Rabba Yabwa amana Tavidi Wuvwata Mukhonzi
Yowabi wánwana mvita ku Rabba bu Tavidi kásala ku nzu, kaasi kinga wátula mu kubonga mukhonzi. Buna mvita tatu yi batu banene ba bisi Filisiti, muna wawu mutu wa milembu sambanu wuna wálewula Kiseledi amana wáhondwa kwena mwana wa phangi wa Tavidi.
20 1Muna kuvutuka kwa mvula, tangwa bakyamvu bisi kwenda mu mvita, Yowabi wánata dibuka dya basuta amana wázimbisa tsi ya bisi Amoni, kunima wísa amana wázyungila Rabba, kaasi Tavidi wásala ku Yelusalemi. Yowabi wábeta Rabba amana wámwanga yawu. 2Tavidi wábonga mukhonzi ku mutwa wa kyamvu wa bawu. Kitesu kyawu kyákala kya kilo makumatatu wa wolu amana wákala yi ditadi dya thalu, amana básyawu ku mutwa wa Tavidi. Wánata phi muluta wa lawu ku mbanza. 3Wánata batu ba yawu amana wábasya mu kisalu ni minsengu, ni bisengu, ni mabaga. Tavidi wáhanga phila mosi kwena mbanza zoosu za bisi Amoni. Kunima Tavidi yi dibuka dyandi dyosu dya basuta bávutuka ku Yelusalemi.
Bantu Banene Babwa mu Koku kwa Kiseledi
4Kunima dya bwabuna, mvita yátukula yi bisi Filisiti ku Ngezeli. Muna tangwa dina, Sibekayi mwisi Husa wáhonda Sipayi, mosi wa butuka dya Rafa, amana bisi Filisiti balemvuka.
5Mvita yátukula hika yi bisi Filisiti. Elanani mwana wa Yayili wáhonda Lami, phangi wa Ngoliyati mwisi Ngati, wuna muswangina wa dyonga dyandi wákala wanene hanga mudikita miti. 6Mvita yátukula hika ku Ngati, kuna kákala yakala mosi wanene, wuna wákala yi milembu sambanu mu kosu koku yi milembu sambanu mu kosu kulu, makumodi yi ya mu kutanga kwawu; yandi phi wábutukila kwena Rafa. 7Tangwa kalewula Kiseledi, Yonatani mwana wa Simeya, phangi wa Tavidi, wámuhonda. 8Baba bábutukila kwena Rafa ku Ngati, amana bábwa mu koku kwa Tavidi yi basadi bandi.
