1 நாளாகமம் 19

19 ¹சிலகாலம் சென்றபின், அம்மோனியரின் ராஜாவாகிய நாகாஸ் மரித்தான்; அவனுடைய குமாரன் அவனுடைய இடத்தில் ராஜாவானான். ²தாவீது, “நாகாசின் குமாரனாகிய ஆனூனுடைய தகப்பன் எனக்குத் தயவு காண்பித்தபடியால், நானும் அவனுக்குத் தயவு காண்பிப்பேன்” என்று சொல்லி, அவனுடைய தகப்பனைக்குறித்து அவனுக்கு ஆறுதல் சொல்ல ஸ்தானாபதிகளை அனுப்பினான். தாவீதின் ஊழியக்காரர் ஆனூனுக்கு ஆறுதல் சொல்ல அம்மோனியரின் தேசத்திற்கு வந்தபோது, ³அம்மோனியரின் அதிபதிகள் ஆனூனை நோக்கி, “உமக்கு ஆறுதல் சொல்லுகிறவர்களை உம்மிடத்தில் அனுப்பினதினால், தாவீது உம்முடைய தகப்பனை மெய்யாகவே கனம்பண்ணுகிறான் என்று நினைக்கிறீரோ? இந்த தேசத்தைச் சோதித்து அறியவும், கவிழ்த்துப்போடவும், வேவுபார்க்கவும் அல்லவோ அவனுடைய ஊழியக்காரர் உம்மிடத்தில் வந்தார்கள்?” என்றார்கள். ⁴அப்பொழுது ஆனூன் தாவீதின் ஊழியக்காரரைப் பிடித்து, அவர்களைச் சிரைத்து, அவர்களுடைய வஸ்திரங்களை இடுப்பு மட்டும் பாதியாய்த் தறித்துப்போட்டு, அவர்களை அனுப்பிவிட்டான். ⁵அந்த மனுஷரைக்குறித்து சிலர் தாவீதுக்கு அறிவித்தபோது, அவர்கள் மிகவும் வெட்கப்பட்டிருந்தபடியால், அவர்களைச் சந்திக்க அவன் ஸ்தானாபதிகளை அனுப்பினான். ராஜா, “உங்கள் தாடி வளரும்வரைக்கும் எரிகோவிலே தங்கியிருந்து, பின்பு திரும்பிவாருங்கள்” என்று சொல்லச்சொன்னான்.

⁶அம்மோனியர் தாங்கள் தாவீதுக்கு அருவருப்பானார்கள் என்று கண்டபோது, ஆனூனும் அம்மோனியரும் அரம்நகராயீமிலும், அரம்மாக்காவிலும், சோபாவிலுமிருந்து இரதங்களையும் குதிரைவீரரையும் கூலிக்கு அமர்த்த ஏறக்குறைய முப்பத்தெட்டு டன் வெள்ளியை அனுப்பினார்கள். ⁷அவர்கள் முப்பத்தீராயிரம் இரதங்களையும், மாக்காவின் ராஜாவையும் அவனுடைய படைகளையும் கூலிக்கு அமர்த்தினார்கள்; அவர்கள் வந்து மேதேபாவுக்கு எதிரே பாளயமிறங்கினார்கள். அம்மோனியரும் தங்கள் பட்டணங்களிலிருந்து ஏகமாய்க் கூடி யுத்தத்திற்குப் புறப்பட்டார்கள். ⁸தாவீது இதைக் கேள்விப்பட்டபோது, யோவாபையும் பராக்கிரமசாலிகளின் சர்வ சேனையையும் அனுப்பினான். ⁹அம்மோனியர் புறப்பட்டு, பட்டணத்தின் வாசலண்டையிலே யுத்தத்திற்கு அணிவகுத்து நின்றார்கள்; வந்திருந்த ராஜாக்களோ வெளியிலே தனியாக நின்றார்கள்.

¹⁰தனக்கு முன்னும் பின்னும் யுத்தம் எழும்பினதை யோவாப் கண்டபோது, இஸ்ரவேலிலே தெரிந்துகொள்ளப்பட்ட சிறந்த சேவகர் யாவரையும் தெரிந்தெடுத்து, சீரியருக்கு எதிராக அணிவகுத்து நிறுத்தினான். ¹¹மீதியான ஜனத்தைத் தன் சகோதரனாகிய அபிசாயின் கையிலே ஒப்புவித்தான்; அவர்கள் அம்மோனியருக்கு எதிராக அணிவகுத்து நின்றார்கள். ¹²யோவாப்: “சீரியர் என்னை மேற்கொண்டால் நீ எனக்கு உதவிசெய்; அம்மோனியர் உன்னை மேற்கொண்டால் நான் உனக்கு உதவிசெய்வேன். ¹³திடன்கொள்; நமது ஜனத்திற்காகவும் நமது எங்கள் பிதாவின் பட்டணங்களுக்காகவும் தைரியமாய் யுத்தம்பண்ணுவோமாக; எங்கள் பிதா தமது பார்வைக்கு நலமானதைச் செய்வாராக” என்றான்.

¹⁴அப்பொழுது யோவாபும் அவனோடிருந்த ஜனமும் சீரியருக்கு விரோதமாய் யுத்தம்பண்ணப் பாய்ந்து சேர்ந்தார்கள்; அவர்கள் அவனுக்கு முன்பாக ஓடிப்போனார்கள். ¹⁵சீரியர் ஓடிப்போனதை அம்மோனியர் கண்டபோது, அவர்களும் தங்கள் சகோதரனாகிய அபிசாய்க்கு முன்பாக ஓடி, பட்டணத்திற்குள் புகுந்தார்கள். பின்பு யோவாப் எருசலேமுக்குத் திரும்பிவந்தான்.

¹⁶சீரியர் தாங்கள் இஸ்ரவேலால் முறிய அடிக்கப்பட்டதைக் கண்டபோது, ஸ்தானாபதிகளை அனுப்பி, ஐபிராத்து நதிக்கு அப்பாலிருந்த சீரியரை வரவழைத்தார்கள்; அதாதேசரின் சேனாபதியாகிய சோப்பாகு அவர்களுக்குத் தலைவனாயிருந்தான். ¹⁷இது தாவீதுக்கு அறிவிக்கப்பட்டபோது, அவன் இஸ்ரவேலனைத்தையும் கூட்டிக்கொண்டு, யோர்தானைக் கடந்து, அவர்களிடத்தில் வந்து, அவர்களுக்கு எதிராக யுத்தத்திற்கு அணிவகுத்து நின்றான். தாவீது சீரியருக்கு எதிராக யுத்தத்திற்கு அணிவகுத்தபோது, அவர்கள் அவனோடே யுத்தம்பண்ணினார்கள். ¹⁸சீரியர் இஸ்ரவேலுக்கு முன்பாக ஓடிப்போனார்கள்; தாவீது சீரியரின் இரதவீரரில் ஏழாயிரம்பேரையும், காலாட்படையில் நாற்பதினாயிரம்பேரையும் கொன்று, அவர்களுடைய சேனாபதியாகிய சோப்பாகையும் கொன்றுபோட்டான். ¹⁹அதாதேசரின் ஊழியக்காரர் தாங்கள் இஸ்ரவேலால் முறிய அடிக்கப்பட்டதைக் கண்டபோது, தாவீதோடே சமாதானம்பண்ணி, அவனுக்குக் கீழ்ப்பட்டார்கள்; சீரியர் அப்புறம் அம்மோனியருக்கு உதவிசெய்ய மனதில்லாதிருந்தார்கள்.