1 Thotrinchān 25

25 ¹David kala raimi kathānabingna Asaph, Heman kala Jeduthunwui naomayarabing kaikha otram ngatha̱ khavai ngateida hai, athumna lyre, tingteilā kala kortar singda marāna. Otpam athishurda athumwui mashing chiya: ²Asaphwui naomayarabing: Zaccur, Joseph, Nethaniah, kala Asharelah. Athumna Asaphwui azingli sai, kala Asaphna awungawui kakaso athishurda marāna. ³Jeduthunwui naomayarabing: Gedaliah, Zeri, Jeshaiah, Shime-i, Hashabiah, Mattithiah, athum tharukna. Athumna avāva̱ Jeduthunwui azingli lyre singda marānda ithumwui Avāli ningkashi mida masot chikata. ⁴Hemanwui eina, awui naomayarabing: Bukkiah, Mattaniah, Uzziel, Shebuel, Jerimoth, Hananiah, Hanani, Eliathah, Giddalti, Romamti-ezer, Joshbekashah, Mallothi, Hothir, Mahazioth. ⁵Hi saikora hi awungawui marān Hemanwui naomayarabingna; athum chi Hemanli khāngchikat khavai ithumwui Avāwui tui eina mikahaina. Ithumwui Avāna Hemanli mayarnao tharāda mati kala naongalāva̱ kathum mi. ⁶Hi saikora hi kortar, tingteilā kala lyre singda ithumwui Avāwui shimwui otram ngatha̱ khavai, ithumwui Avāwui shimli laa sākhavai avāva̱ ngarāwui azingli sai; Asaph, Jeduthun kala Heman athumna awungawui azingli sai. ⁷Athumwui mashing, ithumwui Avāli laa sā khavai tamchithei kahai chinaongarā ngasoda, them-kathema saikora chi shākhani hangchishatta chishatna. ⁸Kala kharei kateo ngaraichada, ojā eina katamnao ngaraichada, athumna athumwui otpamwui vang kalā yanga.

⁹Khare kalā chi Asaphwui vang, Josephli tāhaowa; kakhane Gedaliah, chinaongarā kala anaomayarabing ngasoda, tharāda khani. ¹⁰kakathuma Zaccurli, anaomayarabing kala chinaongarā, tharāda khani; ¹¹khamate Izrili, anaomayarabing kala chinaongarā, tharāda khani; ¹²kaphangā Nethaniahli, anaomayarabing kala chinaongarā, tharāda khani; ¹³katharuka Bukkiahli, anaomayarabing kala chinaongarā, tharāda khani; ¹⁴kashine Jesarelahli, anaomayarabing kala chinaongarā, tharāda khani; ¹⁵kachishata Jeshaiahli, anaomayarabing kala chinaongarā, tharāda khani; ¹⁶kachiko Mattaniahli, anaomayarabing kala chinaongarā, tharāda khani; ¹⁷katharā Shime-ili, anaomayarabing kala chinaongarā, tharāda khani; ¹⁸katharāda akha Azarelli, awui naomayarabing kala achinā ngarā, tharāda khani; ¹⁹tharāda kakhane Hashabiahli, awui naomayarabing kala achinā ngarā, tharāda khani; ²⁰tharāda kakathuma Shuba-elli, awui naomayarabing kala achinā ngarā, tharāda khani; ²¹tharāda khamate Mattithiahli, awui naomayarabing kala achinā ngarā, tharāda khani; ²²tharāda kaphangā Jeremothli, awui naomayarabing kala achinā ngarā, tharāda khani; ²³tharāda katharuka Hananiahli, awui naomayarabing kala achinā ngarā, tharāda khani; ²⁴tharāda kashine Joshbekashahli, awui naomayarabing kala achinā ngarā, tharāda khani; ²⁵tharāda kachishata Hananili, awui naomayarabing kala achinā ngarā, tharāda khani; ²⁶tharāda kachiko Mallothili, awui naomayarabing kala achinā ngarā, tharāda khani; ²⁷khamaga̱ Eliathahli, awui naomayarabing kala achinā ngarā, tharāda khani; ²⁸maga̱da khareli Hothirli, awui naomayarabing kala achinā ngarā, tharāda khani; ²⁹maga̱da kakhane Giddaltili, awui naomayarabing kala achinā ngarā, tharāda khani; ³⁰maga̱da kakathuma Mahaziothli, awui naomayarabing kala achinā ngarā, tharāda khani; ³¹maga̱da khamate Romamti-ezerli, awui naomayarabing kala achinā ngarā, tharāda khani.