Ezekiel 11

11 ¹Manglāna ili khāngmathotta, ithumwui Avāwui shimwui zingshoshongwui ngavei, zingshoshong ngareivā chili thānvai. Ngavei zangkhavaili mi maga̱da phangā leisai, kala athumwui alungli Azzurwui naomayara Ja-azaniah kala Benaiahwui naomayara Pelatiah, mibingwui akhokabing chi ina theihaira.

²Ana ili hānga, "Miwui naomayara, hi keinung hili makaphā sākhavai khangarāna makaphā hāngkachithei kasā mibing chi hina, ³chibingna hānga, 'Shim sākhavai atam nganaihaira maningmala? Hi hamna, ithumva sāna.' ⁴Chiwui vang eina Miwui naomayara, athumwuitungli marānlu; marānlu."

⁵Chiwui thili ithumwui Avāwui Manglā ili zangmida, kala ili hithāda hānglu da hānga: ithumwui Avāna hithāda hānga: O Israel shimkhur, nathumna hithāda hānga; nathumwui ningli shokkahai chi ina theihaira. ⁶Nathumna keinung hili mi kachungkha sāthata, kala chiwui chānreili kathingun eina pemngasaka.

⁷Chiwui vang Proho Avāna hithāda hānga: nathumna sāthatta keinung alungli khalapkahaibing chi sāna, keinung chi hamna; kha nathumli chiwui eina kashamshokhaora. ⁸Nathumna raighai chi ngacheehaira, kala ina nathumwuitungli raighai khuirāra, da Proho Avāna hānga. ⁹Ina nathumli keinung chiwui eina khuishokta, yur kateibingli horsangmira, kala nathumli bichar sāra. ¹⁰Nathum raighai eina thira. Ina nathumli Israelwui leiretli bichar sāra, chieina I nathumwui Avāna da nathumna theira. ¹¹Keinung hi nathumwui vang ham maningmara, nathumla chiwui alungli sā maningmara. Ina nathumli Israelwui leiretli bichar sāra; ¹²chieina I nathumwui Avāna da nathumna theira; kaja nathumna iwui shiyan-chikan mamayonlakmana, iwui sharphahorla mamayonmana, kha nathumwui kuikhamareili khalei yurbingwui sharphahor eina mizāhaira.

Avāna Ning Kadhar Ngashitmi

¹³Ina marānlakha, Benaiahwui naomayara Pelatiah thihaowa. Ina mai mashunzangda panglāk eina vaoda hānga, "Iya, Proho Avā! Israelwui katai saikora sāthatserhaorala?"

¹⁴Chiwui thili ithumwui Avāwui tui china ili rāhānga:

¹⁵Miwui naomayara, nawui achināngarā, nawui achināngarā, nawui athei-asābing, Israel shimkhur katonga, athum saikorali Jerusalemwui mibingna hānga, 'Vare eina katāva̱li leilu; ngalei hi ithumli metchang kahaina.'

¹⁶Chiwui vang eina hānglu, 'Proho Avāna hithāda hānga: Ina athumli yurbingwui ngachaili katāva̱li chihovāhailala, kala ngalei apam kachiva̱li chaiyāngva ngasakhailala, chithālala athum vākahai ngalei apam kachiva̱li ina kasha̱khawui vang athumwui katharapam ngasāhaira.'

¹⁷Chiwui vang eina hānglu: 'Proho Avāna hithāda hānga: Ina nathumli mibingwui eina kazipkakhui, nathum yāmkazatpam ngalei apam kachiva̱wui eina kazipserra, kala nathumli Israelwui ngalei mira.'

¹⁸Athumna chili rā tharan, chiwui makhayā meoma̱ saikora kala ningkakachai ot saikora chi chiwui eina horserhaora. ¹⁹Ina athumli ning akha sangmira, kala athumwui alungli manglā kadhar sangmira; kala ina athumwui asāwui eina ngalungwui malung chi khuishokhaida asāwui malung phonmira, ²⁰chithakha athumna iwui ain chi mashurra, kala iwui shiyan-chikan chi ngasharda mayonra. Kala athumna iwui naongarā ngasāra, I athumwui Avā ngasāra. ²¹Kha ningkakachai ot kala makhayā otsak chi ning eina shurzata mibingli, ina athumwui otsak chi athumwuitungli tāra, da Proho Avāna hānga.

²²Chiwui thili cherubbingna athumwui angachāng hārhaowa, kala kāngpheibing chila athumwui ngalemli, kala Israelwui Avāwui tekhamatei chi athumwuitungli lei. ²³Ithumwui Avāwui tekhamatei chi keinung chiwui alungwui eina khāngkakā, kala keinung chiwui zingshoshongli khalei kaphungtungli kānganinga. ²⁴Manglā china ili khāngkhuida, ithumwui Avāwui Manglā eina mahākhamili Chaldeali khalei raithā kahaibingli khuivai. Chiwui thili ina theikahai khamahā chi iwui eina khāngkakā. ²⁵Kala ithumwui Avāna ili chitheimi kahai saikora chi ina raithā kahaibingli hānga.