ሕዝቅኤል 12 FHB Father's Heart Bible™

12 ¹ቃል ኣቦና ናባይ መፀ፦

²“ኦ ወዲ ሰብ፥ ኣብ ማእኸል ዓመፀኛ ቤት ትነብር ኣለኻ፤ ክርእዩ ዓይኒ እናሃለዎም ኣይርእዩን፥ ክሰምዑ እዝኒ እናሃለዎም ኣይሰምዑን፥ ዓመፀኛ ቤት እዮም እሞ።”

³“ስለዙይ ንስኻ፥ ኦ ወዲ ሰብ፥ ናይ ምርኮ ኣቑሕካ ኣዳሉ፥ ብቐትሪ ድማ ኣብ ቅድሚኦም ተማሪኽካ ኺድ። ካብ ቦታኻ ናብ ካልእ ቦታ ኣብ ቅድሚኦም ተማሪኽካ ኺድ። ዓመፀኛ ቤት እኳ እንትኾኑ፥ ምናልባሽ ክርእዩ እዮም።”

⁴“ከም ናይ ምርኮ ኣቑሑ ጌርካ ብቐትሪ ኣብ ቅድሚኦም ኣቑሕካ ኣውፅእ፤ ባዕልኻ ድማ ከምቶም ናብ ምርኮ ዝኸዱ ጌርካ ብምሸት ኣብ ቅድሚኦም ውፃእ።”

⁵“ኣብ ቅድሚኦም ነቲ መንደቕ ኵዓቶ፥ ኣቑሕካ ድማ በቲ ኣውፅእ።”

⁶“ኣብ ቅድሚ ዓይኖም ኣብ ማእገርካ ኣልዒልካ ብፀልማት ኣውፅኣዮ። ነታ ምድሪ ምእንቲ ኸይትርእያ ገፅካ ሸፍን፤ ንቤት እስራኤል ምልክት ጌረካ ኣለኹ እሞ።”

⁷ከምቲ እተኣዘዝክዎ ድማ ገበርኩ። ብቐትሪ ኣቑሐይ፥ ናይ ምርኮ ኣቑሑ፥ ኣውፃእኩ፥ ብምሸት ከዓ ነቲ መንደቕ ብኢደይ ኵዓትክዎ። ብፀልማት ድማ እናረአዩ ኣብ ማእገረይ ፀይረ ኣውፃእክዎ።

⁸ንግሆ ድማ ቃል ኣቦና ናባይ መፀ፦

⁹“ኦ ወዲ ሰብ፥ ቤት እስራኤል፥ እቲ ዓመፀኛ ቤት፥ ‘እንታይ ትገብር ኣለኻ?’ ኢሉ ኣይጠየቐካንዶ? ¹⁰ከምዙይ ኢልካ ንገሮም፦ ‘ጐይታ ኣቦ ከምዙይ ይብል ኣሎ፦ እዝ ትንቢት እዙይ ብዛዕባ እቲ ኣብ ኢየሩሳሌም ዘሎ መስፍንን ብዛዕባ ኵሉ እቲ ኣብኣ ዘሎ ቤት እስራኤልን እዩ።’

¹¹ከምዙይ በል፦ “‘ኣነ ምልክትኩም እየ። ከምቲ ኣነ ዝገበርክዎ፥ ከምኡ ኽግበሮም እዩ፤ ተማሪኾም ናብ ምርኮ ክኸዱ እዮም። ¹²እቲ ኣብ ማእኸሎም ዘሎ መስፍን፥ ብፀልማት ኣቑሑ ኣብ ማእገሩ ኣልዒሉ ክወፅእ እዩ። ምእንቲ ንእኡ በቲ ኼውፅእዎ ነቲ መንደቕ ክዅዕቱ እዮም። ነታ ምድሪ ብኣዒንቱ ምእንቲ ኸይርእያ ገፁ ክሽፍን እዩ። ¹³መርበበይ ኣብ ልዕሊኡ ክዝርግሕ እየ፤ ንሱ ድማ ኣብ መፈንጠረይ ክትሓዝ እዩ። ናብ ባቢሎን፥ ናብ ምድሪ ባቢሎናውያን፥ ከምፅኦ እየ፤ ንሱ ግና ኣይክርእያን እዩ፤ ኣብኡ ድማ ክመውት እዩ። ^a a v13 እቲ መስፍን ድማ ሰድቅያስ፥ እቲ ናይ መወዳእታ ንጉስ ይሁዳ እዩ። ንሱ ኻብ ኢየሩሳሌም እናሃደመ ተታሒዙ፥ ናብ ባቢሎን ቅድሚ ምውሳዱ ኸዓ ዓይኑ ዖረዎ፤ ስለዙይ ልክዕ ከምቲ ዝተነበየ፥ ናብታ ኸተማ በፂሑ ንሳ ግና ፈፂሙ ኣይረኣያን። ¹⁴ኣብ ዙርያኡ ዘለዉ ዅሎም፥ ሓገዝቱን ኵሉ ሰራዊቱን፥ ናብ ኵሉ ንፋስ ፋሕ ከብሎም እየ፤ ደድሕሪኦም ድማ ሰይፊ ክመዝዝ እየ።

¹⁵“ኣብ ማእኸል ህዝብታት ፋሕ ምስ ኣበልክዎም፥ ኣብ ሃገራት ድማ ምስ በተንክዎም፥ ኣነ ኣቦኦም ምዃነይ ክፈልጡ እዮም።

¹⁶“ካብ ሰይፍን ጥሜትን መቕሰፍትን ግና ሒደት ሰባት ከትርፍ እየ፥ ምእንቲ ኣብ ማእኸል እቶም ዝኸድዎም ህዝብታት ኵሉ ፅያፎም ክነግሩ። ሽዑ ኣነ ኣቦኦም ምዃነይ ክፈልጡ እዮም።”

¹⁷ቃል ኣቦና ድማ ናባይ መፀ፦

¹⁸“ኦ ወዲ ሰብ፥ እንጀራኻ እናተንቀጥቀጥካ ብላዕ፥ ማይካ ድማ እናራዓድካን እናተጨነቕካን ስተ።

¹⁹“ነቶም ህዝቢ እታ ምድሪ ኸዓ ኸምዙይ በሎም፦ ብዛዕባ እቶም ኣብ ኢየሩሳሌም፥ ኣብ ምድሪ እስራኤል፥ ዝነብሩ ጐይታ ኣቦ ከምዙይ ይብል ኣሎ፦ ምድሮም ብሰንኪ ዓመፅ ኵሎም እቶም ኣብኣ ዝነብሩ ኻብ ኵሉ ምልኣታ ኽትግፈፍ እያ እሞ፥ እንጀራኦም ብጭንቀት ክበልዑ፥ ማዮም ድማ ብራዕዲ ኽሰትዩ እዮም።

²⁰“እተን ሰብ ዝነብሩለን ከተማታት ክዓና እየን፥ እታ ምድሪ ድማ ክትባድም እያ። ሽዑ ኣነ ኣቦኹም ምዃነይ ክትፈልጡ ኢኹም።’”

ኣቦ ነቲ ከንቱ ምስላ የጥፍኦ

²¹ቃል ኣቦና ድማ ናባይ መፀ፦

²²“ኦ ወዲ ሰብ፥ እዝ ኣብ እስራኤል ዘሎ ‘እተን መዓልቲታት ይነውሓ ኣለዋ፥ ኵሉ ራእይ ድማ ይጠፍእ’ ዝብል ምስላ እዙይ እንታይ እዩ?

²³“ስለዙይ ከምዙይ ኢልካ ንገሮም፦ ‘ጐይታ ኣቦ ከምዙይ ይብል ኣሎ፦ ነዝ ምስላ እዙይ ከጥፍኦ እየ፤ ደጊም ኣብ እስራኤል ኣይክምስልዎን እዮም።’ ኣብ ክንድኡ ኸዓ ከምዙይ በሎም፦ ‘እተን መዓልቲታት ቀሪበን ኣለዋ፥ ምፍፃም ኵሉ ራእይ ድማ ቀሪቡ ኣሎ። ²⁴“ኣብ ቤት እስራኤል ዝኾነ ናይ ሓሰት ራእይ ወይ ለማፂ ጥንቆላ ኣይክተርፍን እዩ እሞ።

²⁵“ኣነ ኣቦኹም እየ እሞ፤ እቲ ዝዛረቦ ቃል ክዛረብ እየ፥ ንሱ ድማ ክፍፀም እዩ። ደጊም ኣይድንጒን እዩ፤ ኦ ዓመፀኛ ቤት፥ በዘመንኩም ቃል ክዛረብ፥ ክፍፅሞ ድማ እየ፥ ይብል ጐይታ ኣቦ።’”

²⁶ቃል ኣቦና ድማ ናባይ መፀ፦

²⁷“ኦ ወዲ ሰብ፥ ቤት እስራኤል ‘እቲ ንሱ ዝርእዮ ዘሎ ራእይ ንብዙሕ ዓመታት ዝኸውን እዩ፤ ንሱ ብዛዕባ ርሑቕ ዘመን ይንበ ኣሎ’ ይብሉ ኣለዉ።

²⁸“ስለዙይ ከምዙይ ኢልካ ንገሮም፦ ጐይታ ኣቦ ከምዙይ ይብል ኣሎ፦ ካብ ቃላተይ ሓደ እኳ ደጊም ኣይድንጒን እዩ። እቲ ዝዛረቦ ቃል ክፍፀም እዩ፥ ይብል ጐይታ ኣቦ።”