ሕዝቅኤል 11 FHB Father's Heart Bible™

11 ¹መንፈስ ድማ ኣልዓለኒ፤ ናብቲ ናብ ምብራቕ ዝጥምት ምብራቓዊ ደገ ቤት ኣቦና ኣምፅኣኒ። ኣብቲ መእተዊ ኸዓ ዕስራን ሓሙሽተን ሰባት ነበሩ፤ ኣብ ማእኸሎም ድማ መራሕቲ ህዝቢ ዝኾኑ ንያዛንያ ወዲ ኣዙርን ንጴላጥያ ወዲ በናያስን ርኤኹ።

²ከምዙይ ድማ በለኒ፦ “ኣታ ወዲ ሰብ፥ እዚኣቶም እቶም ኣብዛ ኸተማ እዚኣ ክፉእ ዝምህዙን ክፉእ ምኽሪ ዝህቡን ሰባት እዮም፥ ³ንሳቶም ድማ ‘ኣባይቲ ንምስራሕ ጊዜኡ ኣይቀረበን ድዩ? እዚኣ እቲ ድስቲ እያ፥ ንሕና ኸዓ እቲ ስጋ ኢና’ ይብሉ። ⁴ስለዙይ ኣብ ልዕሊኦም ተነበ፤ ኣታ ወዲ ሰብ፥ ተነበ።”

⁵ሽዑ መንፈስ ኣቦና ኣብ ልዕለይ ወረደ፥ ከምዙይ ኢለ ኽዛረብ ድማ በለኒ፦ ‘ኣቦና ከምዙይ ይብል ኣሎ፦ ኣቱም ቤት እስራኤል፥ ከምዙይ ትብሉ ኣለኹም፤ ኣብ ኣእምሮኹም ዝለዓል ድማ ኣነ እፈልጥ እየ።’ ⁶ኣብዛ ኸተማ እዚኣ ብዙሓት ቀቲልኩም፤ ኣደባባያት ድማ ብቕቱላት መላእኹም።

⁷ስለዙይ እቲ ልዑል ኣቦ ከምዙይ ይብል ኣሎ፦ እቶም ዝቐተልኩሞምን ኣብ ማእኸላ ዘንበርኩሞምን እቲ ስጋ እዮም፥ እታ ኸተማ ድማ እቲ ድስቲ እያ፤ ንስኻትኩም ግና ካብኣ ክትስጎጉ ኢኹም። ⁸ንሰይፊ ፈሪሕኩም ኢኹም፥ ኣነ ድማ ሰይፊ ኸምፅአልኩም እየ፥ ይብል ልዑል ኣቦ። ⁹ካብታ ኸተማ ኸውፅአኩም፥ ኣብ ኢድ ደቂ ጓና ከሕሊፈ ኽህበኩም፥ ኣባኻትኩም ድማ ፍርዲ ኽፍፅም እየ። ¹⁰ብሰይፊ ኽትወድቁ ኢኹም። ኣብ ዶብ እስራኤል ክፈርደኩም እየ፥ ኣነ ኣቦኹም ምዃነይ ድማ ክትፈልጡ ኢኹም። ¹¹እዛ ኸተማ እዚኣ ድስቲ ኣይክትኮነኩምን እያ፥ ንስኻትኩምውን ኣብ ውሽጣ ስጋ ኣይክትኮኑን ኢኹም። ኣብ ዶብ እስራኤል ክፈርደኩም እየ፥ ¹²ሽዑ ኣነ ኣቦኹም ምዃነይ ክትፈልጡ ኢኹም፤ ንስኻትኩም ሕግጋተይ ዘይሰዓብኩም፥ ፍርድታተይ ዘይሓሊኹም፥ ግና ብፍርዲ እቶም ኣብ ዙሪያኹም ዘለዉ ኣህዛብ ዝነበርኩም።

ኣቦ ሓዱሽ ልቢ ተስፋ ይህብ

¹³ክንበ እንተለኹ ድማ፥ ጴላጥያ ወዲ በናያስ ሞተ። ኣነ ኸዓ ብገፀይ ተደፊአ፥ ዓው ኢለ “ኦ ልዑል ኣቦ! ንተረፍ እስራኤል ፈፂምካ ኽተጥፍኦዶ ኢኻ?” ኢለ ኣእዌኹ።

¹⁴ሽዑ ቃል ኣቦና ናባይ መፀ፦

¹⁵ኣታ ወዲ ሰብ፥ ኣሕዋትካ፥ እወ ኣሕዋትካ፥ ኣዝማድካ፥ ብዘለዉ ኵሎም ቤት እስራኤል፥ እቶም ነበርቲ ኢየሩሳሌም ‘ካብ እግዚኣብሄር ርሓቑ፤ እዛ ምድሪ እዚኣ ንሕና ርስቲ ክንገብራ ተውሂባትና እያ’ ኢሎምዎም እዮም።

¹⁶ስለዙይ ከምዙይ በል፦ ‘ልዑል ኣቦ ከምዙይ ይብል ኣሎ፦ ኣብ ማእኸል እቶም ኣህዛብ ርሒቐ እኳ እንተ ሰደድክዎም፥ ኣብ መንጎ እተን ሃገራት እንተ በተንክዎም፥ ኣብተን ዝኸድወን ሃገራት ንቑሩብ ጊዜ መቕደስ ኮንክዎም።’

¹⁷ስለዙይ ከምዙይ በል፦ ‘ልዑል ኣቦ ከምዙይ ይብል ኣሎ፦ ካብቶም ህዝብታት ክእክበኩም፥ ካብተን ዝተበተንኩምለን ሃገራት ክእክበኩም፥ ምድሪ እስራኤል ድማ ክህበኩም እየ።’

¹⁸ናብኣ ምስ መፁ ድማ፥ ኵሉ ዘፀይፍ ጣዖታታን ኵሉ ርኹስ ነገራታን ካብኣ ከወግድዎ እዮም። ¹⁹ሓደ ልቢ ክህቦም፥ ኣብ ውሽጦም ድማ ሓዱሽ መንፈስ ከንብር እየ። ነቲ ኣብ ስጋኦም ዘሎ ልቢ እምኒ ድማ ኣልዒለ፥ ልቢ ስጋ ክህቦም እየ፥ ²⁰ምእንቲ ሕግጋተይ ክስዕቡ፥ ፍርድታተይ ክሕልዉን ክገብርዎምን። ንሳቶም ድማ ውሉደይ ክኾኑ እዮም፥ ኣነ ኸዓ ኣቦኦም ክኸውን እየ። ²¹እቶም ልቦም ደድሕሪ ዘፀይፍ ነገራቶምን ርኹስ ተግባራቶምን ዝስዕብ ግና፥ መንገዶም ኣብ ርእሶም ክመልሶ እየ፥ ይብል ልዑል ኣቦ።

²²ሽዑ እቶም ኪሩቤል ኣኽናፎም ኣልዓሉ፥ እቲ መንኰራዅር ድማ ኣብ ጎኖም ነበረ፥ ክብሪ ኣቦ እስራኤልውን ኣብ ልዕሊኦም ነበረ። ²³ክብሪ ኣቦና ድማ ካብ ማእኸል እታ ኸተማ ተልዓለ፥ ኣብቲ ብምብራቕ እታ ኸተማ ዘሎ እምባ ደው በለ። ²⁴መንፈስ ድማ ኣልዓለኒ፥ ብመንፈስ ኣቦና ብራእይ ኮይነ ናብቶም ኣብ ባቢሎን ዝነበሩ ምሩኻት ኣምፅኣኒ። ሽዑ እቲ ዝርኤኽዎ ራእይ ካባይ ተልዓለ። ²⁵ነቶም ምሩኻት ድማ እቲ ኣቦና ዘርኣየኒ ዅሉ ነገር ነገርክዎም።