Rabba Lao aser Dawidi Korang Sema
Yoabi Rabba nung rara, saka Dawid yimti nung amung, kechiyong yangji chuba aru korangji agitsü. Idangji Filistia aso tulutem den rara asem adok, yangji temeyong trokrok akaba nisung ka Israel anema ayongzüka Dawid tenu Shimea chiri tepset.
20 1Küm shilangdang, chubatem tongbangi aotsü mapang nung, Yoabi temeranger telok anir adoka Ammon chirtem lima samatsü, anungji arua Rabba anema makbangya, saka Dawidi Yirusalem nung amung. Yoabi Rabba kangshi aser aji raksa. 2Dawidi parnok chuba kolak nungi korangji agi. Iba odangbaji hon seret semer liasü aser senti lung ka agi yangluba liasü; aji korangji Dawid kolak nung ayu. Pai ano yimti nungi makzükba oset jenti bener aru. 3Pai yimti nung aliba nisungtem anir adoka süngrangtsü, merang mejeptetba aser pu agi mapa inyakdaktsü. Dawidi Ammon nunger yimti ajak dang samesa inyak. Idangji Dawid aser pa temeranger telok ajak Yirusalemi shilang.
Aso Tulutem Israel Ket nung Lao
4Iba sülen Gezer nung Filistia nunger den rara adok. Iba mapang nung Hushat nunger Sibekai, aso tulutem nungi jakzükba Sippai tepset, aser Filistia nunger agi.
5Filistia nunger den tanaben rara adok. Jair jabaso Elhanani Git nunger Goliat tenu Lahmi tepset, pa nülakji süng alem onsara ka amai liasü. 6Gat nung tanaben rara adok. Yangji nisung soja tulu ka liasü, shiba teka shia nung temeyong trokrok, aser temepu shia nung temesüla trokrok alir, metsürpezü keta ajak agi. Shiba-a aso tulutem nungi jakzük. 7Kodang pai Israel anema ayongzük, Dawid tenu Shimea jabaso Yonathani pa tepset. 8Item Gat nung aso tulutem nungi jakzükba liasü, aser parnok Dawid aser pa tenzükertem ket nung lao.