Zephaniah 1

1 ¹Amonwui naomayara Josiahna Judahli mungda tharan, ithumwui Avāwui eina tui hi Zephaniahli rāhānga. Zephaniah hi Cushiwui naomayarana, Cushi hi Gedaliahwui naomayarana, Gedaliah hi Amariahwui naomayarana, kala Amariah hi Hezekiahwui naomayarana.

²"Okathui khamasaiwui eina saikora chi ina katang khuithuiserra,' da ithumwui Avāna hānga.

Judahwui Atang Ngareithui

³"Mi kala sāyur ina khuithuira; khamasaiwui vānaobing, shamadruwui khaibing, kala makhayābing eina ngasoda meoma̱wui thothap ina khuithuira. Okathui khamasaiwui eina mibing ina katathaira,' da ithumwui Avāna hānga. ⁴"Judahli makhamayā kala Jerusalemli kapam saikorali makhamayā ipāng katingvāra. Hi apamli khalei Baalwui shākkahai saikora, pāngmonbing eina ngasoda meoma̱ khokharuma pāngmonbingwui ming, ⁵shimtungli sirā ashangva̱li khorumbing, khorumda ithumwui Avāli mingzai, kha Milcomlila mingzaibing, ^a a v5 Milcom hi Ammonnaobingwui vare kharei akhana; ming chiya khalatta eina awungawui khamashung zanga. ⁶kala ithumwui Avāwui thi mashurthuda ngareithuibing, ithumwui Avāli maphāla kala ali mangathingabing ina katathaira."

⁷Sāshap-pangshapa Avāwui mangāli chingrihailu! Kaja ithumwui Avāwui zimiksho chi nganaihaira; ana pha̱kaphayā ngarānhaira kala awui ngasotnaobing tharchigata. ^b b v7 Ithumwui Avāwui zimiksho — ana khalatta eina ot sāwui zimiksho. FHB na hili ali 'Avā' da ming zanga, chithākha lairik pāmina bichar sākasā Avā chili samphangra, katāva̱li khalei vare akha maningmana. Kazing sākhui kala huimi kasā Avā chi amāngna okathui hili awui ngarān kahai bichar tharanli khuivai.

⁸"Ithumwui Avāwui pha̱kaphayāwui zimiksholi wungnaobing, awungawui naomayarabing, kala yur khangateiwui kachon ngavaibing saikorali ina tandi mira. ⁹Chi zimiksholi khāmongphei yongkānbing, kala athumwui akhavāwui shim khayon kala mikhanam eina pemngasakbing saikorali ina tandi mira. ^c c v9 Khāmongphei yongkānwui hi khangatei vare khorumbingwui khangui shitkasang akhana, Philistinenaobingna Dagonwui shimli sāki kaji eina rārakhai (1 Samuel 5:5 yanglu). ¹⁰Chi zimiksholi,' da ithumwui Avāna hānga, 'Khaiwui ngaveiwui eina khavao akha, Kakhane Apamwui eina chapngachā akhon, kala kaphungwui eina panglāk longthui akha shokra. ¹¹Chaplu, O Mortongli kapambing! Kaja leihkhalonbing saikora sāshimānmihaira; lupāsā onbing saikora katatserhaora.'" ^d d v11 Mortong (Hebrew tuili Maktesh) hi Jerusalemwui leihpam kā khum akhana, ava mā thāda kāwui vang hi ming zanga.

¹²Chitharan ina thaomei eina Jerusalemli phāra, kala zam awui zampāli ngachingpama thāda kapam mibing, athumwui ningli, "Varena kaho masāmara—kaphāla masā makaphāla masāmara" da hāngbingli ina tandi mira. ^e e v12 Zam chi awui zampāli masāza̱ haisāakha kashā kala khai onra — hi mi khalatta khamathānda okthuihaida ithumwui Avāwui eina kaho ngahai matheibingwui khamamei akhana.

¹³Athumwui lan ngaponhaora kala athumwui shim ramcho ngasāra. Athumna shim sāra kha chili mapamluimara; drakhā yāmgui sāsangra kha chiwui drakhāra̱ mamangluimara.""

¹⁴Ithumwui Avāwui hakmahālak zimiksho chi nganaihaira, nganaida thākta rāra. Nganālu! Ithumwui Avāwui zimiksho chi kakhāna; chili pangshapa raimina panglāk eina vaora. ¹⁵Chi zimiksho hi malungkhavātwui zimikshona, sipkasā kala angunwui zimikshona, kashimān kala sākakhayāngwui zimikshona, tangkhamang kala tangmangtinghai zimikshona, muiyā kala tangkhamang kashāwui zimikshona, ¹⁶raipan sākahai keinungbingli makhamayā kala achikunwui kajui dolanbing makhamayā, talla̱khon kala raikhonwui zimikshona.

¹⁷"Ina mibingwuitungli hakmahālak ningkachot yuira, chithākha athumna khangapeo mibing thāda phākho phāzatra, khikhalajila athumna ithumwui Avāli morei sāhaira. Athumwui ashee chifa thāda heishokra kala athumwui asā hār thāda paira. ¹⁸Ithumwui Avāwui malungkhavāt zimiksholi athumwui sināla lupāla athumli makanmirarmara. Awui yuikashiwui mei eina okathui hupta chuitāhaora, kaja ana okathuili khalei saikorali kashuirak eina tangngasakhaora."