Kiluul Rabbah ak Koratyi Daudi Kuutweet
Ki yae Joab lugeet eng' Rabbah ye tebee Daudi kaa, ago yuni konyoo laitoryat konam kuutweet. Yeityo lugosyek somok ak Philistiik che oo, kobooto murenet ne ki tinyei morik lo eng' euut ne ki reeny Israel ak kobar weeriitap ne tupcho ne po Daudi.
20 1Ye ki it kasartap kenyiit, kasarta ne cham laitorinik kobendi lugeet, koboi Joab lugeet komong', ak koaragenso emetap lagogap Ammon, yeityo konyo koyiem Rabbah, ago ki tebi Daudi eng' Jerusalem. Ki bar Joab Rabbah ak koluul. 2Ki rep Daudi kuutweet eng' metitap laitoryannywa. Ki yamei keruutik sosom ak muut che po thahabu, ak ki kiinde koit ne po kamanuutyet, ak ki kiinde kuutwonooto eng' metitap Daudi. Ki ip kora Daudi tuguuk che chaang' che ki kiluul eng' nganaseet. 3Ki imut piik che ki mi oriit, ak koboisyee icheek eng' musumenosyek, kariik che kiburburenisye ak aonook. Ki yai Daudi uuniito eng' nganasook tugul che po lagogap Ammon. Kingo let, koweek Daudi kobooto lugeennyi tugul koba Jerusalem.
Kibutyo Kooen eng' Eutap Israel
4Kingo let niito, kobiit kogeny lugeet ak Philistiik eng' Gezer. Ki bar Sibeikai Husatindet Sipai eng' olooto, ne ki po weeriigap Rapha, ak ki kiterteer Philistiik.
5Ki piit kogeny lugeet ak Philistiik. Ki par Elanan weeriitap Jair Lami, ng'eetap kametap Goliat Gitindet, ne ki kergei irumetap ng'otinnyi ak keetit ne oo ne nyigiis. 6Ki piit kogeny lugeet eng' Gath, ole ki mi chiito ne kooi kot, ne ki tinyei morik lo eng' euut age tugul, ak morik lo eng' keeldo age tugul, ki tiptem ak ang'wan tugul. Ki isichei Rapha chiichooto agine. 7Ye kingo taunet Israel, kobar ineendet Jonathan weeriitap Shimea, ng'eetap kametap Daudi. 8Ki isichei pichu Rapha eng' Gath, ak ki kibar icheek Daudi kobooto otwogikyik.