1 ዜና መዋዕል 22

22 ¹ዳዊትም፣ “የአባታችን ቤት ይህ ነው፤ ለእስራኤልም የሚቃጠለው መሥዋዕት መሠዊያ ይህ ነው” አለ።

²ዳዊትም በእስራኤል ምድር ያሉትን ባዕዳን እንዲሰበሰቡ አዘዘ፤ የአባታችንንም ቤት ለመሥራት የተጠረቡ ድንጋዮችን የሚጠርቡ ድንጋይ ጠራቢዎችን ሾመ። ³ዳዊትም ለበር መዝጊያዎች የሚሆን ችንካርና መጋጠሚያ ብዙ ብረት አዘጋጀ፤ በሚዛንም የማይመዘን ብዙ ናስ አዘጋጀ፣ ⁴ቊጥርም የሌለው የዝግባ እንጨት አዘጋጀ፤ ሲዶናውያንና ጢሮሳውያን ለዳዊት ብዙ የዝግባ ግንድ አምጥተውለት ነበርና። ⁵ዳዊት እንዲህ ብሎ ነበርና፤ “ልጄ ሰሎሞን ገና ወጣትና ያልተፈተነ ነው፤ ለአባታችን የሚሠራው ቤት ግን እጅግ ታላቅ፣ ዝነኛና በየምድሩ ሁሉ የከበረ ሊሆን ይገባዋል። እኔም ለዚህ ላዘጋጅ።” ስለዚህ ዳዊት ከመሞቱ በፊት እጅግ ብዙ ቊሳቊስ አከማቸ።

⁶ከዚያም ልጁን ሰሎሞንን ጠርቶ ለእስራኤል አባታችን ቤት እንዲሠራ አዘዘው። ⁷ዳዊትም ሰሎሞንን እንዲህ አለው፤ “ልጄ ሆይ፣ ለአባቴ ስም ቤት ለመሥራት በልቤ ዐስቤ ነበር።

⁸የአባታችንም ቃል እንዲህ ሲል ወደ እኔ መጣ፤ ‘ብዙ ደም አፍስሰሃል፤ ታላላቅ ጦርነቶችንም ተዋግተሃል። በፊቴ በምድር ላይ ብዙ ደም ስላፈሰስህ፣ ለስሜ ቤት አትሠራም።’

⁹የዕረፍት ሰው የሆነ ወንድ ልጅ ይወለድልሃል፤ በዙሪያው ካሉ ጠላቶቹ ሁሉ ዕረፍት እሰጠዋለሁ። ስሙም ሰሎሞን ይሆናል፤ በዘመኑም ለእስራኤል ሰላምና ጸጥታ እሰጣለሁ። ^a a v9 ሰሎሞን የሚለው ስም ሰላም ማለት ነው፤ ይኸውም አባታችን በንግሡ ለመስጠት ቃል የገባው ዕረፍትና ጸጥታ ነው። ¹⁰እርሱ ለስሜ ቤት ይሠራል። እርሱም ልጄ ይሆናል፤ እኔም አባቱ እሆናለሁ። የመንግሥቱንም ዙፋን በእስራኤል ላይ ለዘላለም አጸናለሁ። ¹¹አሁንም ልጄ ሆይ፣ አባታችን ከአንተ ጋራ ይሁን፤ ተሳክቶልህም ስለ አንተ እንደ ተናገረው የአባትህን ቤት ትሠራ ዘንድ። ¹²ብቻ አባታችን በእስራኤል ላይ በሚሾምህ ጊዜ፣ የአባትህን ሕግ ትጠብቅ ዘንድ ጥበብንና ማስተዋልን ይስጥህ። ¹³አባታችን ሙሴን ለእስራኤል ያዘዘውን ሥርዐትና ፍርድ በጥንቃቄ ብትጠብቅ፣ ያን ጊዜ ትከናወንልሃለህ። ጽና፤ ደፋርም ሁን። አትፍራ፤ ተስፋም አትቁረጥ። ¹⁴እነሆ፣ በታላቅ ድካም ለአባታችን ቤት ወደ 4,000 ቶን የሚጠጋ ወርቅ፣ 34,000 ቶን ያህል ብር፣ በሚዛንም የማይመዘን ናስና ብረት አዘጋጅቻለሁ፤ እጅግ ብዙ ነውና። እንጨትንና ድንጋይንም አዘጋጅቻለሁ፤ አንተም በእነርሱ ላይ ትጨምራለህ። ¹⁵ከአንተም ጋራ ብዙ ሠራተኞች አሉ፤ ድንጋይ ጠራቢዎች፣ ግንበኞች፣ አናጺዎች፣ በየሥራው ሁሉ የተካኑ ልዩ ልዩ የእጅ ባለሞያዎች። ¹⁶በወርቅ፣ በብር፣ በናስና በብረት ሥራ ከቊጥር በላይ የተካኑ ናቸው። ተነሥተህ ሥራ፤ አባታችንም ከአንተ ጋራ ይሁን።”

¹⁷ዳዊትም የእስራኤልን መሪዎች ሁሉ ልጁን ሰሎሞንን እንዲረዱት እንዲህ ሲል አዘዛቸው፤

¹⁸“አባታችሁ ከእናንተ ጋራ አይደለምን? በየአቅጣጫውስ ዕረፍት አልሰጣችሁምን? የምድሪቱን ሕዝብ በእጄ አሳልፎ ሰጥቷልና፤ ምድሪቱም በአባታችንና በሕዝቡ ፊት ተገዝታለች። ¹⁹አሁንም አባታችሁን ትሹ ዘንድ ልባችሁንና ነፍሳችሁን አኑሩ። ተነሥታችሁም የኪዳኑን ታቦትና የተቀደሱ ዕቃዎቹን ለስሙ ወደ ተሠራው ቤት ታስገቡ ዘንድ የአባታችንን መቅደስ ሥሩ።”