Rũrĩmĩ rwa Mwĩgaatho
Kũrĩ mũtongoria wa aini. Thaburi ya ũũgĩ ya Daudi. Rĩrĩa Doegi ũrĩa Mũedomu ookire akĩĩra Saulũ atĩrĩ, “Daudi nĩathiĩte nyũmba ya Ahimeleku.”
Ĩrerekeire Doegi, ũrĩa wahĩtithirie athĩnjĩri Ngai kũrĩ Saũlũ. Aarĩrio taarĩ mũndũ wendete ciugo cia kũniina na wĩhokete ũtonga wake, na akeerwo atĩ nĩakamomorwo hemainĩ yake—o rĩrĩa mũini arakũra ta mũtamaiyũ nyũmbainĩ ya Ithe witũ.
52 1Nĩkĩĩ wĩgaathaga nĩ ũndũ wa ũũru, wee njamba? Wendo mwĩhokeku wa Ithe witũ ũtũũraga mũthenya wothe.
2Rũrĩmĩ rwaku rũthugundaga mwanangĩko, o ta rwenji rũnoore, wee mũheenania. 3Wendete ũũru gũkĩra wega, na maheeni gũkĩra kwaria ũrĩa kũrĩ kwagĩrĩru.
4Wendete ciugo ciothe iria imeragia, wee rũrĩmĩ rwa maheeni. 5No Ithe witũ nĩagakũmomora nginya tene; nĩagakũnyiita akũrute hemainĩ yaku; nĩagakũmunya kuuma bũrũriinĩ wa arĩa marĩ muoyo.
6Andũ arĩa athingu nĩmakoona meetigĩre; nĩmakamũthekerera, makiuga atĩrĩ, 7“Ta rorai mũndũ ũyũ ũrĩa wagire gũtua Ithe witũ rĩũrĩro rĩake, no nĩehokire ũtonga wake mũnene, na akĩĩgĩĩra hinya na kũniina andũ angĩ.” 8No niĩ haana ta mũtamaiyũ ũrakũra wega thĩinĩ wa nyũmba ya Ithe witũ; nĩndĩhokete wendo mwĩhokeku wa Ithe witũ tene na tene. 9Nĩngũkũgooca tene na tene nĩ ũndũ wa ũrĩa wĩkĩte; mbere ya andũ aku arĩa ehokeku nĩngeehoka rĩĩtwa rĩaku, nĩgũkorwo nĩ rĩega.