ሶፎንያስ 2

2 ¹ተሰብሰቡ፤ ተሰባሰቡ፤ አንተ የማታፍር ሕዝብ ሆይ፤ ²ዐዋጁ ሳይወልድ፣ ቀኑም እንደ ገለባ ሳያልፍ፣ የአባታችን የሚነድ ቍጣ ሳይመጣባችሁ፣ የአባታችን የቍጣ ቀን ሳይደርስባችሁ። ³ፍርዱን የምታደርጉ፣ የምድር ትሑታን ሁላችሁ፣ አባታችንን ፈልጉ፤ ጽድቅን ፈልጉ፤ ትሕትናን ፈልጉ። ምናልባት በአባታችን የቍጣ ቀን ትሰወሩ ይሆናል። ⁴ጋዛ የተተወች ትሆናለችና፣ አስቀሎንም ባድማ ትሆናለች፤ አሽዶድ በቀትር ትባረራለች፣ አቃሮንም ትነቀላለች። ⁵በባሕር ዳር የምትኖሩ፣ የኪሬታውያን ሕዝብ ሆይ፣ ወዮላችሁ! የፍልስጥኤማውያን ምድር ከነዓን ሆይ፣ የአባታችን ቃል ይቃወምሻል፦ “ነዋሪ እስከማይቀር ድረስ አጠፋሻለሁ።” ⁶የባሕሩ ዳርቻ የማሰማሪያ ስፍራ ይሆናል፤ ለእረኞች መሰማሪያ፣ ለመንጎችም ጕረኖ ይሆናል። ⁷ዳርቻውም ለይሁዳ ቤት ቀሪዎች ይሆናል፤ በዚያ ያሰማራሉ፤ ማታም በአስቀሎን ቤቶች ይተኛሉ፤ አባታችን ይጐበኛቸዋልና፣ ብልጽግናቸውንም ይመልስላቸዋልና። ⁸የሞዓብን ስድብ፣ የአሞናውያንንም ዘለፋ ሰምቻለሁ፤ በእነዚያ ሕዝቤን ተሳድበዋል፣ በድንበራቸውም ላይ ተመክተዋል።

⁹ስለዚህ፣ የሰማይ ሠራዊት አባት፣ የእስራኤል አባታችን እንዲህ ይላል፤ በሕይወቴ እምላለሁ፤ ሞዓብ እንደ ሰዶም፣ አሞናውያንም እንደ ገሞራ ይሆናሉ፤ የኩርንችትና የጨው ጕድጓድ ምድር፣ ለዘላለምም ባድማ ይሆናሉ። የሕዝቤ ቀሪዎች ይበዘብዟቸዋል፣ የሕዝቤም ተራፊዎች ይወርሷቸዋል። ¹⁰“ይህ ስለ ትዕቢታቸው የሚያገኛቸው ነው፤ ሕዝቡን ተሳድበዋልና፣ በሕዝቡም ላይ ተመክተዋልና፤ ይህውም የሰማይ ሠራዊት አባት ሕዝብ ነውና። ¹¹አባታችን በእነርሱ ላይ የሚያስፈራ ይሆናል፤ የምድርን አማልክት ሁሉ ያስራባቸዋልና፤ የአሕዛብም ደሴቶች ሁሉ፣ እያንዳንዱ ከስፍራው ሆኖ ይሰግዱለታል።”

¹²እናንተ ኢትዮጵያውያንም ደግሞ በሰይፌ ትገደላላችሁ።

¹³እጁንም ወደ ሰሜን ይዘረጋል፤ አሦርንም ያጠፋል፤ ነነዌንም ባድማ ያደርጋታል፣ እንደ በረሓም ደረቅ ትሆናለች። ¹⁴መንጎች በመካከሏ ይተኛሉ፣ የምድረ በዳ አራዊትም ሁሉ፤ ጕጕትና ጃርት በምሰሶቿ ራስ ላይ ያድራሉ። በመስኮቶች ውስጥ ድምፅ ያቀነቅናል፣ በመድረክም ላይ ፍርስራሽ ይሆናል፤ የዝግባው ሥራ ተራቍቷልና። ¹⁵ተድላ የሞላባት፣ በእርጋታ የኖረች ከተማ ይህች ናት፤ በልቧም እንዲህ ያለች፤ “እኔ ነኝ፤ ከእኔም በቀር ማንም የለም።” እንዴት ባድማ ሆነች፣ ለአራዊትም ማደሪያ! በአጠገቧ የሚያልፍ ሁሉ ያፍጫል፣ እጁንም ያወዛውዛል።