Zephaniah 2

2 ¹Rākazipserlu, nathum khalatta kazipserlu, O masākhangayi yur, ²Shiyanna nao pharā marāranglakha, zimiksho china masina lanji phankathui thāda kānhaira, ithumwui Avāwui sākashi malungkhavāt nathumwuitungli marāranglakha, ithumwui Avāwui malungkhavātwui zimiksho nathumwuitungli marāranglakha. ³Ithumwui Avāli phālu, O ngalei chiwui khangahuiabing saikora, awui mashun sābing; khamashung khangarong phālu, khangahui phālu. Ithumwui Avāwui malungkhavātwui zimiksholi nathum ngathum kahai sāhaolapai. ⁴Kaja Gaza horkahai sāhaora, kala Ashkelon ramcho sāra; Ashdodli ngashunung atamli kashamshokhaora, kala Ekron phurshokhaora. ⁵O shamadru pheili kapambing, Cherethnaobingwui yur, nathumli kakhanang ngasāranu! Ithumwui Avāwui Tui nathumwuishong lei, O Canaan, Philistinenaobingwui ngalei: "Ina nathumli sāshimānmihaora, khipākha kapambing akhala matai ngasakmara." ⁶Kala shamadrupheili seihomphung ngasāra, yaokahomabingwui vang seizātpam kala yaobingwui vang pamkhavai apam ngasāra. ⁷Ngayipheili Judahwui shimkhurwui shākkahaibingwuisera; chili athumna phāshaira, kala Ashkelonwui shimbingli ngazin eina athumna pira. Kaja ithumwui Avāna athumli rimpamda athumwui lan hanmiluishitra. ⁸Moabwui khamashāt kala Ammonnaobingwui zeikakharui ina shāhaira, chi eina athumna iwui mibingli mana̱shida athumwui ngaleiwui maramli lāngsohaira.

⁹Chiwui vang eina, ina kharing chiwui tākam eina, saikorawui Avā, Israelwui Avāna hānga, Moab Sodom thāda sāhaora, kala Ammonnaobing Gomorrah thāda sāra, lenghui kala machi chomwui ngalei, katang makhavai ramcho ngasāra. Iwui mibingwui shākkahaibingna athumli ngaponkhuira, kala iwui yurwui shākkahaibingna athumli shimlui khuira. ¹⁰"Hi athum khalatta langkasowui vang athumna samphangra, kaja athumna saikorawui Avāwui mibingli mana̱shida lāngsohaira. ¹¹Ithumwui Avā athumli khangachee sāra, kaja okathuiwui varebing saikorali ana nganang ngasakra; kala yurbingwui shamadrupheibing saikorana, kachiva̱ akhalattawui apam eina, ali khokharum sāra."

¹²Nathum Ethiopianaobing la iwui raighai eina sāthathaora.

¹³Kala ana atungshongwuishong pāng katingvāra kala Assyriali sāshimānhaora, kala ana Ninevehli lamhāng thāda katheng ramcho sāngasakra. ¹⁴Awui alungli yaobing, sāyur yur kachungkha pira; pawung kala kazinghok khani awui pākra̱ tungbingli apamra. Charfabing alungli akhonna laa sāra, khāmongpheili thothap leira, kaja cedarthingwui ot chi phongkhami sāhaira. ¹⁵Hi yansāngsa̱ kahai keinung china, ningtāphup eina kapama chi, awui wuklungli, "Ilaka, iwui eina khangatei akhala maleimana" da kahānga. Ana kathāda ngayānghaokhala, sāyurbingwui pamkhavaina! Awui ngalemli kānung kānkhavā saikorana kasirora kala apāng ngashumda khanukra.