Nna Zitere Ihe Ịrịba Ama Banyere Ịga Biri Nʼala Ọzọ

Ezekiel kwakọbara akpa, gwuo oghere nʼmgbidi ụlọ ya nʼuhuruchi, kpuchie ihu ya, na-eme ka ọ bụ ndọrọ nʼagha nʼanya ndị agbata obi na-ajụ ihe ọ na-eme. Megide okwu ndị mmadụ na-ekwu na ọhụụ anaghị emezu, Nna anyị zara na oge nchere agwụla.

Isi 12.

Okwu Nna anyị bịakwutere m, sị:

“Nwa nke mmadụ, ị bi nʼetiti ụlọ nnupụisi—ha nwere anya iji hụ ihe ma ha adịghị ahụ ihe, ha nwere ntị iji nụ ihe ma ha adịghị anụ ihe, nʼihi na ha bụ ụlọ nnupụisi.”

“Ya mere gị, nwa nke mmadụ, kwakọba ngwongwo gị maka ije mbịa nʼala ọzọ, gaa biri nʼala ọzọ nʼehihie nʼihu ha. Si nʼebe ị nọ gaa ebe ọzọ nʼihu ha. Ma eleghị anya ha ga-ahụ, ọ bụ ezie na ha bụ ụlọ nnupụisi.”

“Bupụta ngwongwo gị nʼehihie nʼihu ha, dịka ngwongwo onye na-aga biri nʼala ọzọ; ma gị onwe gị pụọ nʼanyasị nʼihu ha, dịka ndị na-aga biri nʼala ọzọ.”

“Nʼihu ha, gwuwaa mgbidi ahụ, si na ya bupụ ngwongwo gị.”

“Nʼihu ha, bulie ya nʼubu gị, bupụ ya nʼoge ọchịchịrị. Kpuchie ihu gị ka ị ghara ịhụ ala ahụ, nʼihi na emeela m gị ihe ịrịba ama nye ụlọ Izrel.”

Ya mere, m mere dịka e nyere m nʼiwu. Nʼehihie, m bupụtara ngwongwo m, ngwongwo maka ije mbịa nʼala ọzọ, nʼanyasị ejiri m aka gwuwaa mgbidi ahụ. Nʼoge ọchịchịrị, m buuru ya nʼubu m, ka mmadụ niile na-ele.

Nʼụtụtụ, okwu Nna anyị bịakwutere m, sị:

“Nwa nke mmadụ, ọ bụ na ụlọ Izrel, bụ ụlọ nnupụisi ahụ, ajụbeghị gị, ‘Gịnị ka ị na-eme?’ Gwa ha sị, ‘Nna anyị, Onye kachasị ihe niile elu, na-ekwu, sị: Amụma a metụtara onye isi nọ na Jerusalem na ụlọ Izrel niile bụ ndị nọ nʼime ya.’

Gwa ha sị, “‘Abụ m ihe ịrịba ama unu. Dịka m meworo, otu a ka a ga-emekwa ha; ha ga-aga biri nʼala ọzọ, bụrụ ndị a dọtara nʼagha. Onye isi ahụ nọ nʼetiti ha ga-ebuli ngwongwo ya nʼubu ya nʼoge ọchịchịrị ma pụọ. Ha ga-egwuwa mgbidi ahụ iji si na ya kpọpụta ya. Ọ ga-ekpuchi ihu ya ka ọ ghara iji anya ya hụ ala ahụ. Aga m agbasa ụgbụ m nʼelu ya; a ga-ejidekwa ya nʼọnya m. Aga m akpọga ya Babilọn, bụ ala ndị Babilọn, ma ọ gaghị ahụ ya anya—nʼebe ahụ kwa ka ọ ga-anwụ. ^a Aga m achụsasị nʼifufe niile ndị niile gbara ya gburugburu—ndị inyeaka ya na ndị agha ya niile—mịpụtakwa mma agha nʼazụ ha.

“Ha ga-amata na mụ onwe m bụ Nna ha mgbe m chụsasịrị ha nʼetiti mba dị iche iche, mee ka ha gbasaa nʼime ala niile.

“Ma aga m ezọpụta mmadụ ole na ole site na mma agha, ụnwụ, na ọrịa na-efe efe, ka ha wee kọọ akụkọ banyere ihe arụ ha niile nʼetiti mba ndị ahụ ha gara. Mgbe ahụ, ha ga-amatakwa na mụ onwe m bụ Nna ha.”

Mgbe ahụ, okwu Nna anyị bịakwutere m, sị:

“Nwa nke mmadụ, jiri ịma jijiji rie nri gị, jirikwa oke ụjọ na nchegbu ṅụọ mmiri gị.”

“Gwa ndị ala ahụ sị: Nke a bụ ihe Nna anyị, Onye kachasị ihe niile elu, na-ekwu banyere ndị bi na Jerusalem nʼala Izrel: Ha ga-eji nchegbu rie nri ha, jirikwa obi ọlụlọ ṅụọ mmiri ha, nʼihi na a ga-anapụ ala ha ihe niile juru nʼime ya, nʼihi ihe ike nke ndị niile bi nʼime ya.

“Obodo niile e bi nʼime ha ga-aghọ mkpọmkpọ ebe, ala ahụ ga-atọgbọrọkwa nʼefu. Mgbe ahụ, unu ga-amata na mụ onwe m bụ Nna unu.’”

Nna Mere Ka Ilu Efu Ahụ Kwụsị

Mgbe ahụ, okwu Nna anyị bịakwutere m, sị:

“Nwa nke mmadụ, gịnị bụ ilu a a na-atụ nʼIzrel, sị: ‘Ụbọchị ndị ahụ na-adịte aka, ọhụụ ọbụla na-adabakwa ada’?

“Ya mere, gwa ha sị, ‘Nke a bụ ihe Nna anyị, Onye kachasị ihe niile elu, na-ekwu, sị: Aga m eme ka ilu a kwụsị; ha agaghịzi atụ ya nʼIzrel.’ Kama gwa ha sị, ‘Ụbọchị ndị ahụ eruola nso, ya na mmezu nke ọhụụ ọbụla. Nʼihi na ọ dịghị ọhụụ ụgha ọbụla maọbụ ịgba afa nrafu nke ga-afọdụ nʼime ụlọ Izrel.

“Nʼihi na mụ onwe m bụ Nna unu; aga m ekwu okwu ahụ m na-ekwu, a ga-emekwa ya. Ọ gaghịzi egbu oge—nʼihi na nʼụbọchị unu, unu ụlọ nnupụisi, aga m ekwu okwu, meekwa ya, ka Nna anyị, Onye kachasị ihe niile elu, kwupụtara.’”

Mgbe ahụ, okwu Nna anyị bịakwutere m, sị:

“Nwa nke mmadụ, ụlọ Izrel na-ekwu, sị, ‘Ọhụụ ọ na-ahụ bụ maka ọtụtụ afọ dị nʼihu; ọ na-ebu amụma banyere oge ndị dị anya.’

“Ya mere, gwa ha sị: Nke a bụ ihe Nna anyị, Onye kachasị ihe niile elu, na-ekwu, sị: Ọ dịghị okwu m ọbụla nke a ga-egbu oge ọzọ. Ihe m na-ekwu ka a ga-emezu, ka Nna anyị, Onye kachasị ihe niile elu, kwupụtara.”