Me basika na mukanda
Dibuku

Laba Me Bwa mpe Davidi Me Lwata Yimpu ya Kintinu

Yowabe ke nwana mvita na Laba ntangu Davidi bikanaka na nzo, kasi awa ntinu kwizaka baka yimpu ya kintinu. Na manima, bamvita tatu na bantu ya dikanda ya Lafa ya ba-Filiseti, kintwadi na muntu mosi ya minu sambanu na konso diboko yina fingaka bantu ya Isayeli mpe mwana-nkazi ya Davidi kufwaka yandi.

Kapu 20.

Na nsuka ya mvula, ntangu yina bantinu ke kwendaka na mvita, Yowabe basisaka binwani ya mvita mpe bebisaka yinsi ya ba-Amone. Na manima, yandi kwizaka zunga mbanza Laba, kasi Davidi bikanaka na Yelusalemi. Yowabe bulaka Laba mpe bwisaka yawu. Davidi bakaka yimpu ya kintinu na yintu ya ntinu ya bawu. Yimpu yango vwandaka ya wolo, yawu vwandaka na dema ya bakilo makumi nsambwadi na tanu (75), mpe ba tulaka na yawu ditadi ya ntalu. Ba tulaka yimpu yango na yintu ya Davidi. Yandi katulaka mpe mvwilu mingi na mbanza yina. Yandi basisaka bantu yina vwandaka na mbanza yina, mpe pesaka bawu kisalu na bisengo ya kuzenga, na bisengo ya kupasula matadi, mpe na basoka. Davidi salaka mutindu mosi na bambanza nyonso ya ba-Amone. Na manima ya yina, Davidi na binwani nyonso ya yandi vutukaka na Yelusalemi.

Bantu ya Mitela ya Yinda Ke Bwa na Diboko ya Isayeli

Na manima, mvita salamaka na ba-Filiseti kuna na Ngezele. Na ntangu yina, Sibekayi, mu-Wusa, kufwaka Sipayi, muntu ya dikanda ya Lafa, mpe ba-Filiseti kubwaka na yisi ya lutumu.

Mvita salamaka dyaka na ba-Filiseti. Elanane, mwana ya Yayile, kufwaka Lami, mpangi ya Ngolyate, mu-Ngate. Dyonga ya yandi vwandaka na yinti ya nene mutindu mabaya ya nene. Mvita salamaka dyaka kuna na Ngate. Kuna vwandaka na bakala mosi ya nene mingi. Yandi vwandaka na misapi sambanu na konso diboko, mpe misapi sambanu na konso dikulu. Lutangu nyonso vwandaka makumi zole na yiya (24). Yandi mpe butukaka na Lafa. Ntangu yandi fingaka bantu ya Isayeli, Yonatane, mwana ya Simeya mpangi ya Davidi, fwaka yandi. Bantu yayi butukaka na Lafa kuna na Ngate, mpe bawu kubwaka na diboko ya Davidi mpe ya bisadi ya yandi.