Raba Nĩyagwa, na Daudi Akehumba Thũmbĩ ya Ũnene

Joabu nĩwe ũrũaga kũu Raba rĩrĩa Daudi aikarĩte mũciĩ, o na gũkũ mũthamaki agakinya akoya thũmbĩ. Thuutha ũcio nĩ mbaara nini ithatũ na arũme anene mũno a Afilisti, hamwe na mũndũ wa ciara ithathatũ ũrĩa wanyararire Isiraeli, akĩũragwo nĩ mũrũ wa mũrũ wa nyina na Daudi.

Gĩcunjĩ 20.

Na rĩrĩ, hĩndĩ ya kũgarũrũka kwa mwaka, rĩrĩa athamaki moimagaraga magĩthiĩ mbaarainĩ, Joabu akĩruta mbũtũ ya ita, akĩananga bũrũri wa Aamoni, agĩcooka agĩthiũrũrũkĩria Raba akĩmĩrigiicĩria; no Daudi agĩikara Jerusalemu. Nake Joabu akĩhũũra Raba, akĩmĩtharia. Naake Daudi akĩoya thũmbĩ ĩrĩa yarĩ mũtweinĩ wa mũthamaki wao. Yarĩ na ũritũ ta ratũtũ mĩrongo mũgwanja na ĩtaano cia thahabu, na yarĩ nyekĩre ihiga rĩa goro, nayo ĩkĩigĩrĩrwo mũtweinĩ wa Daudi. Ningĩ akĩruta indo nyingĩ mũno cia ndaahi kuuma itũũrainĩ rĩu. Nake akĩruta andũ arĩa maarĩ kuo, akĩmaruta wĩra na mĩthumeno, na icembe cia kĩgera, na mathanwa. Daudi agĩĩka ũguo kũrĩ matũũra moothe ma Aamoni. Thuutha ũcio Daudi na mbũtũ yake yothe ya ita magĩcooka Jerusalemu.

Arũme Arĩa Anene Magwĩra Guokoinĩ kwa Isiraeli

Thuutha wa maũndũ macio, mbaara ĩkĩgĩa na Afilisti kũu Gezeri. Hĩndĩ ĩyo Sibekai ũrĩa Mũhushathi akĩũraga Sipai, ũmwe wa njiaro cia Rafa, nao Afilisti magĩtoorio.

Mbaara ĩkĩgĩa rĩngĩ na Afilisti. Nake Elihanani mũrũ wa Jairi akĩũraga Lahimi, mũrũ wa nyina na Goliathu ũrĩa Mũgiti, ũrĩa mũtĩ wa itimũ rĩake warĩ mũnene ta mũtĩ wa mũtambũki. Ningĩ mbaara ĩkĩgĩa rĩngĩ kũu Gathi, kũrĩa kwarĩ na mũndũ mũnene mũno, warĩ na ciara ithathatũ o guoko, na ciara ithathatũ o kũgũrũ, ciothe hamwe ciarĩ mĩrongo ĩĩrĩ na inya; o nake aarĩ wa rũciaro rwa Rafa. Na rĩrĩa aanyararire Isiraeli, Jonathani mũrũ wa Shimea, mũrũ wa nyina na Daudi, akĩmũũraga. Aya nĩo maaciarĩirwo Rafa kũu Gathi, nao makĩgwa na guoko kwa Daudi na ndungata ciake.