1ይ ዜና 19 FHB Father's Heart Bible™

19 ¹ድሕሪዙይ፥ ናዖስ ንጉስ ደቂ ኣሞን ሞተ፤ ወዱ ኸዓ ኣብ ክንድኡ ነገሰ። ²ዳዊት ድማ “ከምቲ ኣቦኡ ንኣይ ሰናይ ዝገበረለይ፥ ንሓኖን ወዲ ናዖስ ሰናይ ክገብረሉ እየ” በለ። ብዛዕባ ኣቦኡ ኸፀናንዖ ድማ ልኡኻት ሰደደሉ። እቶም ኣገልገልቲ ዳዊት ግና ኸፀናንዕዎ ናብ ሃገር ደቂ ኣሞን ናብ ሓኖን ምስ መፁ፥ ³እቶም መሳፍንቲ ደቂ ኣሞን ንሓኖን “ዳዊት ነቦኻ ብሓቂ ኣኽቢሩዶ ዘፀናንዑ ሰዲዱልካ ይመስለካ? ኣገልገልቱ ነታ ምድሪ ኽምርምሩን ክግልብጡን ክስልዩንዶ ናባኻ ኣይመፁን?” በልዎ። ⁴ሓኖን ድማ ንኣገልገልቲ ዳዊት ሒዙ፥ ላፅዮም፥ ፍርቂ ኽዳውንቶም ክሳዕ ማዕጠቖኦም ቈሪፁ፥ ሰደዶም። ⁵ብዛዕባ እቶም ሰባት ንዳዊት ምስ ነገርዎ፥ እቶም ሰብኡት ኣዝዮም ሓፊሮም ነበሩ እሞ፥ ክቕበልዎም ልኡኻት ለኣኸሎም። ንጉስ ከዓ “ጭሕምኹም ክሳዕ ዝበቍል ኣብ ኢያሪኮ ፅንሑ፤ ሽዑ ድማ ተመለሱ” በለ።

⁶ደቂ ኣሞን ድማ ብዳዊት ከም ዝተፀልኡ ምስ ረአዩ፥ ሓኖን ምስ ደቂ ኣሞን ኮይኑ ካብ ኣራም ናሃራይምን ካብ ኣራም መዓካን ካብ ሶባን ሰረገላታትን ፈረሰኛታትን ዝቖፅሩ ኣስታት ሰላሳን ሸሞንተን ሽሕ ኪሎ ግራም ብሩር ሰደዱ። ⁷ሰላሳን ክልተን ሽሕ ሰረገላታት ቈፀሩ፤ ንጉስ መዓካን ህዝቡን ድማ መፂኦም ኣብ መንፅር ሜድባ ሰፈሩ። ደቂ ኣሞን ከዓ ካብ ከተማታቶም ተኣኪቦም ክዋግኡ ወፁ። ⁸ዳዊት እዙይ ምስ ሰምዐ፥ ንኢዮኣብ ምስ ኵሉ ሰራዊት ጀጋኑ ሰደደ። ⁹ደቂ ኣሞን ድማ ወፂኦም ኣብ ኣፍ ደገ እታ ከተማ ንውግእ ተሰለፉ፤ እቶም ዝመፁ ነገስታት ግና ኣብ በረኻ በይኖም ቖሙ።

¹⁰ኢዮኣብ ድማ እቶም ፀላእቱ ብቕድሚኡን ብድሕሪኡን ንውግእ ከም ዝተሰለፉ ምስ ረአየ፥ ካብ እቲ ዝበለፀ ሰራዊት እስራኤል ሓርዩ፥ ኣብ ቅድሚ ሶርያውያን ኣሰለፎም። ¹¹ነቶም ዝተረፉ ሰራዊት ድማ ኣብ ኢድ ኣቢሳይ ሓዉ ኣትሐዞም፤ ንሳቶም ከዓ ኣብ ቅድሚ ደቂ ኣሞን ተሰለፉ። ¹²ኢዮኣብ ድማ ከምዙይ በለ፦ “ሶርያውያን ንኣይ እንተ ሰዓሩኒ፥ ንስኻ ኣድሕነኒ፤ ደቂ ኣሞን ንዓኻ እንተ ሰዓሩኻ ድማ፥ ኣነ ኸድሕነካ እየ። ¹³ጽናዕ፤ ምእንቲ ህዝብናን ምእንቲ ከተማታት ኣቦናን ብትብዓት ንዋጋእ፤ ኣቦና ኸዓ ኣብ ቅድሚኡ ፅቡቕ ዝመሰሎ ይግበር።”

¹⁴ሽዑ ኢዮኣብን እቶም ምስኡ ዝነበሩ ሰራዊትን ንሶርያውያን ክዋግእዎም ቀረቡ፤ ንሳቶም ድማ ካብ ቅድሚኡ ሃደሙ። ¹⁵ሶርያውያን ከም ዝሃደሙ ምስ ረኣዩ ድማ፥ ደቂ ኣሞንውን ካብ ቅድሚ ኣቢሳይ ሓዉ ሃዲሞም ናብታ ከተማ ኣተዉ፤ ኢዮኣብ ድማ ናብ ኢየሩሳሌም መፀ።

¹⁶ሶርያውያን ብእስራኤል ከም ዝተስዓሩ ምስ ረአዩ፥ ልኢኾም ነቶም ኣብ ሰገር ኤፍራጥስ ዝነበሩ ሶርያውያን ኣውፅእዎም፤ ሾፋክ ሓለቓ ሰራዊት ኣድርኣዛር ድማ ኣብ ቅድሚኣቶም ነበረ። ¹⁷እዙይ ንዳዊት ምስ ነገርዎ፥ ንዅሉ እስራኤል ኣኽተተ፤ ንዮርዳኖስ ተሳጊሩ ናባቶም መፀ፤ ንውግእ ድማ ተሰለፉ። ዳዊት ድማ ኣብ ቅድሚ ሶርያውያን ንሰራዊቱ ኣሰለፈ፥ ንሳቶም ከዓ ተዋግእዎ። ¹⁸ሶርያውያን ድማ ካብ ቅድሚ እስራኤል ሃደሙ። ዳዊት ከዓ ካብ ሶርያውያን ሸውዓተ ሽሕ ሰብ ሰረገላን ኣርብዓ ሽሕ እግረኛ ሰብኡትን ቀተለ፤ ንሾፋክ ሓለቓ ሰራዊቶም ድማ ቐተሎ። ¹⁹ኣገልገልቲ ኣድርኣዛር ድማ እስራኤል ከም ዝሰዓሮም ምስ ረአዩ፥ ምስ ዳዊት ተዓሪቖም ተገዝእዎ፤ ሶርያውያን ከዓ ድሕሪዙይ ንደቂ ኣሞን ክረድኡ ኣይፈተዉን።