Mi eng' bukuit

1 Ateptap Peetuusyek 22 FHB Father's Heart Bible™

Kiistoi 15% eng' kiy ne iale korook →
Bukuit

Keteng'at Komosta; Chobchinsegei Daudi agobo Hekaluut

Ki guure Daudi rwanyonooto kole kootap Kwandanyo, yeityo koboisyen kimnateennyi ne po let kotumda koik, iron, sugunonik, ak taragonik agobo weeriit ne lakweet ak ne tagonat. Ki mwa iman amune ne ma muuchi koteech ineegei: ki itumda korotiik che chaang'.

Ng'alaali Kwandanyo eng' mustari 8

Sura 22.

Ki le Daudi, “Nguno ko kootap Kwandanyo, ak nguno ko kapkorosutap koristoet ne beelei ne po Israel.”

Ki ng'at Daudi si keyum toek che mi Israel, ak konde piik che waei koik si kowai koik che kiwai agobo teekseetap kootap Kwandanyo. Ki chobchin Daudi kariik che chaang' agobo misumarigap kurgaisyek ak ratenik, ak sugunonik che chaang' che ma imuuchi keweigei, ak kimurtoinigap taragonik che ma imuuchi koiit, amu ki koipchi Sidonik ak Tyro Daudi pagoinigap taragonik che chaang'. Amu ki le Daudi, “Weeriinnyu Solomon ko lakweet ak ne ma tagonae tuguuk, ak koot ne kiteekyi Kwandanyo konyolu koek ne oo miising', ne tagunoot, ak ne kiywei eng' emet komugul. Achobchinsegei agobo niito.” Ko uu nooto, ki chobchin Daudi tuguuk che chaang' miising' kotom komee.

Yeityo koguur Solomon weeriinnyi, ak kong'at si koteech koot agobo Kwandanyo ne po Israel. Ki leenji Daudi Solomon, “Weeriinnyu, ki mi muguleldanyu si ateech koot agobo kainetap Kwandanyu.

Ki nyonewo ng'olyootap Kwandanyo, kole, ‘Ki itumda korotiik che chaang' ak ibar lugoosyek che oo. Ma iteeche koot agobo kainennyu, amu ki itumda korotiik che chaang' miising' eng' ng'wony eng' tainnyu.’

Kisichin weeriit, chiito ne po meng'otet; agoochi ineendet meng'otet eng' puunikyik tugul che ritegei ineendet. Keguure kainennyi Solomon; agoochi Israel kaalyeet ak meng'otet eng' peetuusyekyik. a a v9 Kaina Solomon ko karaaki kaalyeet—meng'otet ak kaalyeet ne ki kayom Kwandanyo koigoochi eng' laitornatennyi. Iteeche koot agobo kainennyu. Koek weeriinnyu, ak anee aek kwandanyi. Agimiit ng'echerennyi ne po laitornatet eng' Israel koigeny. Nguno, weeriinnyu, ingomi Kwandanyo kobooten, si isuldoi ak iteech kootap Kwandang'ung', ko uu ye kimwa agobo inyee. Ago, ingoguuch Kwandanyo utaatyet ak naet, ye konde inyee kiptaiyandetap Israel, si iriip ng'atuutyetap Kwandang'ung'. Yeityo iberuurok, ngot iriipkei miising' kaneetisyosyek ak kirwoogutik che ki ng'at Kwandanyo Musa agobo Israel. Kimitu ak inyiganitu. Meiywei anan itoptoben. Keero, eng' poisyet ne oo kachobchin kootap Kwandanyo keruutik che neegitee 4,000 che po thahabu, ak keruutik che neegitee 34,000 che po fedha, ak sugunonik ak kariik che ma imuuchi keweigei—mi che chaang' miising'. Kachobchin kobendi keetiik ak koik; imuuchi itesyi icheek. Itinye piik che chaang' che boisyei kobooten: piik che waei koik, teegik, musogik, ak piik tugul che ng'oomen eng' poisyet tugul. Che ng'oomen eng' thahabu, fedha, sugunonik, ak kariik che ma imuuchi koiit. Ng'eet ak iboisyee; ingomi Kwandanyo kobooten.”

Ki ng'at kobendi Daudi kiptainigap Israel tugul si kotoret Solomon weeriinnyi, koleenji,

“Tos ma mi Kwandang'wong' kobooten? Tos ma kagoguuchak meng'otet eng' komoswek tugul? Amu kagonde piigap emet eng' eunnyu, ak kagoterteer emet eng' taitap Kwandanyo ak piikyik. Nguno, onde muguleldang'wong' ak niinweekwok si ocheeng' Kwandang'wong'. Ong'eetyee ak oteeche ole-tiliil ne po Kwandanyo, si koip moingetap arorutyennyi ak tuguukyik che tiliil eng' koot ne kiteekyi kainennyi.”