1 ዜና መዋዕል 20

20 ¹ዓመቱ ሲዞር፣ ነገሥታት ወደ ጦርነት በሚዘምቱበት ወቅት፣ ኢዮአብ ሠራዊቱን አስከትቶ ወጣ፤ የአሞናውያንንም ምድር አጠፋ፤ መጥቶም ረባትን ከበበ፤ ዳዊት ግን በኢየሩሳሌም ቀረ። ኢዮአብም ረባትን መትቶ አፈረሳት። ²ዳዊትም ዘውዱን ከንጉሣቸው ራስ ላይ ወሰደ። ክብደቱም ሰባ አምስት ፓውንድ ያህል ወርቅ ነበር፤ በከበረ ድንጋይም ተጌጦ ነበር፤ በዳዊትም ራስ ላይ ተደረገ። ከከተማይቱም እጅግ ብዙ ምርኮ አወጣ። ³በውስጧ የነበሩትንም ሰዎች አስወጥቶ በመጋዝ፣ በብረት ዶማና በመጥረቢያ እንዲሠሩ አደረጋቸው። ዳዊትም በአሞናውያን ከተሞች ሁሉ እንዲሁ አደረገ። ከዚያም ዳዊትና ሠራዊቱ ሁሉ ወደ ኢየሩሳሌም ተመለሱ።

ግዙፋኑ በእስራኤል እጅ ወደቁ

⁴ከዚህ በኋላ በጌዝር ከፍልስጥኤማውያን ጋራ ጦርነት ተነሣ። በዚያን ጊዜ ሑሳታዊው ሲበኮይ ከረፋ ዘሮች አንዱን ሲፔይን ገደለ፤ ፍልስጥኤማውያንም ተገዙ።

⁵ዳግመኛም ከፍልስጥኤማውያን ጋራ ጦርነት ተነሣ። የያዕር ልጅ ኤልሐናን የጌትዊው የጎልያድን ወንድም ልሕሚን ገደለ፤ የጦሩም ዘንግ እንደ ታላቅ የእንጨት ግንድ ወፍራም ነበር። ⁶እንደ ገናም በጌት ጦርነት ተነሣ፤ በዚያም እጅግ ግዙፍ የሆነ ሰው ነበር፤ በእያንዳንዱ እጁ ስድስት ጣቶች፣ በእያንዳንዱም እግሩ ስድስት ጣቶች፣ በጠቅላላው ኻያ አራት ነበሩት፤ እርሱም ደግሞ ለረፋ የተወለደ ነበር። ⁷እስራኤልን በተገዳደረ ጊዜ፣ የዳዊት ወንድም የሳማ ልጅ ዮናታን መትቶ ገደለው። ⁸እነዚህ በጌት ለረፋ የተወለዱ ነበሩ፤ በዳዊትና በባሪያዎቹም እጅ ወደቁ።