Dawid temeim maksü agi meyipa aru
Dawidi tair Ammon chuba dang pa süneptsütsü osangbenertem yok, saka pa tongtipurtemi osangbenertem lima lazüktsü kilirtem ta aja; parnok maksüdaktsür, pei süoshi teperem nung tesadang rangtok aser yokadok. Temeim agi tetenzükba, kor touzük jaokba den anatip rara aküm, aser Aram nungeri tang Ammon yaritsü mamanger nung atem.
19 1Iba sülen Ammon nunger chuba Nahas asü, aser par chir pa melena chuba. 2Dawidi ashi, “Nahas jabaso Hanun dang ni temeim sayutsü, kechiaser tebui kü dang temeim sayu.” Anungji Dawidi pa tebu indang pa süneptsütsüba osangbenertem yok. Saka Dawid kilirtem Ammon chirtem limai, Hanun dangi, pa süneptsütsü arudang, 3Ammon chir tongtipurtemi Hanun dang ashi, “Dawidi ne dangi tesüneptsürtem yoka, nebu dang atangji akhümtsübu sayur ta nai bilemer asü? Pei kilirtem iba lima bushitsü, laodaktsütsü, aser lazüktsü asoshi ne dangi meyok no?” 4Anungji Hanuni Dawid kilirtem apu, parnok südoktsü, parnok süoshi teperem nung tesadang rangtok, aser parnok yokadok. 5Kodang parnoki nisungtem indang Dawid dang ashi, pai parnok ajurutsü osangbenertem yok; kechiyong parnok kanga akseta liasü. Chubai parnok dang ashi, “Nenok bangsemo meyi tashi Yeriko nung liang, idangji meyipa arung.”
6Kodang Ammon chirtemi Dawid nem parnok tsübur kümogo ta angudang, Hanun aser Ammon chirtemi Aram-naharaim, Aram-maaka, aser Zoba nungi talungtsü aser kor temeranger jaoktsü asoshi taribi touzük mori noklang semer-ti alia metsü. 7Parnoki talungtsü meyi semerana jaok, aser Maaka chuba aser pa nübur denji, parnok arua Medeba tejaklen anen. Aser Ammon chirtem pei yimtitem nungi sentepa tongbangi adok. 8Kodang Dawidi aji angashi, pai Yoab aser raraba nisung temeranger telok ajak yok. 9Ammon chirtem adoka yimti ailen süngkhüm nung tongbang taren noktak, saka aruba chubatem alu nung mesüngi noktak.
10Kodang Yoabi pei tejaklen aser tesülen nungi tongbang pa anema noktakba angudang, pai Israel teshimtet tajungtiba nisung shimtet, aser aramesoa anema tongbang taren noktak. 11Tanüngba nübur pai pa tenu Abishai kübok ayu, aser parnok Ammon chirtem anema tongbang noktak. 12Yoabi ashi, “Aramesoa ni asoshi onsara tashi tulu süra, nai ni yaritsü; saka Ammon chirtem na asoshi onsara tashi tulu süra, nia na yaritsü. 13Mulung tashia liang; asen nübur aser asen Tebu yimtitem asoshi asenoki mulung tashia raraang, aser asen Tebui pei tejak nung tajungba inyakang.”
14Anungji Yoab aser pa den aliba nübur aramesoa anema tongbang anasa aru, aser parnoki pa tsüngdang jena ao. 15Aramesoa jena ogo ta Ammon chirtemi angudang, parnoki pa tenu Abishai tsüngdang jena, aser yimti nung kao. Idangji Yoab Yirusalemi aru.
16Aramesoa Israel madang parnok chinudaktsüogo ta angudang, parnoki osangbenertem yoka, Eufrata ayong atena aliba aramesoa anitet, aser Hadadezer temeranger telok arkotong Shophak parnok anir aru. 17Dawid dang metetdaktsü; pai Israel ajak külemi sentepdaktsü, Yordan atener parnok anema arua tongbang noktak. Dawidi aramesoa anema tongbang taren noktak, aser parnoki pa den rara. 18Aramesoa Israel madang ajen. Dawidi parnok talungtsü nung amenertem meyi tenet aser tetsüng temeranger meyi lir tepset, anungji parnok temeranger telok arkotong Shophak tepset. 19Hadadezer kilirtemi Israel madang parnok chinudaktsüogo ta angudang, parnoki Dawid den yimjung yanglu, aser pa tenzük. Aramesoa joko Ammon chirtem yaritsü memulung.