Avāwui Lukhamashanwui Shamadru
Ithumwui Avāna tangkhong kakhui mi tharuk hormangkhui, kala hangkap phiya kashan kala kahangkhavai langkhal kakhui mi akhana ramwui kharā vang kachingkhui mi kachidawui ngahaoli marakhui. Kaminthui kaphungna chumthui, tempel eina sāngkhui. Ezekielna amangli tāngkhui kala mi leikhavai mali da ngachikhui.
9 1Chieina ana ikhanāli akhon panglāk eina vaoda hānga: "Keinungwui yangkhamebing, kachichāwui sākashimānwui zeighai singlaga rānganailu."
2Kala kachichāwui khangachee-khangachā khutlai apāngli singlaga, atungshong yangkhangasung ato ngavei eina mi tharuk shoka; athumwui ngachaili awui pāngli kakapi oko akha khalei, khamenga kachon khangavaipā akha lei. Athum rālaga pithraiwui hanphut ngalemli nganinga.
3Ithumwui Avāwui tekhamatei chi awui ngasopam cherubbingwui eina ngakarthuida shim khāmongpheili vai. Ana awui pāngli kakapi oko akha khalei, khamenga kachon khangavaipā chili ahokhui.
4Kala ithumwui Avāna ali hānga, "Jerusalem keinung alungli vālu, kala chili sākahai ningkakachai ot saikorawui vang khāsut ngahuida khaleibingwui khaveili shamadru sālu." a a v4 Ngayin khavai shamadru khami kahaibing chi, athum shaksāli khalei morei chiwui vang ning suitāhaibingna. Ithumwui Avāna ali za̱ ngasakpa morei chiwui vang ngahuipa naongarā chi shivaida shamadru khamina.
5Kateibingli ana ikhanāli hānga, "Awui thi shurlaga keinung alungli vāda shaolu. Nathumwui mikna mayangkheialu, lukhamashanla malumashanalu. 6Kasarnaobing, yaronnaobing, ngalānaobing, naoshinaobing, kala sha̱naobing, athum saikora shaothatlu. Kha shamadru khalei khipānakha masingalu. Iwui kathara shimwui eina haophok sālu." Chieina athumna shim mangāli khalei khararnaobingwui eina haophoka.
7Chieina ana athumli hānga, "Shim chi sākhamāng ngasaklu, kayāng chi kathibing eina pemtinghai ngasaklu. Vālu!" Chieina athumna thuihailaga keinung alungli mibing shaothatserhaowa.
8Athumna shaoakha eina, ina amāng yāmshoka. Ina mai mashunzangda akhon panglāk eina chapta hānga, "Iyavo, Proho Avā! Jerusalemli nawui malungkhavāt heitālakha eina, Israelwui shākkahai saikora sāshimānhaora?"
9Chieina ana ili hānga: "Israel kala Judah shimwui otkhapok chi khavaishā rai. Ngaram chi ashee eina pemtinghaira, kala keinung chi khamashung makhaleiwui ot eina pemtinghaira; maramkhava athumna hānga, 'Varena ngaram chi thadatda kahaisai; Varena mayangra.' 10Chiwui vang ina, imikna mayangkheimara, kala ina lukhamashanla malumashanmimara. Athumwui otsak athishurda athumwui kuili athut khuira."
11Chieina awui pāngli kakapi oko akha khalei, khamenga kachon khangavaipā china unghāngsera, "Nana ili kasoi tākam eina ina sāhaira."
