ሕዝቅኤል 10

10 ¹ከዚያም ተመለከትሁ፤ በኪሩቤሎች ራስ ላይ ባለው ጠፈር ላይ፣ ዙፋን በሚመስል ቅርጽ የተሠራ፣ እንደ ሰንፔር ድንጋይ የሚመስል ነገር ታየ።

²አባታችንም በፍታ ለለበሰው ሰው እንዲህ አለው፤ “ከኪሩቤሎች በታች ወዳሉት የሚሽከረከሩ መንኰራኵሮች መካከል ግባ። ከኪሩቤሎች መካከል የሚነድ ፍም ዕፍኝህን ሞልተህ በከተማዪቱ ላይ በትናቸው።” እኔም እያየሁ ገባ።

³ሰውዬው በገባ ጊዜ ኪሩቤሎች በቤተ መቅደሱ በስተ ደቡብ በኩል ቆመው ነበር፤ ደመናውም የውስጠኛውን አደባባይ ሞላው። ⁴ከዚያም የአባታችን ክብር ከኪሩቤሉ ተነሥቶ ወደ ቤተ መቅደሱ ደጃፍ ወጣ፤ ቤተ መቅደሱም በደመና ተሞላ፤ አደባባዩም በአባታችን ክብር ብርሃን ተሞላ። ⁵የኪሩቤሎች ክንፎች ድምፅ፣ ሁሉን ቻዩ አምላክ ሲናገር እንደሚሰማ ድምፅ፣ እስከ ውጭኛው አደባባይ ድረስ ተሰማ።

⁶በፍታ ለለበሰው ሰው፣ “ከሚሽከረከሩት መንኰራኵሮች መካከል፣ ከኪሩቤሎች መካከል እሳት ውሰድ” ብሎ ባዘዘው ጊዜ፣ ሰውዬው ገብቶ ከመንኰራኵር አጠገብ ቆመ።

⁷ከዚያም ኪሩቤሉ በኪሩቤሎች መካከል ወዳለው እሳት እጁን ዘርግቶ ከእሳቱ ወሰደ፤ በፍታ የለበሰውም ሰው እጅ ላይ አኖረው፤ እርሱም ተቀብሎ ወጣ። ⁸ኪሩቤሎችም ከክንፎቻቸው በታች የሰው እጅ የሚመስል ነገር ያላቸው መስለው ታዩ።

⁹ተመለከትሁም፤ ከኪሩቤሎች አጠገብ አራት መንኰራኵሮች፣ ከእያንዳንዱ አጠገብ አንድ አንድ ሆነው ቆመው ነበር፤ መንኰራኵሮቹም እንደ ቢረሌ ድንጋይ ያብረቀርቁ ነበር። ¹⁰አራቱም መንኰራኵሮች አንድ ዐይነት መልክ ነበራቸው፤ መንኰራኵር በመንኰራኵር ውስጥ እንዳለ ይመስሉ ነበር። ¹¹በሚንቀሳቀሱም ጊዜ ሳይዞሩ ወደ አራቱ አቅጣጫ ወደማንኛውም ይሄዱ ነበር፤ ፊተኛው መንኰራኵር ወዳየለት አቅጣጫ ሌሎቹ ሳይዞሩ ይከተሉት ነበር። ¹²ሰውነታቸው ሁሉ፣ ጀርባቸው፣ እጆቻቸው፣ ክንፎቻቸው፣ መንኰራኵሮቻቸውም፣ የአራቱም መንኰራኵሮች ዙሪያቸው በዐይኖች ተሞልተው ነበር። ¹³ስለ መንኰራኵሮቹም፣ እኔ እየሰማሁ “የሚሽከረከሩት” ተብለው ተጠሩ። ¹⁴እያንዳንዱም አራት ፊት ነበረው፤ የመጀመሪያው የኪሩቤል ፊት፣ ሁለተኛው የሰው ፊት፣ ሦስተኛው የአንበሳ ፊት፣ አራተኛው የንስር ፊት ነበር።

¹⁵ኪሩቤሎችም ወደ ላይ ተነሡ። እነዚህም በኮባር ወንዝ አጠገብ ያየኋቸው ሕያዋን ፍጥረታት ነበሩ። ¹⁶ኪሩቤሎች በሚንቀሳቀሱ ጊዜ መንኰራኵሮቹ በአጠገባቸው ይንቀሳቀሱ ነበር፤ ከምድር ለመነሣትም ክንፎቻቸውን ባነሡ ጊዜ መንኰራኵሮቹ ከጎናቸው አይለዩም ነበር። ¹⁷በቆሙ ጊዜ መንኰራኵሮቹ ይቆሙ ነበር፤ ወደ ላይ በተነሡ ጊዜ መንኰራኵሮቹ ከእነርሱ ጋር ይነሡ ነበር፤ የሕያዋኑ ፍጥረታት መንፈስ በእነርሱ ውስጥ ነበርና።

¹⁸ከዚያም የአባታችን ክብር ከቤቱ ደጃፍ በላይ ተንቀሳቅሶ በኪሩቤሎች ላይ ቆመ። ¹⁹እኔም እያየሁ ኪሩቤሎች ክንፎቻቸውን አንሥተው ከምድር ተነሡ፤ መንኰራኵሮቹም በአጠገባቸው ሆነው አብረው ወጡ። በአባታችን ቤት በምሥራቅ በር መግቢያ ላይ ቆሙ፤ የእስራኤልም አባት ክብር ከበላያቸው ከፍ ብሎ ነበር።

²⁰እነዚህም በኮባር ወንዝ አጠገብ ከእስራኤል አባት በታች ያየኋቸው ሕያዋን ፍጥረታት ነበሩ፤ ኪሩቤሎችም እንደ ሆኑ ዐወቅሁ። ²¹እያንዳንዱ አራት ፊት፣ አራት ክንፍ ነበረው፤ ከክንፎቻቸው በታችም የሰው እጅ የሚመስል ነገር ነበር። ²²ፊቶቻቸውም በኮባር ወንዝ አጠገብ ካየኋቸው ፊቶች ጋር ይመሳሰሉ ነበር። እያንዳንዱም ወደ ፊቱ ቀጥ ብሎ ይሄድ ነበር።