1 Thotrinchān 23

23 ¹Davidna sarkahai eina zingkum kachungkha okthuilakha, ana awui naomayara Solomonli Israelwuitungli awunga sāngasaka. ²Ana Israelwui akhavābing saikora, pāngmonbing eina Levinaobingli ngasoda kazipkhui. ³Zingkum thumrā eina thuilaga chiwui atung Levinaobingli shānkhui, kala athumwui mashing saikora thing thumrāda chishatna. ⁴Hibingwui eina, thing maga̱da mati china ithumwui Avāwui shimwui otram yangmi khavai sai; thingtharuk china otva̱bing eina bicharsamebing sai. ⁵Thingmati china ngavei khamayonabing sai, kala thingmati china Davidna masot mikhavai sākahai akap-akai eina ithumwui Avāli sochikat sai.

⁶Kala Davidna athumli Leviwui naomayarabing Gershon, Kohath, kala Merari athishurda khumkhum eina ngayarkhui.

Gershonwui Shimkhurbing

⁷Gershonbingwui eina: Ladan eina Shime-i. ⁸Ladanwui naomayarabing: kathāna Jehiel, kala Zetham eina Joel, saikora kathum. ⁹Shime-iwui naomayarabing: Shelomoth, Haziel, kala Haran, saikora kathum. Mibing hi Ladanwui avāva̱ ngarā shimkhurwui wungva̱bingna. ¹⁰Kala Shime-iwui naomayara chi: Jahath, Zina, Jeush, kala Beriah. Naomayara mati hi Shime-iwui naomayarabingna. ¹¹Jahath kathāna, Ziza kakhanena; kha Jeush eina Beriahwui naomayara kateokha leisai, chieina athum khani shimkhur akha thāda katonga shānkhui, otram khangatha̱ akha sai.

Kohathwui Shimkhurbing

¹²Kohathwui naomayara chi: Amram, Izhar, Hebron, kala Uzziel, saikora mati. ¹³Amramwui naomayarabing: Aaron eina Moses. A eina awui naomayarabing mashimānda tharmathengmeikap kaji otbingli tharchigatmi khavai, ithumwui Avāwui mangāli chigat sāmi khavai, ali otram ngatha̱mi khavai, kala awui ming eina mashimānda somi khavai, Aaronli ngateida khaishoka. ¹⁴Kha ithumwui Avāwui mi Moseswui naomayarabing china Leviwui shang ngachaili shānkhui. ¹⁵Moseswui naomayarabing: Gershom eina Eliezer. ¹⁶Gershomwui naomayarabing: kathāna Shebuel. ¹⁷Eliezerwui naomayarabing: kathāna Rehabiah. Eliezerna naomayara katei maleimana; kha Rehabiahwui naomayarabing china kachungkhalakhaowa. ¹⁸Izharwui naomayarabing: Shelomithna wungva̱na. ¹⁹Hebronwui naomayara chi: wungva̱na Jeriah, kakhane Amariah, kakathuma Jahaziel, kala khamate Jekameam. ²⁰Uzzielwui naomayarabing: Micahna wungva̱na kala Isshiahna kakhanena.

Merariwui Shimkhurbing

²¹Merariwui naomayara chi: Mahli kala Mushi. Mahliwui naomayara chi: Eleazar kala Kish. ²²Eleazarna mayarnao maleila sha̱naobing maningla leilaga thihaowa; chiwui vang athumwui achinā ngarā, Kishwui naomayarabingna athumli ngakuma. ²³Mushiwui naomayarabing: Mahli, Eder, kala Jeremoth, saikora kathum.

²⁴Mibing hi shimkhur athishurda Leviwui naomayara, aming chankahai shimkhurwui kathānabing, athum ithumwui Avāwui shimli otram ngatha̱bing, zingkum maga̱ kākahai kala chiwui atungbingna. ²⁵Kaja Davidna hānga, "Ithumwui Avā, Israelwui Varena, awui mibingli ngasām mihaira, kala Jerusalemli katang mavaila leira. ²⁶Chieina Levinaobingna tabernacle kala chiwui otram khangatha̱ khorkhong saikora makhuiphungluimara." ²⁷Kaja Davidwui hi khanaowa kasobing athishurda, Levinaobing zingkum maga̱ eina thuilaga chiwui atungbing shānkhuina. ²⁸Athumwui ot chi ithumwui Avāwui shimli otram ngatha̱ khavai Aaronwui naomayarabingli phāsangana: kayāngbing kala kābing yangkhami khavai, kathara ot saikora samathākhui khavai, kala ithumwui Avāwui shimli ot saikorawui vangna. ²⁹Athumna ngasokhamiwui khamui, tharāzāt kachigatwui vang manaktak kahai mathir, khawok makazang katheng khamui, ngān kala manāt, kala kachung eina asānwui khāntam saikora khuipama. ³⁰Athumna ngathor kachida ithumwui Avāli ningkashi kala masot mi khavai nganingra, kala ngazinla chithai, ³¹kala ithumwui Avāli rikkatā kachigat saikorawui vang, sabbaththang, changwokthang, kala langchin sākahai phanit atamli, khangachā mashing athishurda atam kachida ithumwui Avāwui mangāli chithāda sāra. ^a a v31 Changwok chi Hebrew kachāng kadhar kachiva̱wui haokaphokli sākahai kachāngkha kachidawui zātkhānna. ³²Athumna kazip khavai kachonshimwui kakaso, katharapamwui kakaso, kala athumwui achinā ngarā, Aaronwui naomayarabingwui kakaso chi ithumwui Avāwui shimli otram ngatha̱ khavai mayona.