Esekiẹli 11

11 ¹Ẹ̀mí sì gbé mi sókè, ó sì mú mi wá sí ẹnu ibodè ìhà ìlà oòrùn ti ilé Baba wa, tí ó kọjú sí ìlà oòrùn. Ní ẹnu ọ̀nà, àwọn ọkùnrin mẹ́ẹ̀ẹ́dọ́gbọ̀n wà, mo sì rí Jaasaniah ọmọ Assuri àti Pelatiah ọmọ Benaiah láàrín wọn, àwọn olórí àwọn ènìyàn.

²Ó sì wí fún mi pé, “Ọmọ ènìyàn, àwọn wọ̀nyí ni àwọn ọkùnrin tí ń gbìmọ̀ ibi tí wọ́n sì ń gba ìmọ̀ràn búburú nínú ìlú yìí, ³tí wọ́n ń wí pé, ‘Ṣé kò tí ì tó àkókò láti kọ́ ilé? Ìlú yìí ni ìkòkò, àwa ni ẹran.’ ⁴Nítorí náà sọ àsọtẹ́lẹ̀ sí wọn; sọ àsọtẹ́lẹ̀, ọmọ ènìyàn.”

⁵Nígbà náà ni Ẹ̀mí Baba wa bà lé mi lórí, ó sì sọ fún mi láti wí pé: ‘Èyí ni ohun tí Baba wa wí: Báyìí ni ẹ̀yin ń sọ, ilé Israẹli; mo mọ ohun tí ń dìde nínú ọkàn yín.’ ⁶Ẹ ti pa ọ̀pọ̀lọpọ̀ ènìyàn nínú ìlú yìí, ẹ sì ti fi òkú kún àwọn òpópónà rẹ̀.

⁷Nítorí náà Baba Olódùmarè wí pé: àwọn tí ẹ pa tí ẹ sì tẹ́ sílẹ̀ nínú ìlú náà ni ẹran, ìlú náà sì ni ìkòkò; ṣùgbọ́n a ó lé yín jáde kúrò nínú rẹ̀. ⁸Ẹ ti bẹ̀rù idà, Èmi ó sì mú idà wá sórí yín, ni Baba Olódùmarè wí. ⁹Èmi ó mú yín jáde kúrò nínú ìlú náà, Èmi ó fi yín lé àwọn àjèjì lọ́wọ́, Èmi ó sì mú ìdájọ́ ṣẹ sí yín. ¹⁰Ẹ ó ti ipa idà ṣubú. Èmi ó ṣe ìdájọ́ yín ní agbègbè Israẹli, ẹ ó sì mọ̀ pé Èmi ni Baba yín. ¹¹Ìlú yìí kì yóò jẹ́ ìkòkò fún yín, ẹ̀yin náà kì yóò sì jẹ́ ẹran nínú rẹ̀. Èmi ó ṣe ìdájọ́ yín ní agbègbè Israẹli, ¹²nígbà náà ni ẹ ó mọ̀ pé Èmi ni Baba yín—ẹ̀yin tí ẹ kò tẹ̀lé àwọn ìlànà mi tí ẹ kò sì pa àwọn òfin mi mọ́, ṣùgbọ́n tí ẹ gbé ní ìbámu pẹ̀lú àwọn òfin àwọn orílẹ̀-èdè tí ó yí yín ká.

Baba Ṣèlérí Ọkàn Tuntun

¹³Bí mo ti ń sọ àsọtẹ́lẹ̀, Pelatiah ọmọ Benaiah kú. Mo sì dojúbolẹ̀, mo sì kígbe sókè pé, “Yéè, Baba Olódùmarè! Ìwọ yóò ha pa ìyókù Israẹli run pátápátá bí?”

¹⁴Nígbà náà ni ọ̀rọ̀ Baba wa tọ̀ mí wá pé:

¹⁵Ọmọ ènìyàn, àwọn arákùnrin rẹ—àwọn arákùnrin rẹ, àwọn ìbátan rẹ gan-an, gbogbo ilé Israẹli, gbogbo wọn—àwọn ará Jerusalemu ti wí pé, ‘Ẹ jìnnà sí Ọlọ́run; ilẹ̀ yìí ni a fi fún wa ní ìní.’

¹⁶Nítorí náà wí pé, ‘Èyí ni ohun tí Baba Olódùmarè wí: Bí ó tilẹ̀ jẹ́ pé mo rán wọn lọ sí ọ̀nà jíjìn láàrín àwọn orílẹ̀-èdè tí mo sì fọ́n wọn ká láàrín àwọn ilẹ̀ wọ̀nyí, síbẹ̀ mo jẹ́ ibi mímọ́ fún wọn fún ìgbà díẹ̀ nínú àwọn ilẹ̀ tí wọ́n lọ.’

¹⁷Nítorí náà wí pé: ‘Baba Olódùmarè wí pé: Èmi ó kó yín jọ kúrò láàrín àwọn ènìyàn, Èmi ó ṣà yín jọ kúrò nínú àwọn ilẹ̀ tí a fọ́n yín ká sí, Èmi ó sì fún yín ní ilẹ̀ Israẹli.’

¹⁸Nígbà tí wọ́n bá dé ibẹ̀, wọn ó mú gbogbo àwọn òrìṣà ìríra rẹ̀ àti gbogbo àwọn ohun ìkórìíra rẹ̀ kúrò nínú rẹ̀. ¹⁹Èmi ó fún wọn ní ọkàn kan, Èmi ó sì fi ẹ̀mí tuntun sínú wọn. Èmi ó mú ọkàn òkúta kúrò nínú ẹran-ara wọn, Èmi ó sì fún wọn ní ọkàn ẹran-ara, ²⁰kí wọn lè tẹ̀lé àwọn ìlànà mi, kí wọn sì pa àwọn òfin mi mọ́, kí wọn sì ṣe wọ́n. Wọn ó sì jẹ́ ọmọ mi, Èmi ó sì jẹ́ Baba wọn. ²¹Ṣùgbọ́n àwọn tí ọkàn wọn ń lépa àwọn ohun ìkórìíra wọn àti àwọn ìwà ìríra wọn—Èmi ó mú ìwà wọn wá sórí ara wọn, ni Baba Olódùmarè wí.

²²Nígbà náà ni àwọn kérúbù gbé ìyẹ́ apá wọn sókè, àwọn kẹ̀kẹ́ sì wà lẹ́gbẹ̀ẹ́ wọn, ògo Baba Israẹli sì wà lókè wọn. ²³Ògo Baba wa sì gòkè kúrò nínú ìlú náà, ó sì dúró sórí òkè tí ó wà ní ìhà ìlà oòrùn ìlú náà. ²⁴Ẹ̀mí sì gbé mi sókè, ó sì mú mi wá nínú ìran, nípasẹ̀ Ẹ̀mí Baba wa, sọ́dọ̀ àwọn ìgbèkùn ní Babeli. Nígbà náà ni ìran tí mo ti rí fi mí sílẹ̀. ²⁵Mo sì sọ fún àwọn ìgbèkùn gbogbo ohun tí Baba wa ti fihàn mí.