Ti Dila a Mangpasindayag iti Bagina
Para iti manangiturong iti kanta. Salmo ti Sirib ni David. Idi simmangpet ni Doeg nga Edomita ket imbagana ken ni Saul, “Napan ni David iti balay ni Ahimelec.”
Naipaay ken Doeg, a nangrekla kadagiti padi ken Saul. Naisao kenkuana kas tao a mangay-ayat kadagiti sao a mangibus ken agtalek iti bukodna a kinabaknang, ket naibaga a maguyod manipud toldana — idinto ta ti mangkanta agtubo a kas kayo ti olibo iti balay ti Amatayo.
52 1Apay a ipasindayagmo ti dakes, sika a mannakabalin? Agtultuloy ti di agbalbaliw nga ayat ni Amatayo iti intero nga aldaw.
2Mangbalbalakad iti pannakadadael ti dilam, a kas iti natadem a pang-ahit, sika a manangallilaw. 3Ad-adda nga ay-ayatem ti dakes ngem ti naimbag, ken ti kinaulbod ngem ti panagsao iti umno.
4Ay-ayatem ti tunggal mangsalsalubsub a sao, sika nga allilaw a dila. 5Ngem rebbaennaka ni Amatayo iti agnanayon; ibiatnaka ken ikkatennaka manipud iti toldam; ukkoennaka manipud iti daga dagiti sibibiag.
6Makitadanto dagiti nalinteg ket agbutengdanto; pagkatawaandanto isuna, a kunada, 7“Kitaenyo ti tao a saan a nangaramid ken ni Amatayo a pagkamanganna, ngem nagtalek iti nagadu a kinabaknangna ket bimmileg babaen iti panangdadaelna kadagiti sabali.” 8Ngem siak ket kas iti kayo ti olibo a nagrang-ay iti balay ni Amatayo; agtalekak iti di agbalbaliw nga ayat ni Amatayo iti agnanayon ken agnanayon. 9Idaydayawkanto iti agnanayon gapu iti inaramidmo; iti sangoanan dagiti matalekmo, namnamaekto ti naganmo, ta naimbag.
