Cookanĩrĩrai Mbere ya Kĩhuhũkanio
Ĩtana nĩ rĩa gũcookanĩrĩra mbere ya marakara na itua rĩa Ithe witũ gũkinya, na mwĩhoko ũrĩa ũheanĩtwo no ‘hihi’ — caariai kwĩnyiihia, na hihi nĩmũkahithwo. Ndũũrĩrĩ iria irigiicĩirie igacooka igatajwo ĩmwe ĩmwe, ikarĩkĩrĩria na Nineve ĩrĩa ĩĩtĩĩaga, ĩĩhokete yo yene, ĩgatigwo ĩrĩ ihooru.
2 1Cookanĩrĩrai hamwe, mwĩcookanĩrĩrie, inyuĩ rũrĩrĩ rũtarĩ thoni, 2Itua rĩtaanaciara—mũthenya ũkahĩtũka ta mahuti—marakara mahiũ ma Ithe witũ mataanamũkinyĩra, mũthenya wa marakara ma Ithe witũ ũtaanamũkinyĩra. 3Caariai Ithe witũ, inyuothe mũrĩ eenyiihia a bũrũri ũyũ, arĩa mũhingagia kĩhooto gĩake; caariai ũthingu, caariai kwĩnyiihia. Hihi nĩmũkahithwo mũthenya wa marakara ma Ithe witũ. 4Amu Gaza nĩgũgatiganĩrio, nakuo Ashikeloni gũtuĩke ihooru; Ashidodi nĩgũkaingatwo mũthenya barigici, nakuo Ekironi gũkamunywo. 5Kaĩ mũrĩ na haaro-ĩ, inyuĩ mũtũũraga hũgũrũrũinĩ cia iria, rũrĩrĩ rwa Akerethi! Kiugo kĩa Ithe witũ nĩgĩmũũkĩrĩire, wee Kaanani, bũrũri wa Afilisti: “Nĩngakũniina nginya gũtigatigare mũndũ ũngĩtũũra kuo.” 6Nakuo hũgũrũrũ cia iria gũgaatuĩka ũrĩithio, kũrĩ na mĩgũnda ya nyeki ya arĩithi na ciugũ cia ndũũru. 7Hũgũrũrũ ĩyo nĩĩgatuĩka ya matigari ma nyũmba ya Juda; kũu nĩkuo makaarĩithagĩria, na nyũmbainĩ cia Ashikeloni nĩmagaakomaga hwaĩinĩ. Amu Ithe witũ nĩakaamamenyagĩrĩra na amacookerie ũgaacĩru wao. 8Nĩnjiguĩte irumi cia Moabi na njuukĩ cia Aamoni, iria maarumĩire andũ akwa nacio, makĩĩgaatha nĩ ũndũ wa bũrũri wao.
9Nĩ ũndũ ũcio, o ta ũrĩa niĩ ndũũraga muoyo, ũguo nĩguo Ithe wa mbũtũ cia igũrũ ekuuga, o we Ithe witũ wa Isiraeli, Moabi nĩgũgatuĩka ta Sodomu, nao Aamoni matuĩke ta Gomora— bũrũri wa mĩigua na marima ma cumbĩ, kũndũ gũkirĩte ihooru nginya tene. Matigari ma andũ akwa nĩmakaamataha, nao arĩa magaatigara a rũrĩrĩ rwakwa nĩmakaamegwatĩra. 10“Ũũ nĩguo makaarĩhwo nĩ ũndũ wa mwĩtĩĩo wao, tondũ nĩmarumire na makĩĩgaatha magĩũkĩrĩra andũ a Ithe wa mbũtũ cia igũrũ. 11Ithe witũ nĩagaatuĩka wa gwĩtigĩrwo nĩo, amu nĩakahũũnjia ngai ciothe cia thĩ; nacio hũgũrũrũ ciothe cia ndũũrĩrĩ nĩikaamũinamĩrĩra, o ĩmwe kuuma handũ hayo.”
12Na inyuĩ Akushi, o na inyuĩ nĩmũkooragwo na rũhiũ rwakwa rwa njora.
13Nake nĩagaatambũrũkia guoko gwake okĩrĩre mwena wa gathigathini, aniine Ashuri, na atue Nineve ihooru, kũndũ kũũmũ ta werũ. 14Ndũũru nĩigaakomaga gatagatĩ kayo, nyamũ cia mĩthemba yothe cia gĩthaka; o ndundu na kĩhũũ nĩigaaraaraga igũrũ rĩa itugĩ ciayo. Mũgambo nĩũkainaga ndiricainĩ, ihĩĩga rĩiyũrĩte hingĩroinĩ, amu wĩra wa mĩtarakwa nĩũguũrũrie. 15Rĩĩrĩ nĩrĩo itũũra inene rĩrĩa rĩteciiragia ũndũ, rĩrĩa rĩatũũraga rĩrĩ na thayũ, rĩrĩa rĩeĩraga ngoroinĩ yarĩo atĩrĩ, “Nĩ niĩ, na gũtirĩ ũngĩ tiga niĩ.” Kaĩ nĩrĩtuĩkĩte ihooru-ĩ, gĩikaro kĩa nyamũ cia gĩthaka! Mũndũ o wothe ũrĩa ũhĩtũkaga harĩ rĩo nĩamĩhĩĩhagia na akainainia ngundi yake.