1 IZikhronike 22

22 ¹UDavide wathi: “Le yindlu kaBaba wethu, futhi leli yi-altare lomnikelo wokushiswa lakwa-Israyeli.”

²UDavide wayala ukuba abafokazi ababesezweni lakwa-Israyeli baqoqwe, wabe esebeka ababazi bamatshe ukuba babaze amatshe abaziweyo okwakha indlu kaBaba wethu. ³UDavide walungisa insimbi eningi yezipikili zezicabha zamasango neyezihibe, nethusi eliningi elingenakukalwa, ⁴nezingodo zomsedari ezingenakubalwa, ngokuba abaseSidoni nabaseTire baletha kuDavide izingodo zomsedari ngobuningi. ⁵Ngokuba uDavide wathi: “Indodana yami uSolomoni isencane futhi ayikavivinywa, kepha indlu eyakhelwa uBaba wethu kumele ibe nkulu ngempela, idume, ikhazimule kuwo wonke amazwe. Ake ngiyilungiselele.” Ngakho uDavide walungisa izimpahla eziningi kakhulu engakafi.

⁶Wayesebiza uSolomoni indodana yakhe, wamyala ukuba akhele uBaba wethu wakwa-Israyeli indlu. ⁷UDavide wathi kuSolomoni: “Ndodana yami, bekusenhliziyweni yami ukwakha indlu yegama likaBaba.

⁸Izwi likaBaba wethu lafika kimi, lathi: ‘Uchithe igazi eliningi, walwa izimpi ezinkulu. Awuyikwakha indlu yegama lami, ngokuba uchithe igazi eliningi kangaka emhlabeni phambi kwami.’

⁹Uyakuzalelwa indodana, umuntu wokuphumula; ngiyakumphumuza ezitheni zakhe zonke ezimzungezile. Igama lakhe liyakuba nguSolomoni; ngiyakunika u-Israyeli ukuthula nokuzola ezinsukwini zakhe. ^a a v9 Igama elithi uSolomoni lisho ukuthula—ukuphumula nokuzola uBaba wethu athembisa ukukunika ngokubusa kwakhe. ¹⁰Yena uyakwakha indlu yegama lami. Uyakuba yindodana yami, mina ngibe nguyise. Ngiyakuqinisa isihlalo sakhe sobukhosi phezu kuka-Israyeli kuze kube phakade. ¹¹Manje, ndodana yami, sengathi uBaba wethu angaba nawe, ukuze uphumelele, wakhe indlu kaBaba wakho, njengoba asho ngawe. ¹²Kuphela, sengathi uBaba wethu angakunika ukuhlakanipha nokuqonda lapho ekubeka phezu kuka-Israyeli, ukuze ugcine umthetho kaBaba wakho. ¹³Khona-ke uyakuchuma, uma ugcina ngokucophelela izimiso nezahlulelo uBaba wethu azinika uMose ngo-Israyeli. Yiba namandla, ube nesibindi. Ungesabi, ungapheli amandla. ¹⁴Bheka, ngomzamo omkhulu ngilungisele indlu kaBaba wethu amathani egolide acishe abe ngu-4 000, namathani esiliva acishe abe ngu-34 000, nethusi nensimbi okungenakukalwa—kuningi kangaka. Ngilungisile nezingodo namatshe; ungakwandisa lokho. ¹⁵Unezisebenzi eziningi kanye nawe: ababazi bamatshe, abakhi, ababazi bemithi, nazo zonke izinhlobo zezingcweti ezinolwazi kuwo wonke umsebenzi. ¹⁶Ezinekhono ngegolide, ngesiliva, ngethusi, nangensimbi okungenakubalwa. Sukuma usebenze; sengathi uBaba wethu angaba nawe.”

¹⁷UDavide wabuye wayala bonke abaholi bakwa-Israyeli ukuba basize uSolomoni indodana yakhe, wathi:

¹⁸“UBaba wenu akakho yini nani? Akaniphumuzanga yini nxazonke? Ngokuba abantu baleli zwe ubanikele esandleni sami, leli zwe linqotshiwe phambi kukaBaba wethu naphambi kwabantu bakhe. ¹⁹Manje bekani inhliziyo yenu nomphefumulo wenu ekufuneni uBaba wenu. Sukumani nakhe indlu engcwele kaBaba wethu, ukuze nilethe umphongolo wesivumelwano sakhe nezitsha zakhe ezingcwele endlini eyakhelwe igama lakhe.”