Phutani Kora Jiba
Gana cholawta nimite. David laga gyaan laga bhajan ekta. Jitia Edom desh laga Doeg ahhi kene Saul ke koise, “David tu Ahimelek laga ghor te jaise.”
Doeg laga biruddh te, jun Saul ke purohit khan laga kotha koi dise. Taike ekta manuh hisab te kotha kore jun khai phelai diya kotha bhal pai aru nijor laga dhon te bhorsa kore, aru taike koi tai laga tambu pora ukhari diya hobo — jitia gana gawa manuh amar Pitri laga ghor te ekta jolpai ped nisena dangor hoi thake.
52 1He takot thaka manuh, tumi kele biya nimite phutani kori ase? Amar Pitri laga biswasjogto morom tu pura din bhorte thake.
2Tumi laga jiba tu dhar kora churi nisena, khotom kora kaam bonai, he thogai diya manuh. 3Tumi bhal pora biya ke bisi morom kore, aru thik kotha kua pora misa kobole bisi morom kore.
4Tumi sob khotom kora kotha ke morom kore, he thogai diya jiba. 5Kintu amar Pitri pora tumi ke hodai nimite bhangai dibo; Tar pora tumi ke dhori loi kene tumi laga tombu pora ulai dibo; jinda thaka khan laga desh pora Tar pora tumi ke shikor pora ulai dibo.
6Dharmik khan dekhi kene bhoi koribo; tarkhan pora tar ke hasi kene kobo, 7“Hei manuh ke sabi, kun pora amar Pitri ke tar lukai thaka jaga bona nai, kintu tar bisi dhun-sompoti te biswas korise aru dusra khan ke khotom kori kene takot hoise.” 8Kintu moi to amar Pitri laga ghor te ekta bhal pora phuli thaka olive ghas nisena ase; moi hodai aru hodai nimite amar Pitri laga biswasjogto morom te biswas kore. 9Moi apuni ke apuni ki korise etu nimite hodai stuti koribo; apuni laga biswasjogto khan laga usor te moi apuni laga nam te asha koribo, kilemane etu bhal ase.