1 ዜና መዋዕል 23

23 ¹ዳዊት ሸምግሎ ዕድሜው በገፋ ጊዜ፣ ልጁን ሰሎሞንን በእስራኤል ላይ አነገሠው። ²የእስራኤልን መሪዎች ሁሉ ከካህናትና ከሌዋውያን ጋራ አንድ ላይ ሰበሰበ። ³ዕድሜያቸው ሠላሳ ዓመትና ከዚያ በላይ የሆኑ ሌዋውያን ተቈጠሩ፤ ጠቅላላ ቍጥራቸውም ሠላሳ ስምንት ሺህ ነበር። ⁴ከእነዚህም ውስጥ ሃያ አራት ሺህ የአባታችንን ቤት ሥራ እንዲቈጣጠሩ ተመደቡ፤ ስድስት ሺህ ደግሞ ሹማምትና ዳኞች ነበሩ። ⁵አራት ሺህ በረኞች ነበሩ፤ አራት ሺህም ዳዊት ለምስጋና በሠራቸው የሙዚቃ መሣሪያዎች አባታችንን አመሰገኑ።

⁶ዳዊትም እንደ ሌዊ ልጆች፣ እንደ ጌድሶን፣ ቀዓትና ሜራሪ ከፋፍሎ በየክፍሉ መደባቸው።

የጌድሶን ጎሳዎች

⁷ከጌድሶናውያን፦ ለዓዳንና ሳሚ። ⁸የለዓዳን ልጆች፦ አለቃው ይሒኤል፣ ቀጥሎም ዜታምና ኢዮኤል፣ በድምሩ ሦስት። ⁹የሳሚ ልጆች፦ ሰሎሞት፣ ሐዚኤልና ሐራን፣ ሦስት። እነዚህ የለዓዳን የቤተ ሰብ አለቆች ነበሩ። ¹⁰የሳሚም ልጆች፦ ያሃት፣ ዚና፣ ይዐውስና ብሪዓ። እነዚህ አራቱ የሳሚ ልጆች ነበሩ። ¹¹ያሃት አለቃ፣ ዚዛ ሁለተኛ ነበር፤ ይዐውስና ብሪዓ ጥቂት ልጆች ስለነበሯቸው እንደ አንድ ቤተ ሰብ፣ እንደ አንድ ምድብ አብረው ተቈጠሩ።

የቀዓት ጎሳዎች

¹²የቀዓት ልጆች፦ አምራም፣ ይስሃር፣ ኬብሮንና ዑዝኤል፣ በድምሩ አራት። ¹³የአምራም ልጆች፦ አሮንና ሙሴ። አሮን እርሱና ልጆቹ ለዘላለም እጅግ ቅዱስ የሆኑትን ነገሮች እንዲቀድሱ፣ በአባታችን ፊት መሥዋዕት እንዲያቀርቡ፣ እንዲያገለግሉትና በስሙ ለዘላለም እንዲባርኩ ተለየ። ¹⁴ሙሴ ግን የአባታችን ሰው ነበር፤ ልጆቹም በሌዊ ነገድ ተቈጠሩ። ¹⁵የሙሴ ልጆች፦ ጌርሾምና ኤሊኤዘር። ¹⁶የጌርሾም ልጆች፦ አለቃው ሻቡኤል። ¹⁷የኤሊኤዘር ልጆች፦ አለቃው ርህብያ። ኤሊኤዘር ሌላ ልጅ አልነበረውም፤ የርህብያ ልጆች ግን እጅግ ብዙ ነበሩ። ¹⁸የይስሃር ልጆች፦ አለቃው ሰሎሚት። ¹⁹የኬብሮን ልጆች፦ አለቃው ይሪያ፣ ሁለተኛው አማርያ፣ ሦስተኛው ያሃዝኤል፣ አራተኛውም ይቀምዓም። ²⁰የዑዝኤል ልጆች፦ አለቃው ሚካና ሁለተኛው ይሺያ።

የሜራሪ ጎሳዎች

²¹የሜራሪ ልጆች፦ መሐሊና ሙሢ። የመሐሊ ልጆች፦ አልዓዛርና ቂስ። ²²አልዓዛር ወንዶች ልጆች ሳይኖሩት፣ ሴቶች ልጆች ብቻ ትቶ ሞተ፤ ስለዚህ ዘመዶቻቸው የሆኑት የቂስ ልጆች አገቧቸው። ²³የሙሢ ልጆች፦ መሐሊ፣ ዔድርና ይሪሞት፣ በድምሩ ሦስት።

²⁴እነዚህ በቤተ ሰባቸው የተመደቡ የሌዊ ልጆች፣ በስማቸው የተመዘገቡ የቤተ ሰብ አለቆች ነበሩ፤ እነርሱም ዕድሜያቸው ሃያ ዓመትና ከዚያ በላይ ሆነው በአባታችን ቤት ያገለገሉ ናቸው። ²⁵ዳዊት እንዲህ ብሎ ነበርና፤ “የእስራኤል አምላክ አባታችን ለሕዝቡ ዕረፍት ሰጥቷል፤ በኢየሩሳሌምም ለዘላለም ይኖራል። ²⁶ስለዚህ ሌዋውያን ድንኳኑንም ሆነ የአገልግሎት ዕቃዎቹን ሁሉ ከእንግዲህ አይሸከሙም።” ²⁷በዳዊት በእነዚህ የመጨረሻ ትእዛዛት መሠረት ሌዋውያን ከሃያ ዓመትና ከዚያ በላይ ሆነው ተቈጠሩ። ²⁸ተግባራቸውም የአባታችንን ቤት በማገልገል የአሮንን ልጆች መርዳት ነበር፤ ይኸውም አደባባዮቹንና ክፍሎቹን መንከባከብ፣ ቅዱሳን ነገሮችን ሁሉ ማንጻትና በአባታችን ቤት ያለውን ማንኛውንም ሥራ መሥራት ነበር። ²⁹የገጸ ኅብስቱን፣ ለእህል መባ የሚሆነውን በጎ ዱቄት፣ ያለ እርሾ የተሠራውን ቂጣ፣ መጋገርንና ማቡኰስን እንዲሁም የብዛትና የመጠን ልኬቶችን ሁሉ ይጠባበቁ ነበር። ³⁰በየማለዳውም አባታችንን ለማመስገንና ለማወደስ ይቆሙ ነበር፤ እንዲሁም በማታ፣ ³¹በሰንበት፣ በወር መባቻና በተወሰኑ በዓላት ለአባታችን በሚቀርበው የሚቃጠል መሥዋዕት ሁሉ ላይ፣ በሚፈለገው ቍጥር መሠረት፣ ዘወትር በአባታችን ፊት ያገለግሉ ነበር። ^a a v31 የወር መባቻ በእያንዳንዱ አዲስ የዕብራውያን ወር መጀመሪያ ላይ የሚከበር ወርሃዊ በዓል ነበር። ³²የመገናኛውን ድንኳን አደራ፣ የመቅደሱን አደራ፣ እንዲሁም የወንድሞቻቸውን የአሮንን ልጆች አደራ በአባታችን ቤት አገልግሎት ይጠብቁ ነበር።