Ng'elyep ne Iloskei
Eng' kondaindetap musik. Tyendo ne po utaatyet ne po Daudi. Ye kinyo Doeg Edomindet ak komwachi Saulo, koleenji, “Kagoba Daudi kootap Ahimelek.”
Kityaak Doeg, ne ki koleenji Saulo agobo tisiisyo. Kilewenji ko uu chiito ne chamei ng'aleek che amei ak mang'unegei mogornatennyi, ak kimwaita kole kirepin eng' emaing'ung'—ak ko siikei tyendoindet ko uu keetitap mseituni eng' kootap Kwandanyo.
52 1Amu nee si iloskei inyee agobo yaityet, inyee ne kiim? Tebyei rireenetap Kwandanyo eng' peetuut komugul.
2Chobei ng'elyeptang'ung' yaityet, ko uu rotweet ne kagong', inyee kaberberindet. 3Ichame inyee yaityet kosiir ne myee, ak ng'aleek che ma po iman kosiir ng'alaalet ne po iman.
4Ichame ng'aleek tugul che amei, inyee ng'elyep ne kaberber. 5Ago luulin Kwandanyo koigeny; korepin ak koibun eng' emaing'ung'; kotutin eng' emetap che sabei.
6Keerei piik che po iman ak koiywei; kororyei ineendet, kole, 7“Ogeer chiito, ne ma koyai Kwandanyo irimennyi, ago ki imang'u mogornatennyi ne oo, ak kogimegitu eng' ng'emeetap alak.” 8Ago anee ko uu keetitap mseituni ne eet komyee, eng' kootap Kwandanyo; amang'u rireenetap Kwandanyo koigeny ak koigeny. 9Alasunin koigeny amu ne ki iyai; amang'u kaineng'ung' eng' taitap piiguk che po iman, amu po myee.