ሶፎንያስ 2 FHB Father's Heart Bible™

2 ¹ተኣከቡ፥ ተኣከቡ፥ ኣቱም ዘይትሓፍሩ ህዝቢ፥ ²ቅድሚ እቲ ትእዛዝ ምውላድ፥ እታ መዓልቲ ኸም ብቝቡቝ ትሓልፍ፥ እቲ ረስኒ ቍጥዓ ኣቦና ናባኻትኩም ቅድሚ ምውራድ፥ እታ መዓልቲ ቍጥዓ ኣቦና ናባኻትኩም ቅድሚ ምምፅኣ። ³ንኣቦና ድለዩ፥ ኣቱም ፍርዱ እትፍፅሙ ኵልኻትኩም ትሑታት እዛ ምድሪ፥ ፅድቂ ድለዩ፥ ትሕትና ድለዩ። ምናልባሽ በታ መዓልቲ ቍጥዓ ኣቦና ክትሕብኡ ኢኹም። ⁴ጋዛ ኽትሕደግ፥ ኣስቀሎና ድማ ዑና ክትከውን እያ፤ ኣዛጦን ፍርቂ መዓልቲ ኽትስጐግ እያ፥ ኣቃሮን ድማ ክትንቀል እያ። ⁵ኣቱም ኣብ ገምገም ባሕሪ እትነብሩ፥ ህዝቢ ክረታውያን፥ ወይለኹም! ኦ ከነዓን፥ ምድሪ ፍልስጥኤማውያን፥ ቃል ኣቦና ኣብ ልዕሌኹም እዩ፦ “ሓደ ዝቕመጥ እኳ ክሳዕ ዘይተርፍ ከጥፍአኩም እየ።” ⁶ገምገም ባሕሪ ኸዓ መጓሰዪ ኽኸውን እዩ፥ ንጓሶት ዝኸውን ሰውሕን ንኣባጊዕ ዝኸውን ደምበን ኣብኡ ክኸውን እዩ። ⁷እቲ ገምገም ባሕሪ ናይ ተረፍ ቤት ይሁዳ ክኸውን እዩ፤ ኣብኡ ኽጓስዩ፥ ኣብ ኣባይቲ ኣስቀሎና ድማ ምሸት ክድቅሱ እዮም። ኣቦና ኽሕልዎምን ምርኮኣቶም ክመልሰሎምን እዩ እሞ። ⁸ፀርፊ ሞኣብን ላግፂ ደቂ ኣሞንን፥ በቲ ንህዝበይ ዝፀረፍሉን ኣብ ልዕሊ ምድሮም ዝተዐበዩሉን ሰሚዐ ኣለኹ።

⁹ስለዙይ ብህይወተይ እምሕል ኣለኹ፥ ኣቦ ሰራዊት፥ ናይ እስራኤል ኣቦና ይብል ኣሎ፥ ሞኣብ ከም ሰዶም፥ ደቂ ኣሞን ድማ ከም ገሞራ፥ ምድሪ ኣሻዅን ጉድጓድ ጨውን፥ ንዘለኣለም ባድማ ክኾኑ እዮም። ተረፍ ህዝበይ ክዘምትዎም፥ እቶም ካብ ህዝበይ ዝተረፉ ድማ ክወርስዎም እዮም። ¹⁰“እዝ ስለ ትዕቢቶም ዝረኽብዎ እዩ፥ ኣብ ልዕሊ እቲ ህዝቢ ስለ ዝፀረፉን ስለ ዝተዐበዩን፥ እቲ ህዝቢ ድማ ናይ ኣቦ ሰራዊት እዩ። ¹¹ኣቦና ንኣኣቶም ዘፍርሕ ክኸውን እዩ፥ ንዅሎም ኣማልኽቲ ምድሪ ከጥምዮም እዩ እሞ፤ ኵለን ደሴታት ኣህዛብ ድማ ነፍሲ ወከፈን ካብ ቦታአን ክሰግዳሉ እየን።”

¹²ኣቱም ኢትዮጵያውያን፥ ንስኻትኩምውን ብሰይፈይ ክትቅተሉ ኢኹም።

¹³ናብ ሰሜን ድማ ኢዱ ክዝርግሕ፥ ንኣሶርውን ከጥፍእ እዩ፥ ንነነዌ ባድማ ክገብራ፥ ከም በረኻ ንቑፅቲ ክገብራ እዩ። ¹⁴መጓሰ ኣብ ማእኸላ ክድቅሱ እዮም፥ ኵሉ ዓይነት ኣራዊት ድማ፤ ጉጓን ቅንፍዝን ኣብ ጕልላት ኣዕማዳ ክሓድሩ እዮም። ድምፂ ኣብ መሳዅቲ ክዝምር፥ ዑና ኣብ ድርኵዂት ክኸውን እዩ፥ እቲ ግብሪ ፅሕዲ ተቐሊዑ እዩ እሞ። ¹⁵እዛ ብዘይ ጭንቂ ዝነበረት ከተማ እዚኣ፥ ብህድኣት ዝነበረት፥ ብልባ “ኣነ እየ፥ ብዘይ ኣነ ድማ ካልእ የለን” ዝበለት እያ። ከመይ ዝበለት ዑና ኾይና፥ መዕቘቢ ኣራዊት! ዝሓልፍ ዅሉ ብኣኣ የፍጭፀላን ኢዱ የወዛውዘላን።