1 நாளாகமம் 23

23 ¹தாவீது வயது முதிர்ந்து அநேக வருடங்கள் வாழ்ந்திருந்தபோது, தன் குமாரனாகிய சாலொமோனை இஸ்ரவேலின்மேல் ராஜாவாக்கினான். ²அவன் இஸ்ரவேலின் தலைவர்கள் அனைவரையும், ஆசாரியர்களையும், லேவியரையும் ஒன்றாய்க் கூட்டினான். ³முப்பது வயதும் அதற்கு மேற்பட்ட வயதுமுள்ள லேவியர் எண்ணப்பட்டார்கள்; அவர்களுடைய மொத்த எண்ணிக்கை 38,000 பேராயிருந்தது. ⁴இவர்களில், எங்கள் பிதாவின் ஆலயத்தின் வேலையை மேற்பார்வையிட 24,000 பேரும்; 6,000 பேர் அதிகாரிகளும் நியாயாதிபதிகளுமாயிருந்தார்கள். ⁵4,000 பேர் வாசல் காவலாளர்களும், 4,000 பேர் துதிசெய்வதற்காக தாவீது செய்த வாத்தியங்களால் எங்கள் பிதாவைத் துதித்தார்கள்.

⁶தாவீது அவர்களை லேவியின் குமாரராகிய கெர்சோன், கோகாத், மெராரி என்பவர்களுக்கேற்ப பிரிவுகளாகப் பிரித்தான்.

கெர்சோனின் வம்சங்கள்

⁷கெர்சோனியரில்: லாதானும் சிமெயியும். ⁸லாதானின் குமாரர்: தலைவனாகிய யெகியேல், பின்பு சேத்தாம், யோவேல் ஆகிய மூன்று பேர். ⁹சிமெயியின் குமாரர்: செலோமோத், அசியேல், ஆரான் ஆகிய மூன்று பேர். இவர்கள் லாதானின் வம்சத் தலைவர்களாயிருந்தார்கள். ¹⁰சிமெயியின் குமாரர்: யாகாத், சீனா, யெகூஷ், பெரியா என்பவர்களே. இந்த நான்கு பேரும் சிமெயியின் குமாரர். ¹¹யாகாத் தலைவனும், சீசா இரண்டாவதுமாயிருந்தான்; யெகூஷுக்கும் பெரியாவுக்கும் குமாரர் சிலரே இருந்தபடியால், அவர்கள் ஒரே வம்சமாக, ஒரே பணிக்குழுவாக ஒன்றாய் எண்ணப்பட்டார்கள்.

கோகாத்தின் வம்சங்கள்

¹²கோகாத்தின் குமாரர்: அம்ராம், இத்சார், எப்ரோன், ஊசியேல் ஆகிய நான்கு பேர். ¹³அம்ராமின் குமாரர்: ஆரோனும் மோசேயும். மகா பரிசுத்தமான பொருட்களைப் பரிசுத்தப்படுத்தும்படிக்கும், எங்கள் பிதாவின் சந்நிதியில் காணிக்கை செலுத்தும்படிக்கும், அவருக்கு ஊழியம் செய்யும்படிக்கும், அவருடைய நாமத்தினால் என்றென்றைக்கும் ஆசீர்வதிக்கும்படிக்கும், ஆரோனும் அவன் குமாரரும் என்றென்றைக்கும் பிரித்து வைக்கப்பட்டார்கள். ¹⁴எங்கள் பிதாவின் மனுஷனாகிய மோசேயைப் பொறுத்தமட்டில், அவனுடைய குமாரர் லேவியின் கோத்திரத்தில் எண்ணப்பட்டார்கள். ¹⁵மோசேயின் குமாரர்: கெர்சோமும் எலியேசரும். ¹⁶கெர்சோமின் குமாரர்: தலைவனாகிய செபுவேல். ¹⁷எலியேசரின் குமாரர்: தலைவனாகிய ரெகபியா. எலியேசருக்கு வேறு குமாரர் இல்லை; ரெகபியாவின் குமாரரோ மிகவும் அநேகமாயிருந்தார்கள். ¹⁸இத்சாரின் குமாரர்: தலைவனாகிய செலோமித். ¹⁹எப்ரோனின் குமாரர்: தலைவனாகிய யெரியா, இரண்டாவது அமரியா, மூன்றாவது யகசியேல், நான்காவது யெகாமெயாம். ²⁰ஊசியேலின் குமாரர்: தலைவனாகிய மீகாவும், இரண்டாவது இஷ்ஷியாவும்.

மெராரியின் வம்சங்கள்

²¹மெராரியின் குமாரர்: மகேலியும் மூஷியும். மகேலியின் குமாரர்: எலெயாசாரும் கீசும். ²²எலெயாசார் குமாரர் இல்லாமல், குமாரத்திகள் மாத்திரம் உள்ளவனாய் மரித்தான்; ஆகையால் அவர்களுடைய உறவினராகிய கீசின் குமாரர் அவர்களை விவாகம்பண்ணினார்கள். ²³மூஷியின் குமாரர்: மகேலி, ஏதேர், யெரெமோத் ஆகிய மூன்று பேர்.

²⁴இவர்களே தங்கள் வம்சத்தின்படி லேவியின் குமாரர்; இருபது வயதும் அதற்கு மேற்பட்ட வயதுமுள்ளவர்களாய், எங்கள் பிதாவின் ஆலயத்தில் ஊழியம் செய்த, பேர்பேராய்ப் பதிவுசெய்யப்பட்ட வம்சத் தலைவர்கள் இவர்களே. ²⁵தாவீது சொன்னது: “இஸ்ரவேலின் தேவனாகிய எங்கள் பிதா தம்முடைய ஜனத்திற்கு இளைப்பாறுதலைத் தந்து, எருசலேமில் என்றென்றைக்கும் வாசம்பண்ணுகிறார். ²⁶ஆகையால் லேவியர் இனிமேல் ஆசரிப்புக்கூடாரத்தையும் அதின் ஊழியத்திற்குரிய எல்லாப் பணிமுட்டுகளையும் சுமக்கவேண்டியதில்லை.” ²⁷தாவீதின் இந்த இறுதி கட்டளைகளின்படி, இருபது வயதும் அதற்கு மேற்பட்ட வயதுமுள்ள லேவியர் எண்ணப்பட்டார்கள். ²⁸எங்கள் பிதாவின் ஆலயத்தின் ஊழியத்தில் ஆரோனின் குமாரருக்கு உதவிசெய்வதும், முற்றங்களையும் அறைகளையும் பராமரிப்பதும், பரிசுத்தமான எல்லாப் பொருட்களையும் சுத்திகரிப்பதும், எங்கள் பிதாவின் ஆலயத்தின் ஏதாவது வேலையைச் செய்வதும் அவர்களுடைய கடமையாயிருந்தது. ²⁹சமுகத்தப்பங்களையும், போஜனபலிக்கான மெல்லிய மாவையும், புளிப்பில்லாத அப்பங்களையும், சுடுதலையும், பிசைதலையும், அளவு நிறை எண்ணிக்கை அனைத்தையும் அவர்கள் பராமரித்தார்கள். ³⁰அவர்கள் ஒவ்வொரு நாள் காலையிலும் எங்கள் பிதாவுக்கு ஸ்தோத்திரம்பண்ணித் துதிசெய்யவும், அந்தப்படியே மாலையிலும் நிற்கவேண்டியதாயிருந்தது; ³¹ஓய்வுநாட்களிலும், மாதப்பிறப்புகளிலும், குறிக்கப்பட்ட பண்டிகைகளிலும், எங்கள் பிதாவுக்கு செலுத்தப்படும் எல்லாச் சர்வாங்க தகனபலிகளுக்காகவும், கட்டளையிடப்பட்ட எண்ணிக்கையின்படி, எப்பொழுதும் எங்கள் பிதாவின் சந்நிதியில் நிற்கவேண்டியதாயிருந்தது. ^a a v31 மாதப்பிறப்புகள் ஒவ்வொரு புதிய எபிரெய மாதத்தின் தொடக்கத்தில் மாதந்தோறும் கொண்டாடப்பட்ட கொண்டாட்டங்களாகும். ³²எங்கள் பிதாவின் ஆலயத்தின் ஊழியத்தில், ஆசரிப்புக்கூடாரத்தின் காவலையும், பரிசுத்த ஸ்தலத்தின் காவலையும், தங்கள் சகோதரராகிய ஆரோனின் குமாரரின் காவலையும் அவர்கள் காத்துக்கொண்டார்கள்.