Rabbah Tāhaowa kala Davidna Kuihon Ngahonmi
Davidna shimli pamlakha Joabna Rabbahli rai sai, kha hili awunga rālaga wungkhor khuihaowa. Chiwui thili Philistinewui akho-arek kajuibingli rai kathum sai, Israelli yangkharing kasā pāngmareng tharuruk khalei mi akha zangda, ali Davidwui achinā naona sāthathaowa.
20 1Zingkum chiwui mayo tharan, awungabing rai vangarar khavai khavā atamli, Joabna raimibing thānshoklaga Ammonnaobingwui ngaleili sākazamhaida, chieina vālaga Rabbahli kuinamhaowa, kha Davidva Jerusalemli pamsai. Joabna Rabbahli angararda sātekmihaowa. 2Davidna chiwui awungawui kui eina kuihon chi khui; kuihon chi sinā talent akha kharita, kala aman kasaka ngalung eina sāsai; kala chi Davidwui kuili ngahonmi. Kala keinung chiwui eina ana ot kachungkha ngaponunga. 3Kala ana chili leikasā mibing chi thānshoklaga, tinphā, yorpak kala ngahā eina ot sāngasaka. Ammonnaobingwui keinung saikoralila Davidna chithāda ot sāngasaka. Chiwui thili David kala awui raimibing saikora Jerusalemli latungserhaowa.
Mireitheiwui Naotunbing Israelwui Pāngli Pitāhaowa
4Hiwui thili, Gezerli Philistinenaobingli rai shokkahaina. Chi atamli mireitheiwui naotunbing akha Sippaili Hushathpa Sibbecaina sāthathaowa, kala Philistinenaobing yuiserhaowa.
5Chieina Philistinenaobingli ngararlui. Jairwui naomayara Elhananna Gitpa Goliathwui achinā Lahmili sāthathaowa; awui kazeipa̱ chi thingwui khāng ritnai thāda thichao. 6Chieina Gathli latluida ngararlui. Chili mi kahakva akha zangsai; awui pāng khaninili pāngmareng tharuruk, kala phei khaninili pheimareng tharuruk kakā; mashing maga̱da mati kakāna; ala mireitheiwui naotun eina kharā mina. 7Ana Israelli kachipat tharan, Davidwui achinā Shime-awui naomayara Jonathanna sāthathaowa. 8Athum hi Gathli mireitheiwui naotun kapharā misera; kala athum Davidwui pāngli kala awui raobingwui pāngli thisangserhaowa.
