Ng'eetyi Puunyoot Daudi Koiit Israel
Ki ng'eet Puunyoot king'eetyi Daudi koiit lugosyekyik; ki sesen Joab ago kiim ng'olyootap laitoryat. Ki me piik eliphuusyek tiptem eng' kiptuienyoito kotomo koger Daudi angeetap Kwandanyo ak kole keechiirek ma ki yae kiy. Ki al rwanyut eng' kolsennyi komugul, konyil koochi ne ma kigur ineendet kiy.
Ng'alaali Kwandanyo eng' mustarisyek 10–12, 15
21 1Ki ng'eet Puunyoot agobo Israel, ak king'eetyi Daudi koiit Israel. a a v1 Puunyoot ko kainet ne igoochini FHB Setani, puunyoondit ne po kabuuset ne ng'ewe piigap Kamuktaindet. 2Koleenji Daudi Joab ak kiptainigap lugeet, “Oui, oiit Israel kotogosta Beer-sheba agoi Dan, ak omwaiwo, si anai koiitennywa.”
3Koleenji Joab, “Ingotesi Kwandanyo piiguk konyil pogol! Kiptaiyandennyu laitoryat, tos ma otwogigap kiptaiyandennyu tugul chuuto? Amune soomei kiptaiyandennyu niito? Amune ne itesyi tengekto eng' Israel?”
4Ago ki kiim ng'olyootap laitoryat Joab, koba anyun Joab, kobwanune Israel tugul, yeityo konyo Jerusalem. 5Ki koochi Joab Daudi koitetap piik: Ki tinyei Israel tugul piik milioni agenge ak eliphuusyek pogol che tinyei rotoogap chok, ak Judah ko eliphuusyek pogol ang'wan ak sosom tisap che tinyei rotoogap chok. 6Ma ki iit Lawi ak Benjamin, amu ki wechei Joab ng'atuutyetap laitoryat.
7Ki ek niito ne ya miising' eng' taitap Kwandanyo, kowiir anyun Israel. 8Yeityo koleenji Daudi Kwandanyo, “Kaayai tengekto ne oo miising' eng' kaayai niito. Ara anyun, asoomin ale iste tengektap otwogindeng'ung', amu kaayai eng' perberyo miising'.”
9Ak ki ng'alaalji Kwandanyo Gad, keerindetap Daudi, koleenji:
10Ui ak imwachi Daudi, “Mwaei Kwandang'ung': Agoonin tuguuk somok—ilewen agenge eng' icheek, ak ayaun niito.”
11Ki nyo Gad ole mi Daudi, koleenji ineendet, “Mwaei Kwandanyo: ‘Ilewenjigei, 12anan kenyiisyek somok che po rubeet, anan arawek somok che itoorun eng' taitap puuniguk kota kobwonjin rotwetap chok, anan peetuusyek somok che po rotwetap Kwandanyo: koroito eng' emet, ak malaikaiyatap Kwandanyo ne ng'emei eng' kiwotosyegap Israel tugul.’ Ara anyun ilewen waluunet ne aweektoe ne ki iyookwo.”
13Koleenji Daudi Gad, “Aragen miising'. Angobutyi eutap Kwandanyo, amu eechen miising' rireenosyekyik—ago ma eutap chii.”
14Ki iyookyi anyun Kwandanyo koroito Israel, ak ki pek piigap Israel eliphuusyek sosom.
15Ak ki iyook Kwandanyo malaikaiyat kole kong'em Jerusalem; ago kota ng'emei malaikaiyat, ki keer Kwandanyo kowal kabwaatutikyik agobo yaityet, ak koleenji malaikaiyat, “Kagoyam! Ingosiis eung'ung'.” Ki mi malaikaiyatap Kwandanyo ole neegitee rwanyutap Ornan Jebusindet.
16Ki tabendo Daudi ak ki keer malaikaiyatap Kwandanyo kotononi kwenutap ng'wony ak kipsengwet, konam rotwetap chok ne kang'us eng' eunnyi, kotokyi Jerusalem. Yeityo ki butyi Daudi ak poisyek, che kolaach kuniok, ng'wony togoochikwak. 17Ki leenji Daudi Kwandanyo, “Tos ma anee ne ki ng'at koit piik? Anee ne ki yai tengekto ak koyai yaityet ne oo. Ago keechiirechu—nee ne ki koyai? Ee Kwandanyo, ingonam eung'ung' anee ak koot ne po kwandanyu, ago ma piiguk eng' koroito.” b b v17 Daudi, laitoryat ne riibindet, soome kole kobutyi mugetuut ineegei kosiir piikyik—ne koboorto Jeso, Riibindet ne Myee, ne ki machei koib ineegei mugetutyetap piikyik.
Kiteech Kaptisisyet; Kowol Kwandanyo eng' Maat
18Ki leenji malaikaiyatap Kwandanyo Gad kole komwachi Daudi kotogosta koteekyi Kwandanyo kaptisisyet eng' rwanyutap Ornan Jebusindet. 19Ki togoste anyun Daudi ko uu ng'olyootap Gad, ne ki mwa eng' kainetap Kwandanyo.
20Ki koweeksei Ornan ak ki keer malaikaiyat; ki unygei weeriikyik ang'wan che ki mi ak ineendet. Ki boorse nganuuk. 21Ye kingo nyo Daudi ole mi Ornan, ki keer Ornan Daudi, kogetu eng' rwanyut, ak kogutung'ji Daudi togeennyi ng'wony.
22Koleenji Daudi Ornan, “Igoochi komostap rwanyut ni, si ateekyi Kwandanyo kaptisisyet eng' ineendet; igoochi eng' aldaet tugul, si kosiis koroito eng' piik.”
23Koleenji Ornan Daudi, “Inam. Ingoyai kiptaiyandennyu laitoryat kiit ne keerei kole myee. Keero, agoonin eiik che po kagoochinet ne kibeelei, ak tuguuk che kiboorsee koek kweenik, ak nganuuk che po kagoochinetap peek—agoonin tugul.”
24Ago koleenji laitoryat Daudi Ornan, “Achicha, aal iman eng' aldaet tugul. Ma anam ne po inyee si akochi Kwandanyo, anan koe kagoochinet che kibeelei che ma kakosorwo kiy.”
25Ki goito anyun Daudi Ornan thahabu ne uu paundisyek taman ak mut agobo komostanooto. 26Ki teech Daudi kaptisisyet yooto koigoochi Kwandanyo, koeng'ji kagoochinet che kibeelei ak kagoochinet che po kaalyeet, ak ki kuur Kwandanyo, ne ki wolji eng' maat ne punu kipsengwet eng' kaptisisyetap kagoochinet ne kibeelei.
27Yeityo ki ng'at Kwandanyo malaikaiyat, ak ki weekyi rotwennyi eng' choget.
28Eng' sainooto, ye ki keer Daudi kole ki wolji Kwandanyo eng' rwanyutap Ornan Jebusindet, ki eng'ji yooto. 29Ki yai Musa tabendoitap Kwandanyo eng' timdo; ki tonone niito, kobooto kaptisisyetap kagoochinet ne kibeelei, eng' komostap toroor ne po Gibeon. 30Ma ki imuuchi Daudi koba yooto kocheeng' Kwandanyo, amu ki iywei rotwetap malaikaiyatap Kwandanyo.