David mphrü menga die sala retu
David Amonmi kedeo süpümi ce mphrü meka khapü choyimiko ketsüsü, vele pü kezhoko choyimiko salimi zi po; uko humi tila, uko khüne kebü revu va. Mphrü lü mükheo süo kemezi nyi celü theri, gari zhokhri zü, de tsosü, mu Aram-e Amon süsari khrühi khava.
19 1Süsalü tüso kekro kevasa, Amon miko kedeo Nahash süta, mu pü nu pü medü kedeo zota. 2David poti, “I Nahash nu Hanun ce mphrü meka, kekrelamori pü poe a ce mphrü mekasü.” Süsa David pü po la pü thelü melu kesü ketola choyimiko ketsüsü. Vele David ceta miko Amon miko cejülü, Hanun ce, pü thelü melu ketola vori, 3Amon miko kezhoko Hanun ce poti, “David-e neko thelü melu kesü miko ketsü die no po zapozale kethozo me? Pü ceta miko cejü phukemo, müka va, mu mekhrü zode nco vori mome?” 4Hanun David ceta miko tüyita, uko hupü vate, uko khüne u kebü chotalü revu va, mu uko sala ketsü. 5Süsa uko thüma hiko la David ce posü, uko kukri menga tila, pü uko mhatho ketola choyimiko ketsüsü. Kedeo poti, “Neko ta Jericholü ba, neko mhükü kroku süsalü, sala retute.”
6Süsa Amon miko uko David ce kemenga keti zota tila, Hanun mu Amon miko gura mu gari-ko zhokhri ketola cemu ton thiri tütha Aram-naharaim, Aram-maacah, mu Zobah celü ketsüsü. 7Uko gari 32,000 zhokhri, mu Maacah kedeo pü thipaheko sade, uko vori Medeba kemetsu ce bata. Amon miko u nadekolü kenguyi die theri thi ketola prarita. 8Süsa David süo seyi, pü Joab mu theri thi miko mütü paheko ketsüsü. 9Amon miko prarita die nade kharülü theri thi ketola kero dathüsü, vele vori kütao kedeko yilü u khapü dathü bata.
10Joab theri thi pü mhüjü mu pü thotho ce zota tila, pü Israel ceta kevepü chosü die Aram miko ce dathüsü. 11Pü kekreko thipaheko pü sazü Abishai be dolü meta, mu uko Amon miko ce dathüsü. 12Joab poti, “Mhace Aram-e a dülü kuyi lize, a süphra süte; mhace Amon-e n dülü kuyi lize, I n süphra. 13Kümüve süte; ha thümako mu ha Po nadeko la ha mphrü thi die theri thi khe, mu ha Poe pü mhüjülü keve kethao thiyite.”
14Süsa Joab mu pü zü kütao thipaheko Aram miko theri thi ketola mekrokuyi, mu uko pü mhüjülü dipü bi. 15Aram dipü ngokesüce, Amon miko sade pü sazü Abishai mhüjülü dipü die nadelü tavo zü. Süsa Joab ta Jerusalemlü vori.
16Süsa Aram miko Israelmi uko kuyi bata tila, uko choyimiko ketsüsü die Euphrates kükreco Aram miko zü vori, Hadadezer pahe kezhoo Shopüh uko mhüjülü ba. 17David ce posü; pü Israelmi mütü kenguyi die, Jordan kezholü kita, uko ce vori, mu theri thi ketola dathüsü. David Aram miko ce theri thi ketola dathüsü, mu uko pü zü theri thi. 18Aram miko Israelmi mhüjülü dipü. David uko gari paheko 7,000 mu uphe thipaheko 40,000 dokhriva, süsalü uko pahe kezhoo Shopüh dokhriva. 19Süsa Hadadezer ceta miko Israelmi uko kuyi bata tila, uko David zü kenü thi die pü shoyi thi. Aram Amon miko khrühi ketola ngoyi nyümo.
