1 Thotrinchān 24

24 ¹Hi Aaronwui naomayarabingwui khum china. Aaronwui naomayarabing: Nadab eina Abihu, Eleazar kala Ithamar. ²Nadab eina Abihuna avāva̱wui mangāli nao maleila thihaowa; chiwui vang Eleazar eina Ithamarna pāngmon sāda otram ngatha̱ya. ³Eleazarwui naotun Zadok kala Ithamarwui naotun Ahimelech ngasoda, Davidna athumwui otngarut athishurda athum ngayeimi. ⁴Eleazarwui naomayarabingli Ithamarwui naomayarabingwui ngachaili kathāna morei theipai, chiwui vang athumwui shimkhur athishurda, Eleazarwui vang avāva̱ ngarā shimkhurwui kathāna tharāda tharuk, kala Ithamarwui vang chishat da ngayeimi. ⁵Athumna kalā yanglaga ngaraichāda ngayeimi; kaja kathara shimwui otva̱bing kala ithumwui Avāwui otva̱bing chi Eleazarwui naomayarabing kala Ithamarwui naomayarabingwui eina shoka. ⁶Kala Nethanelwui naomayara Levinao kapime Shemaiahna awunga, wungnaobing, pāngmon Zadok, Abiatharwui naomayara Ahimelech, kala pāngmon kala Levinaobingwui avāva̱ ngarā shimkhurwui kathānabingwui mangāli athum kapi; avāva̱ ngarā shimkhur akha Eleazarwui vang, kala akha Ithamarwui vang kapangkhui.

⁷Kalā kathāna Jehoiaribli tāhaowa; kakhane Jedaiahli, ⁸kakathuma Harimli, khamate Seorimli, ⁹kaphangā Malchijahli, katharuka Mijaminli, ¹⁰kashine Hakkozli, kachishata Abijahli, ¹¹kachiko Jeshuali, katharā Shecaniahli, ¹²tharāda khare Eliashibli, tharāda kakhane Jakimli, ¹³tharāda kakathuma Huppahli, tharāda khamate Jeshebeabli, ¹⁴tharāda kaphangā Bilgahli, tharāda katharuka Immerli, ¹⁵tharāda kashine Hezirli, tharāda kachishata Happizzezli, ¹⁶tharāda kachiko Pethahiahli, khamaga̱ Jehezkelli, ¹⁷maga̱da khare Jachinli, maga̱da kakhane Gamulli, ¹⁸maga̱da kakathuma Delaiahli, kala maga̱da khamate Ma-aziahli. ¹⁹Israelwui ithumwui Avāna Aaronli kaso kahai kathāda, athumwui avāva̱ Aaronna athumli mikahai shiyan athishurda, hi athumna ithumwui Avāwui shimli otram ngatha̱ khavai kachichāwui otpam ngarānmisera.

Levinaobing Katateibingnala Kalā Yanga

²⁰Leviwui naomayara kateibing: Amramwui naomayarabingwui eina Shuba-el; awui naomayara chi Jehdeiah. ²¹Rehabiahwui eina: Rehabiahwui naomayarabingwui eina Isshiahna wungva̱na. ²²Izharnaobingwui eina Shelomoth; Shelomothwui naomayarabingwui eina Jahath. ²³Hebronwui naomayarabing: Jeriah wungva̱, Amariah kakhane, Jahaziel kakathuma, kala Jekameam khamate. ²⁴Uzzielwui naomayarabing: Micah; Micahwui naomayarabingwui eina Shamir. ²⁵Micahwui achinā Isshiah; Isshiahwui naomayarabingwui eina Zechariah. ²⁶Merariwui naomayarabing: Mahli eina Mushi. Jaaziahwui naomayarabing: Beno. ²⁷Jaaziahwui eina Merariwui naomayarabing: Beno, Shoham, Zaccur, kala Ibri. ²⁸Mahliwui eina Eleazar, ana mayarnao maleimana. ²⁹Kishwui eina: Kishwui naomayarabing, Jerahmeel. ³⁰Mushiwui naomayarabing hi: Mahli, Eder, kala Jerimoth. Avāva̱ ngarā shimkhurwui athishurda Levinaobing chi hibing hina. ³¹Athumnala achinā ngarā Aaronwui naomayarabing tākam eina, Awunga David, Zadok, Ahimelech, kala pāngmonbing eina Levinaobingwui avāva̱ ngarā shimkhurwui wungva̱bingwui mangāli, shimkhur kachiva̱wui kathānala awui agato eina ngaraichāda kalā yanga.