Mai Zargi Ya Zuga Dawuda Yă Ƙidaya Isra'ila

Mai Zargi ya zuga Dawuda ya ƙidaya mayaƙansa; Yowab ya ƙi amma aka rinjaye shi. Mutum dubu saba'in suka mutu da annoba kafin Dawuda ya ga mala'ikan Ubanmu ya roƙa cewa tumakin ba su yi kome ba. Ya sayi masussukar da cikakken farashi, yana ƙin miƙa abin da bai ci masa kome ba.

Babi na 21.

Mai Zargi ya tasar wa Isra'ila, ya kuma zuga Dawuda yă ƙidaya Isra'ila. ^a Dawuda ya ce wa Yowab da shugabannin mayaƙa, “Ku tafi, ku ƙidaya Isra'ila daga Beyersheba har zuwa Dan, ku kuma kawo mini rahoto, domin in san yawansu.”

Yowab ya ce, “Bari Ubanmu yă ƙara wa mutanensa ninki ɗari! Ranka yă daɗe, sarki, dukan waɗannan ba bayin ranka ba ne? Me ya sa ranka yake neman wannan? Me ya sa za a jawo wa Isra'ila laifi?”

Amma maganar sarki ta rinjayi maganar Yowab, saboda haka Yowab ya fita, ya zazzaga dukan Isra'ila, sa'an nan ya zo Urushalima. Yowab ya ba Dawuda sakamakon ƙidayar: Dukan Isra'ila suna da mutum miliyan ɗaya da dubu ɗari masu takuba, Yahuda kuwa tana da dubu ɗari huɗu da saba'in masu takuba. Bai ƙidaya Lawi da Benyamin ba, gama Yowab ya ƙyamaci umarnin sarki.

Wannan abu mugu ne ƙwarai a gaban Ubanmu, saboda haka ya bugi Isra'ila. Sai Dawuda ya ce wa Ubanmu, “Na yi zunubi mai girma ƙwarai da na yi haka. Yanzu, ina roƙonka, ka kawar da laifin bawanka, gama na yi aiki da wauta ƙwarai.”

Ubanmu kuwa ya yi magana da Gad, mai duban Dawuda:

Ka tafi ka ce wa Dawuda, “Ga abin da Ubanka ya faɗa: Ina ba ka zaɓin abubuwa uku—ka zaɓi ɗaya daga cikinsu, zan kuma yi maka shi.”

Gad ya zo wurin Dawuda ya ce masa, “Ga abin da Ubanmu ya faɗa, ‘Ka zaɓa wa kanka, ko shekaru uku na yunwa, ko wata uku ana share ka a gaban maƙiyanka yayinda takobinsu yake riskarka, ko kwanaki uku na takobin Ubanmu: annoba a ƙasar, mala'ikan Ubanmu yana hallakarwa a ko'ina cikin dukan yankin Isra'ila.’ Yanzu ka yanke shawarar wace amsa zan mayar wa wanda ya aiko ni.”

Dawuda ya ce wa Gad, “Ina cikin matsananciyar wahala. Bari in faɗa a hannun Ubanmu, gama jinƙansa mai girma ne ƙwarai—amma kada in faɗa a hannun mutum.”

Saboda haka Ubanmu ya aiko da annoba a kan Isra'ila, mutum dubu saba'in na Isra'ila kuwa suka mutu.

Ubanmu kuwa ya aiki mala'ika yă hallaka Urushalima; amma yayinda mala'ikan yake hallakarwa, sai Ubanmu ya gani ya kuma daina kawo masifar, ya ce wa mala'ikan, “Ya isa! Ka janye hannunka.” Mala'ikan Ubanmu kuwa yana tsaye kusa da masussukar Ornan mutumin Yebus.

Dawuda ya ɗaga ido sama sai ya ga mala'ikan Ubanmu yana tsaye tsakanin ƙasa da sama, da takobi zāre a hannunsa, mikakke a kan Urushalima. Sai Dawuda da dattawan, saye da tufafin makoki, suka faɗi rubda ciki. Dawuda ya ce wa Ubanmu, “Ba ni ba ne na ba da umarni a ƙidaya mutanen? Ni ne wanda ya yi zunubi na kuma aikata babbar mugunta. Amma waɗannan tumaki—me suka yi? Ya Ubana, bari hannunka yă kasance a kaina da a kan gidan mahaifina, ba a kan mutanenka da annoba ba.” ^b

An Gina Bagade; Ubanmu Ya Amsa da Wuta

Mala'ikan Ubanmu ya ce wa Gad yă faɗa wa Dawuda yă hau yă gina bagade ga Ubanmu a masussukar Ornan mutumin Yebus. Saboda haka Dawuda ya hau bisa ga umarnin Gad, wanda ya yi magana da sunan Ubanmu.

Ornan ya juya sai ya ga mala'ikan; 'ya'yansa huɗu da suke tare da shi kuwa suka ɓoye. Yana sussukar alkama ne. Da Dawuda ya zo wurin Ornan, sai Ornan ya duba ya ga Dawuda, ya bar masussukar, ya kuma rusuna wa Dawuda har fuskarsa ta kai ƙasa.

Dawuda ya ce wa Ornan, “Ka ba ni wurin masussukan nan domin in gina bagade ga Ubanmu a kansa; ka sayar mini da shi a cikakken kuɗinsa, domin a dakatar da annoba daga kan mutanen.”

Ornan ya ce wa Dawuda, “Ka karɓa. Bari ranka yă daɗe, sarki, yă yi abin da ya ga dama. Ga shi, ina ba da bijimai domin hadayun ƙonawa, da katakan sussuka domin itace, da alkama domin hadaya ta gari—ina ba da kome.”

Amma Sarki Dawuda ya ce wa Ornan, “A'a, lalle zan saye shi a cikakken kuɗinsa. Ba zan ɗauki abin da yake naka domin Ubanmu ba, ko in miƙa hadayun ƙonawa da ba su ci mini kome ba.”

Saboda haka Dawuda ya biya wa Ornan wajen fam goma sha biyar na zinariya domin wurin. Dawuda ya gina bagade a can ga Ubanmu, ya miƙa hadayun ƙonawa da hadayun salama, ya kuma kira ga Ubanmu, wanda kuwa ya amsa masa da wuta daga sama a kan bagaden hadaya ta ƙonawa.

Sa'an nan Ubanmu ya umarci mala'ikan, sai ya mayar da takobinsa cikin kube.

A wannan lokaci, da Dawuda ya ga Ubanmu ya amsa masa a masussukar Ornan mutumin Yebus, sai ya miƙa hadaya a can. Musa ya gina tabanakul na Ubanmu a cikin jeji; shi, tare da bagaden hadaya ta ƙonawa, suna a wancan lokaci a kan tudun Gibeyon. Dawuda bai iya zuwa can domin yă nemi Ubanmu ba, gama yana tsoron takobin mala'ikan Ubanmu.