Rabba Lekei hoba Dawidei Khun Hankukei
Joabei Rabbaa wapyokei, lausikei Dawid je Jerusalema kikei, kheijinei Choba kho hanei Chobaeibü khun langla loukei. Kho phaia Filistiabü ao Rafa ka bakbü shuong yoa wapyo sem kilabü, ikjishou lakbang kümbü müt che ong, aoei Israel khulimbo huiletkei hoba Dawideibü shoumoei hao haitikei.
20 1Po sepeijinei, Choba shuong wapyola haubü jihaphaia, Joabei lakjaibü tan leian longkei hoba Ammonbü kaonyek mautikei, hoba louan Rabba komlepbei, lausikei Dawid je Jerusalema kikei. Hobaje Joabei Rabba to ngümbei hoba kho leilutikukei. 2Dawidei haoeneibü Chobaeibü khun kho haoeibü khu ka sungkei. Kho takanchühbü hon seret khujin kikei, hoba namsek laang chenei sonlailaibü kikei, hoba kho Dawideibü khua hankukei. Hobaje haoei sangnyu ka soletbü peisilei juongnyu sungbakei. 3Hobaje khüto atan kibü müt shuong kho haoei leian longkei, hoba haoen bulatbü, sonnam lipnyinbü hoba namjakbü kümbüa tukosekko phokukei. Kho tegü haoei Ammonbü sangnyu pendou la kümtikei. Kheijinei Dawid si haoeibü mütshuong pendou Jerusalem to longeikei.
Süngsilop Yaangbü Shuong Israelbü Ikto Tuongkei
4Tou kho phaia, Gezera Filistiabü to wapyo kikei. Kho chaloua Hushatbü Sibekaiei Sippai, ao Rafa ka bakbü che, haitikei, hoba Filistiabü letikei.
5Hobaje toukei Filistiabü to nyibou wapyokei. Jaireibü shou Elhananei Gitbü Goliateibü na Lahmi haitikei, hoba haoeibü aubu sembung kho buei jim noubü che tegü kikei. 6Hobaje toukei nyibou Gata wapyokei, khünei mütphon maibü müt che kikei, haoeibü ik jijihama ikjishou lakbang kikei, hoba youakei youjishou lakbang kikei, saoto lei yeman pendouei kikei; haokei Rafa ka bakbü kikei. 7Hobaje haoei Israel to khulimbo huiletbü chaloua, Dawid na Shemeaeibü shou Jonathanei hao haitikei. 8Habü shuong Gata Rafa ka bakbü kikei, hoba haoen Dawid si haoeibü khangenbü shuong ikto atkei.
