” በሎ። ኣብርሃም ከዓ “እኒሀኹ” በለ።

ኣቦና ድማ ከምዙይ በሎ፦ “ነቲ ወድኻ፥ ነቲ እትፈትዎ ሓደ ወድኻ ይስሓቅ ውሰድ፤ ናብ ምድሪ ሞርያ ኺድ፤ ኣብኡ ድማ ኣብ ሓደ ኻብቲ ዝነግረካ እምባታት ዝቃፀል መስዋእቲ ጌርካ ሰውኣዮ።” ^a

ኣብርሃም ድማ ንፅባሒቱ ኣንጊሁ ተሲኡ፥ ኣድጉ ፅዒኑ፥ ክልተ መንእሰያት ምስ ወዱ ይስሓቅ ወሲዱ፥ ዕንፀይቲ ናይቲ ዝቃፀል መስዋእቲ ፀሪቡ፥ ናብቲ ኣቦና ዝነገሮ ቦታ ኸደ። ኣብ ሳልሰይቲ መዓልቲ ድማ ኣብርሃም ኣዒንቱ ቋሕ ኣቢሉ፥ ነቲ ቦታ ኻብ ርሑቕ ረአዮ። ነቶም መንእሰያት ድማ ከምዙይ በሎም፦ “ንስኻትኩም ምስ እዛ ኣድጊ ኣብዙይ ተፀበዩ፤ ኣነን እቲ ቆልዓን ናብቲ ክንከይድ፥ ክንሰግድ፥ ናባኻትኩም ድማ ክንምለስ ኢና።” ኣብርሃም ድማ ዕንፀይቲ ናይቲ ዝቃፀል መስዋእቲ ወሲዱ፥ ኣብ ልዕሊ ወዱ ይስሓቅ ፀዓኖ፤ ባዕሉ ኸዓ ሓዊን ካራን ኣብ ኢዱ ሓዘ። ክልቲኦም ድማ ብሓደ ኸዱ። ይስሓቅ ድማ ነቦኡ ኣብርሃም “ኣቦይ?” በሎ። ንሱ ኸዓ “እኒሀኹ፥ ወደይ” በለ። ይስሓቅ ድማ “እንሆ ሓዊን ዕንፀይትን ኣለዉ፤ እቲ ዝቃፀል መስዋእቲ በጊዕ ግና ኣበይ ኣሎ?” በለ።

ኣብርሃም ድማ “ኦ ወደይ፥ ኣቦና ባዕሉ እቲ ዝቃፀል መስዋእቲ በጊዕ ከዳልወልና እዩ” ኢሉ መለሰ። ክልቲኦም ድማ ብሓደ ኸዱ። ናብቲ ኣቦና ዝነገሮ ቦታ ምስ በፅሑ፥ ኣብርሃም ኣብኡ መሰውኢ ሰርሐ፤ ዕንፀይቲ ድማ ፀፍፀፈ፤ ንወዱ ይስሓቅ ኣሲሩ ኸዓ ኣብ መሰውኢ ኣብ ልዕሊ እቲ ዕንፀይቲ ኣንበሮ። ኣብርሃም ድማ ንወዱ ኽሓርዶ ኢዱ ዘርጊሑ ነታ ካራ ሓዛ።

መልኣኽ ኣቦና ግና ካብ ሰማይ “ኣብርሃም! ኣብርሃም!” ኢሉ ፀውዖ። ንሱ ኸዓ “እኒሀኹ” በለ።

ንሱ ድማ ከምዙይ በለ፦ “ኢድካ ኣብ ልዕሊ እቲ ቆልዓ ኣይተንብር፤ ገለ እኳ ኣይትግበሮ፤ ሓደ ወድኻ እኳ ኻባይ ስለ ዘይከላእካ፥ ሕዚ ንዓይ ከም እትፈርሕ ፈሊጠ ኣለኹ።”

ኣብርሃም ድማ ኣዒንቱ ቋሕ ኣቢሉ ረአየ፤ እንሆ ኸዓ ብድሕሪኡ ብኣቕርንቱ ኣብ ቍጥቋጦ ዝተትሓዘ ሓደ ማጕላ ነበረ። ኣብርሃም ከዓ ኸይዱ ነቲ ማጕላ ወሲዱ፥ ኣብ ክንዲ ወዱ ዝቃፀል መስዋእቲ ጌሩ ሰውኦ። ኣብርሃም ድማ ነታ ቦታ እቲኣ “ኣቦ ኸዳሉ እዩ” ኢሉ ሰመያ፤ ትርጕሙ ኸዓ “ኣቦና ኸዳሉ እዩ” ማለት እዩ። ክሳዕ ሎሚ ድማ “ኣብ እምባኡ ክዳሎ እዩ” ይብል ኣሎ። ^b

መልኣኽ ኣቦና ድማ ንኣብርሃም ካብ ሰማይ ካልኣይ ጊዜ ፀውዖ፤

ከምዙይ ድማ በለ፦ “ነዝ ነገር እዙይ ስለ ዝገበርካ፥ ሓደ ወድኻ እኳ ስለ ዘይከላእካ፥ ብርእሰይ እምሕል ኣለኹ፥ ይብል ኣቦና፤ ባሪኸ ኽባርኸካ፥ ዘርእኻ ድማ ከም ከዋኽብቲ ሰማይን ከምቲ ኣብ ገምገም ባሕሪ ዘሎ ሑፃን ኣብዚሐ ኸብዝሖ እየ፤ ዘርእኻ ኸዓ በሪ ፀላእቱ ኽወርስ እዩ፤ ቃለይ ስለ ዝሰማዕካ ኸዓ፥ ኵሎም ህዝብታት ምድሪ ብዘርእኻ ክባረኹ እዮም።”

ኣብርሃም ድማ ናብ መንእሰያት ተመለሰ፤ ተሲኦም ከዓ ብሓደ ናብ ቤርሳቤህ ከዱ። ኣብርሃም ድማ ኣብ ቤርሳቤህ ተቐመጠ።

ድሕሪ እዝ ነገር እዙይ ድማ ንኣብርሃም ከምዙይ ኢሎም ነገርዎ፦ “እንሆ ሚልካ ኸዓ ንሓውካ ናኮር ኣወዳት ወሊዳትሉ ኣላ፦ በዅሪ ዑፅ፥ ሓዉ ቡዝ፥ ኣቦ ኣራም ዝኾነ ቀሙኤል፥ ኬሴድ፥ ሓዞ፥ ጲልዳሽ፥ ዪድላፍ፥ ባቱኤል።” ባቱኤል ድማ ንርብቃ ወለዳ። እዚኣቶም ሸሞንተ ኣወዳት ሚልካ ንናኮር ሓው ኣብርሃም ዝወለደትሎም እዮም። ርኡማ እትብሃል ሰበይቲ ወሰኑ ናኮር ድማ፥ ንጤባሕን ንጋሃምን ንታሃሽን ንማዓካን ወለደት።