1 Mga Cronicas 19

19 ¹Paglabay sa pipila ka panahon, namatay si Nahash nga hari sa mga Ammonhanon, ug ang iyang anak nahimong hari puli kaniya. ²Miingon si David, “Magpakita ako ug kaayo kang Hanun nga anak ni Nahash, kay ang iyang amahan nagpakita kanako ug kaayo.” Busa nagpadala si David ug mga mensahero aron paghupay kaniya tungod sa iyang amahan. Apan sa pag-abot sa mga sulugoon ni David sa yuta sa mga Ammonhanon, ngadto kang Hanun, aron paghupay kaniya, ³miingon ang mga komandante sa Ammon kang Hanun, “Gipasidunggan ba gayod ni David ang imong amahan pinaagi sa pagpadala kanimo ug mga maghuhupay? Dili ba ang iyang mga sulugoon mianhi kanimo aron sa pagsusi, sa paglumpag, ug sa pagpaniid sa yuta?” ⁴Gidakop ni Hanun ang mga sulugoon ni David, gikiskisan niya sila, giputol niya ang ilang mga bisti sa tunga diha sa ilang hawak, ug gipalakaw niya sila. ⁵Sa dihang gisuginlan nila si David mahitungod sa mga tawo, nagpadala siya ug mga mensahero aron sa pagsugat kanila, kay naulawan sila pag-ayo. Miingon ang hari, “Pabilin kamo sa Jerico hangtod nga motubo ang inyong mga bungot, unya mobalik kamo.”

⁶Sa dihang nakita sa mga Ammonhanon nga nahimo silang kabaho ngadto kang David, nagpadala si Hanun ug ang mga Ammonhanon ug mga katloan ug walo ka tonelada nga plata aron mag-abang ug mga karwahe ug mga mangangabayo gikan sa Aram-naharaim, sa Aram-maaca, ug sa Zoba. ⁷Nag-abang sila ug 32,000 ka karwahe, lakip ang hari sa Maaca ug ang iyang mga kasundalohan, nga miabot ug nagkampo atbang sa Medeba. Nagtigom ang mga Ammonhanon gikan sa ilang mga siyudad ug migawas aron makiggubat. ⁸Sa dihang nadungog kini ni David, gipadala niya si Joab ug ang tibuok kasundalohan sa mga manggugubat. ⁹Migawas ang mga Ammonhanon ug naglinya alang sa gubat diha sa ganghaan sa siyudad, samtang ang mga hari nga miabot nagbarog nga nag-inusara sa kapatagan.

¹⁰Nakita ni Joab nga ang gubat gitakda batok kaniya, sa atubangan ug sa luyo, busa gipili niya ang labing maayong mga sundalo sa Israel ug gilinya niya sila batok sa mga Aramehanon. ¹¹Ang nahibilin nga mga sundalo gibutang niya ubos sa iyang igsoon nga si Abisai, ug naglinya sila batok sa mga Ammonhanon. ¹²Miingon si Joab, “Kon ang Aram makadaog kanako, luwasa ako; kon ang Ammon makadaog kaninyo, luwason ko kamo. ¹³Magmalig-on kamo; makiggubat kita nga maisogon alang sa atong katawhan ug sa mga siyudad sa atong Amahan, ug buhaton unta sa atong Amahan ang maayo sa iyang mga mata.”

¹⁴Unya si Joab ug ang mga sundalo nga uban kaniya miasdang aron makiggubat sa mga Aramehanon, ug nangalagiw sila sa iyang atubangan. ¹⁵Sa pagkakita nga nangalagiw ang Aram, nangalagiw usab ang mga Ammonhanon sa atubangan ni Abisai nga iyang igsoon ug misulod sa siyudad. Unya mibalik si Joab sa Jerusalem.

¹⁶Sa dihang nakita sa mga Aramehanon nga napildi sila sa Israel, nagpadala sila ug mga mensahero ug gipagula ang mga Aramehanon gikan sa unahan sa Eufrates, inubanan ni Sopac, nga komandante sa kasundalohan ni Hadadezer, nga mao ang nangulo kanila. ¹⁷Gisuginlan si David; gitigom niya ang tibuok Israel, mitabok sa Jordan, miabot batok kanila, ug naglinya alang sa gubat. Naglinya si David alang sa gubat batok sa mga Aramehanon, ug nakiggubat sila kaniya. ¹⁸Nangalagiw ang mga Aramehanon sa atubangan sa Israel. Gipatay ni David ang 7,000 sa ilang mga tigkarwahe ug ang 40,000 nga mga sundalong magtiniil, ug unya gipatay niya si Sopac, nga komandante sa ilang kasundalohan. ¹⁹Sa dihang nakita sa mga sulugoon ni Hadadezer nga napildi sila sa Israel, nakigdait sila kang David ug nag-alagad kaniya. Dili na buot ang Aram nga motabang sa mga Ammonhanon.