Buweti bwa Tavidi bwavutulwa ni tsoni
Tavidi wátuma mambu ma kyadi kwena kinga kyamona kya bisi Amoni, amana bapfumu bandi báthela bambambala ni basandi; bakululwa tsuki amana bakwatwa tsoni. Mana máyandika hanga buweti mákituka mvita ya tombi zodi ni makalu ma mvita ma kusumba, amana másuka ni bisi Alami bámanga kusadisa bisi Amoni hika.
19 1Kunima dya bilumbu bikwawu, Nakasi, kyamvu kya bisi Amoni, wáfwa, amana mwana wandi wákituka kyamvu mu fulu kyandi. 2Tavidi wuzimbudi: «Yisongila buweti kwena Hanuni mwana wa Nakasi, mukuma tata wandi wásongila buweti kwena meni.» Buna Tavidi wáthuma bambambala mu kumuheka kikesa kikuma kya tata wandi. Kaasi buna basadi ba Tavidi bátula mu tsi ya bisi Amoni, kwena Hanuni, mu kumuheka kikesa, 3Bapfumu ba bisi Amoni bázimbwala kwena Hanuni: «Tavidi mu kyedika wisi zitisa tata waku mu kutuma kwena ngeyi batu ba kuheka kikesa? Ka basadi bandi bisaku kwena ngeyi mu kusanda, mu kutotisa, amana mu kuyiba tsi?» 4Hanuni wákwata basadi ba Tavidi, wábakulula tsuki, wázenga miledi mya bawu kati-kati ha bibunu bya bawu, amana wábatinisina. 5Buna bázimbwala kwena Tavidi kikuma kya batu bana, wáthuma bambambala mu kukwenda batundakana, mukuma báyuka tsoni kimakulu. Kyamvu kyazimbudi: «Salenu ku Yediko tii yi kuna zyevu zenu zakóla, buna lwavutuka.»
6Buna bisi Amoni bámona ni bákituka nsudi yambi kwena Tavidi, Hanuni yi bisi Amoni báthuma mbongu za palata za kitesu kya matoni makumatatu yi nana mu kusumba makalu ma mvita yi bakwa baphunda ku Alami-Nakalayimi, ku Alami-Maaka, yi ku Zoba. 7Básumba makalu ma mvita mafunda makumatatu yi modi, kumosi yi kyamvu kya Maaka yi baphumbulu bandi, bana bísa amana bátula nganda ku ndambu yatalana yi Medeba. Bisi Amoni bákutakana tuka mu mbanza za bawu amana bálubuka mu kukwenda nwana. 8Buna Tavidi wáyuka mamana, wáthuma Yowabi yi kibuka kyosu kya baphumbulu. 9Bisi Amoni bálubuka amana báyilama mvita ku mwelu wa mbanza, bwosu bakyamvu bana bísa bátelama bawu-mosi ku kilanga.
10Yowabi wámona ni mvita yáyilama kumuzyeta ku thwala yi ku manima, buna wásola baphumbulu ba bukheti ba Kiseledi amana wábayilamisa kuna thwala ya bisi Alami. 11Baphumbulu bana basala wábahana mu moku ma phangi wandi Abisayi, amana báyilama kuna thwala ya bisi Amoni. 12Yowabi wuzimbudi: «Yuka ni bisi Alami baluti meni mu ngolu, ngeyi waphúlula; yuka ni bisi Amoni baluti ngeyi mu ngolu, meni yikútanina. 13Kalenu ngolu; tunwananu mu kikesa kikuma kya batu betu yi kikuma kya mbanza za Tata wetu, amana Tata wetu kasala mana mamboti kwena mesu mandi.»
14Amana Yowabi yi baphumbulu bana bakala yi yandi bákwenda ku thwala mu kunwana yi bisi Alami, amana bátina ku thwala yandi. 15Buna bisi Amoni bámona ni bisi Alami bátina, bawu phi bátina ku thwala ya Abisayi phangi wandi amana bákota mu mbanza. Buna Yowabi wávutuka ku Yelusalemi.
16Buna bisi Alami bámona ni Kiseledi wánunga bawu, báthuma bambambala amana bánata bisi Alami bana bakala ku sambwa dikwawu dya nzadi Efalata, kumosi yi Sofaki, pfumu wa kibuka kya baphumbulu ba Hadadeza, ku thwala ya bawu. 17Tavidi bámuzimbwala mamana; wákutakanisa Kiseledi dyosu, wásabuka Yolutani, wísa kuna thwala ya bawu, amana wayílama mvita. Tavidi wayílama mvita kuna thwala ya bisi Alami, amana banwana yi yandi. 18Bisi Alami bátina ku thwala ya Kiseledi. Tavidi wáhonda bakwa makalu ma mvita mafunda tsambwadi yi baphumbulu ba malu mafunda makumaya, amana wáhonda Sofaki, pfumu wa kibuka kya baphumbulu ba bawu. 19Buna basadi ba Hadadeza bámona ni Kiseledi wánunga bawu, bávutula ngemba yi Tavidi amana bamusadila. Bisi Alami bazodiku hika kusadisa bisi Amoni.
