Ithumwui Avāwui Tekhamatei Khorumshimwui Eina Thuihaowa
Cherubim kala mik kahupshira athumwui tārokna kathoma, kala tempelli ngahaophana kachumli thānkhui, kathānli ngahuiwui tungli, kaseili phan ngahuili. Hangkap phiya kakhui mi akhana ramli meirong kahanthai kachokhui. Ezekielna ithumwui Avāna Wui shimli thānkhavai yangkhui.
10 1Chieina ina yanga: cherubimwui kuishakli khalei sirāram chiwuitungli sapphire ngalung thāda, wungpamkhong zak thāda khangamān akha thei.
2Kala ithumwui Avāna khamenga kachon khangavaia mili hānga, "Cherubimwui azingli khalei sur kakhaning kāngpheibingwui alungli zanglu. Cherubimwui alungli eina meithā khamaling eina napāng hāngserlu kala keinung chiwuitungli chaiyāngmilu." Kala ina yangda leilakha ana kazanghaowa.
3Mi chi kazang tharan cherubimbing chi khorumshimwui azingshongli nganinga, kala muiyāna alungkayāng chi pemtinghaowa. 4Chiwui thili ithumwui Avāwui tekhamatei chi cherubwui eina khorumshimwui khāmongli kāhaowa, kala khorumshim chi muiyāna pemtinghaowa, kala kayāng chi ithumwui Avāwui tekhamateiwui kahānna pemtinghaowa. 5Cherubimwui angachāngwui khon chi, Sāshap-pangshapa kahāngwui akhon thāda, ayar kayāngli tāshungda shaikahaowa.
6Ana khamenga kachon khangavaia mili, "Sur kakhaning kāngpheibingwui alungli eina, cherubimwui alungli eina mei khuilu," da hāngchithei tharan, ana kazanga kāngphei akhawui ngalemli nganinga.
7Chieina cherub chi cherubimwui alungli khalei meishong apāng khangkāda, kaikha khuilaga khamenga kachon khangavaia miwui pāngli haihai, kala ana chi khuilaga kayāngli shokhaowa. 8Cherubimbing chi angachāngwui azingli miwui pāng thāda kai da thei.
9Ina yanga, kala cherubbingwui ngalemli kāngphei mati nganinga, kachiva̱wui ngalemli akharip, beryl thāda hinga. 10Kāngphei alungli kāngphei akha leilak thāda, kāngphei mati saikora azak ngaraichai. 11Athumna zatakha, mangareiunglakla achikun mati chi angatar eina zata; kāngphei kharena kachiza̱li ngateiakha, khangateibing china mangareiunglakla shura. 12Athumwui aphasā katonga, kashān, pāng, angachāng, kala athum mati saikorawui kāngpheibing, kuimareida mikna pema. 13Kāngpheibingwui vang, ina nganā tharan china "sur kakhaning bing" da hokahai. 14Kachiva̱ amai mati kai: khare chi cherubmai, kakhane chi mimai, kakathuma chi kazingkha̱mai, kala khamate chi khalāngmaina.
15Cherubimbing china kāhaowa. Hibing chi Chebar kongpheili ina kathei kharinga sāyurbing china. 16Cherubimbing china zatakha, kāngpheibing chila athumwui ngalemli zata; kala athumna ngaleiwui eina kākhavai angachāng hāruakha, kāngpheibing chila athumwui ngalemli eina mangathuimana. 17Athumna nganingakha, kāngpheibing chila nganinga; athumna kaakha, kāngpheibing chila ngasoda kāhaowa; kaja kharinga sāyurbing chi awui manglāna kāngpheibing chiwui alungli lei.
18Chiwui thili ithumwui Avāwui tekhamatei china shimwui khāmongphei tungwui eina kāmamānda cherubimwuitungli kānganinga. 19Ina yangda leilakha, cherubbing china angachāng hāruwa kala ngaleiwui eina kāhaowa, athumwui ngalemli kāngpheibing ngasoda shoka. Athumna ithumwui Avāwui shimwui zingshoshong ngaveiwui zangkhavaili nganinga, kala Israelwui Avāwui tekhamatei chi athumwuitungli reida lei.
20Hibing chi Chebar kongpheili Israelwui Avā azingli ina kathei kharinga sāyurbing china; kala athum cherubim china da ina thei. 21Kachiva̱na amai mati, angachāng mati kai; kala athumwui angachāngwui azingli mipāng thāda kai. 22Athumwui amai chi Chebar kongpheili ina kathei chi tākam eina thai. Athum kachiva̱ angatar eina mangāshong zata.
